I le tausaga 2019, na faatautaia ai e le Komisi o le Toefuataiga o Tulafono a Samoa ni semina faamalamalama, i tulafono e 6 mo lana Iloiloga o Tulafono o Mataupu Tau Aiga:
- Tulafono o Tamaiti 1961
- Tulafono o Faaipoipoga 1961
- Tulafono o le Tatalaga o Faaipoipoga 1961
- Tulafono o le Tausiga o Aiga 1967
- Tulafono o le Saogalemu o Aiga 2013
- Tulafono o le Faamasinoga o Mataupu e Faatatau i Aiga 2014
Semina Faamalamalama Faalauaitele 2019
Na amata faatautaia semina i le aso 29 Iulai 2019 i Salelologa Savaii; ma le aso 31 Iulai 2019 i le Tooa Salamasina, Apia. O isi semina faamalamalama sa faatautaia mai i le masina o Setema 2019 i Neiafu mo afioaga mai Asau i Falelima; i Sagone mo afioaga mai Fagafau agai i Taga; i Samauga mo afioaga mai Aopo i Patamea; ma Salelologa mo afioaga mai Gataivai agai i Salelologa i Puapua. Mo Upolu, na faatautaia ai semina i le masina o Oketopa 2019 i Apia mo afioaga mai Apia agai i Falelatai, agai i Falevao, agai i Tiavi ma le Talafatai o Apia; o Saanapu-uta sa faatautaia ai semina mo Itumalo o Lefaga, Safata ma Siumu; o Sapunaoa na faatautaia ai semina mo le Itumalo o Falealili, o Lalomanu mo Itumalo o Lepa & Lotofaga ma Aleipata; ma Taelefaga mo afioaga uma i le Itumalo o Fagaloa.
O le faamoemoega autu o nei semina faamalamalama o le faamatalaina lea poo a aiaiga ma uiga o fuaiupu o nei tulafono e 6. I le ma’ea ai o nei semina sa faailoa atu ai, o le tausaga 2020, o le a toe oo atu le Komisi mo le tuuina mai aloaia o sao ma finagalo o le atunuu, i nei tulafono e 6.
E fiafia le Komisi e faailoa atu o lea ua ma’ea ona faamaonia e le Kapeneta le Pepa o Talanoaga mo faatalanoaga ma le mamalu lautele o le atunuu.
Faatalanoaga Faalauaitele 2020
E faailoa atu e le Komisi, o lea o le a faatautaia le vaega muamua o ana Faatalanoaga Faalauaitele i masina o Mati ma Aperila 2020 i tulafono muamua nei e 2:
- Tulafono o Tamaiti 1961; ma le
- Tulafono o Faaipoipoga 1961.
O faamatalaga i nofoaga (i Upolu ma Savaii), o aso ma taimi o nei faatalanoaga, ma nisi vaega o faatalanoaga faalauaitele, e faatatau i isi a tatou tulafono e 4, o le a faamautū ma faailoa atu i se aso oi luma.
Pepa o Talanoaga
O lea foi ua tatala le avanoa e tuuina mai ai sou sao i le Pepa o Talanoaga a le Komisi lea na faamaonia e le Kapeneta. O kopi o lenei Pepa o Talanoaga e mafai ona maua atu mai i le upega tafailagi a le Komisi www.samoalawreform.gov.ws poo le susū mai e auina atu sau kopi i le Ofisa o le Komisi, Fogafale Muamua o le Fale FMFMII, Matagialalua.
E matou te valaau atu ma le faaaloalo i le mamalu o le atunuu e tuuina mai sou sao i soo se mataupu, poo mataupu uma ua talanoaina ma lagā i totonu o le Pepa o Talanoaga. E tauala mai, i le tuuina mai o sou finagalo tusitusia e faatuatusi ma momoli mai i le Ofisa o le Komisi, poo le faaali foi o lou finagalo i faatalanoaga faalauaitele. E taua lou sao, aua se fautuaga a le Komisi i le Kapeneta.
O le aso Faraile 29 Me 2020 o le a faagata ai le tuuina mai o sou sao i tulafono nei e 2 o le a faatalanoaina muamua, (i) Tulafono o Tamaiti; ma le (ii) Tulafono o Faaipoipoga 1961.
Mo nisi faamatalaga faamolemole faafesootai mai le Komisi i le imeli commission@samoalawreform.gov.ws poo le telefoni 28493/94.
Ma le faaaloalo lava,
Telei’ai Dr. Lalotoa Mulitalo
PULE FAATONU
