(24/03/2020); I le aso 21/03/2020, na maua mai ai iuga o su’esu’ega e ono (6) o le fa’ama’i o le Korona-19 ma E LE O FA’AMAONIA.
E aofia ai i nei su’esu’ega E LE O FA’AMAONIA le tagata e 21 tausaga mai le afioaga o Letogo.
O lo’o fa’atali pea iuga o isi su’esu’ega e (4) mo e MASALOMIA.
I le taimi nei, e to’atolu (3) nisi tagata fou o lo’o MATA’ITUINA lelei ma sa galulue ai le Matagaluega i le fa’aiuga o le vaiaso ua tuana’i ma le Aso Gafua (aso 22/03/2020 ma le aso 23/03/2020). O i latou nei e to’atolu (3) o lo’o fa’atali a latou su’esu’ega. O lo’o fa’anofo esea i latou nei aua le malupuipuia o isi tagata.
O lo’o fa’atalitali pea le iuga o su’esu’ega o i latou e to’afitu (7), e aofai ai i latou e le’i maua i le vaiaso ua tuana’i, ma su’esu’ega fou e tolu (3) mai le fa’aiuga o le vaiaso na tuana’i. Ua mae’a ona lafoina uma i Niu Sila.
O le a logologo puiali’i pea le mamalu o le atunu’u i le gasologa o nei su’esu’ega.
E tatalo atu le mamalu o le atunu’u, ina ia alolofa e fa’ataua agatapuia ma ia taofiofi le fa’asinosinolima i e ua masalomia ua a’afia fa’apea ma nisi tagata e ono a’afia.O le fa’atinoina o su’esu’ega, ina ia malupuipuia Samoa fa’apea ma aiga o i latou ua a’afia.E tu’uina atu ripoti ma su’esu’ega i le mamalu o le atunu’u, mo le nofo silafia e tapenapena ai, ae aua ne’i avea ma tulaga e ta’uleagaina ai e ua masalomia ua a’afia.
Ina ne’i iai se tagata e fa’amaonia e a’afia i Samoa, o le tu’ualalo i le mamalu o nu’u ma afioaga ma le atunu’u atoa e mana’omia tele la outou lagolago. O tagata uma o lo’o fa’atino su’esu’ega i le taimi nei e tatau ona ave iai le fa’amalosiau ma le fa’alototele. O le tatou lagolago ma le opogi o a tatou taumafaiga e soifua maloloina ai Samoa.
O lo’o fa’auauina le fa’atinoina o su’esu’ega i le taimi nei a le Matagaluega mo i latou uma na feso’ota’i ma feiloa’i atu i tagata ua masalomia, O le a fai fo’i fa’atalatalanoaga e sailiili ai tagata uma na feso’ota’i ai lata mai. O lenei galuega o se tasi o vaega o le auaunaga fa’a-soifua maloloina ina ia fesoasoani e taofi/fa’aititia le pipisi o fa’ama’i.
E fautuaina ma le malosi tagata uma o lo’o faimalaga ma afea atunu’u o lo’o a’afia i le fa’amai o le Korona-19, ina ia mata’ituina lelei lo latou soifua maloloina pe a alia’e āuga nei; fiva, tale ma faigata ona manava. Afai ae alia’e nei āuga, fa’amolemole fa’afeso’ota’i mai le Matagaluega o le Soifua Maloloina po’o se foma’i mo se fautuaga.
E fautuaina fo’i, fa’amolemole ina ia mata’itu lelei lou soifua maloloina ma ia mautinoa lou nofo lelei i le fale pe a o’o ina alia’e nei auga. Ia iai se potu e te nofo esea po’o se vaega fa’apitoa o le fale, mai lou aiga ma ia mautinoa e aua ne’i fa’aaoga fa’atasi vaega e aai, feinu ma momoe ai.
O lo’o galulue le Matagaluega o le Soifua Maloloina ina ia si’itia puipuiga, ma ia taofiofi le ono pipisi o le Korona-19, e aofia ai ma tapenapenaga o falema’i ta’itasi. E tāua fo’i le lagolago a le mamalu o le atunu’u auā le puipuiga o Samoa.
1. Ia fufulu mamā lima i taimi uma i se fasimoli ma vai mamā po’o se vailaau fufulu lima.
2. Ia pupuni lou fofoga pe a mafatua pe tale i se pepa solo mama; tia’i vave i le lapisi pe a uma ona fa’aaoga ma fufulu mamā lima pe a mae’a.
3. Ia fa’aaoga le tali fofoga pe a fa’apea o e gasegase po’o se tagata o lo’o tausia le tagata ua gasegase i totonu o le falema’i.
4. Aua le tago so’o i ou fofoga (mata, isu, gutu)
5. Vili se foma’i po’o se falema’i lata ane mo se fautuaga pe a ua alia’e ni āuga.
6. Fautuaina e taofi ni faigamalaga o lo’o fuafuaina.
7. Fautuaina e taofia le auai i vaega o lo’o tumutumu ai tagata ma ia 1 le mita le mamao ma le isi tagata o lo’o a’afia i āuga o le fulu.
8. Ia fa’amamā i taimi uma vaega ma mea totino e tagofia so’o e pei o; au o faitoto’a, luga o laulau/kesi, telefoni)
9. Fautuaina le taofia o ni asiga ma le tumutumu i falema’i aemaise i le fanau i lalo ifo o le 19 le matutua; na’o le to’atasi le tagata fa’atagaina e tausi ma’i.
Mo fa’amatalaga sa’o ma maumautu e uiga i le gasologa ma ta’iga o lenei fa’ama’i, fa’atasi ai ma fautuaga mo femalagaiga, fa’amolemole silasila i upegatafa’ilagi ma numera o lo’o ta’ua i lalo.
FACEBOOK: Government of Samoa | Public Health, Ministry of Health Samoa
WEBSITE: www.samoagovt.ws | www.health.gov.ws
NUMBERA VILI FUA: 800-6440
