O le a ta’oto ia fa’agalu e le fati pa’ia o lenei taeao; ae ua ou tula’i atu e fai sina upu pu’upu’u i le ‘auga o lenei aso, ona tatala aloa’ia ai lea o lenei Laumua Fa’apitoa mo A’oa’oga i Mataupu Fa’akomepiuta ma Tekonolosi.
O lenei atiinae na afua mai i se maliega sa sainia i le Aso 24 o Me i le tausaga 2017 e le Sui Palemia o le tatou Malo ma le Minisita o le Va-i-fafo ole Malo o Initia i se fonotaga a Minisita ma Ta’ita’i o Malo o le Pasefika ma le Malo o Initia sa usuia I Fiti.
E talitonu le tatou Malo i le faatauaina o aoaoga faatekonolosi ma le faaleleia o ia auaunaga aua o le tasi lea o uuna’i malosi i le atia’eina o tamaoaiga o atunuu o le lalolagi.
O lenei atiinae ua o gatasi ma le faamoemoe o le tatou Malo. Ma e momoli atu ai le faamalo ma le faafetai i le Malo Initia mo le latou fa’ama’ite ma le latou taulagalaga i mealelei aemaise le faatupeina o masini, tusi-a’oga faapea tomai ma agava’a ua faasoa mai e amata ai lenei Laumua Faapitoa mo le 2 tausaga o lenei poloketi.
O loo iai le faamoemoe a mae’a le 2 tausaga o lenei atiinae ona faamatu’u uma lea i le tatou Iunivesite Aoao o Samoa e faaauauina lenei auaunaga mo le tatou atunuu.
Oute fiafia e faailoa atu e to’afā alo o Samoa lea ua fo’i mai Initia sa auai atu mo a’oa’oga faapitoa e 6 masina, ina ia agava’a ma avea i latou ma faiaoga o lenei Laumua Faapitoa.
O le masina o Aukuso o lenei tausaga na taunuu mai ai faiaoga faapitoa e to’alua mai Initia e amataina a’oa’oga o lenei poloketi ma o loo galulue nei ma faiaoga e to’afā ale tatou Iunivesite Aoao o Samoa ina ia gasolo lelei le faatinoga o a’oa’oga.
O le naunauta’iga ole tatou Malo ia tula’i mai tama fanau o Samoa o le a a’oa’oina i lenei Laumua Faapitoa mo A’oa’oga i Mata’upu Fa’atekonolosi, e fai so latou sao tāua i le atina’eina o le Malo ma le atunuu.
