VAILAAU MA FUALAAU MO TOGAFITIGA O LE KOVITI 19
Tusia: Tusiga Taofiga
O lo o tālia le taunuu mai ai i Samoa, o vailaau ma fualaau mo togafitiga ole Koviti 19. O lenei fesoasoani oloo galulue faatasi ai le Malo o Samoa ma Niu Sila lea na taua e Palemia Tuilaepa Sailele Malielegaoi o se vaega lenei o tapenapenaga ale Malo o Samoa ina nei mea ane ua pagatia le atunuu i lenei faamai matautia.
O lenei malaga faapitoa o le a maua ai foi le avanoa mo tagatanuu o Niu Silao loo aumau I Samoa e toe tali atu ai I Aoteroa.
O le ala lea ua talosaga ai ma le Malo Samoa tauala atu i le Matagaluega o le Va-i-Fafo (MFAT) i le Malo Niu Sila, ina ia momoli mai ai ma a o pusa fualaau ma vailaau mo togafitiga o gasegase i le atunuu.
I le saunoaga fa’amalamalama a le Palemia, Tuilaepa Sailele Malielegaoi, na ia fa’ailoa ai e fa’apea;
“O lea lava e tatala le avanoa mo femalaga’iga i tulaga le ma’alofia, e i ai fualaau ma vailaau e fia tu’uina mai mo le Falema’i.”
“O nei lea na ave ai le fa’atanaga a le tatou Malo i le faigapa’aga ma Niu Sila, e lele mai loa le va’alele, ma aumai le tatou uka, o oloa o vailaau ‘ese’ese, ina ia lava tatou fualaau ma vailaau i le falema’i e tapenapena ai lava ina ne’i te’i ua oso fa’afuase’i mai le Koviti 19.”
“E le’o mafai lava ona tatou fa’atalia seia o’o i se i si taimi.”
“A toe fo’i la le va’a, ona ave ai lea o sitiseni Niu Sila lea ei Samoa nei, e lē mafai ona ti’eti’e ai lava se isi e le’o se sitiseni Niu Sila, na’o tagatanu’u lava o Niu Sila e fa’ataga ona malaga i va’alele lenei.”
“Ma o nai tagata Niu Sila nei, ua leva ona talosaga i lo latou Malo, ua toe fia fo’i, fa’apei o tagata Amerika lea lele fa’apitoa mai lava le latou va’alele avatu ai latou tutusa lelei fo’i ma Siamani.”
“Lea fo’i la ua tu’uina mai le talosaga a Niu Sila mo le tu’uina atu o nai o latou tagatanu’u, lea la ua talia e tatou ma le aiaiga na’o fualaau lava ma vailaau e mafai ona fa’alele mai ai, e matuā fa’asā se tasi ona malaga mai ai.”
“A taunuu mai i le malae va’alele, e lē omai i lalo le aufaigaluega a le va’alele o lo o malaga mai ai, ae na’o na fa’ae’e sa’o lava o tagatanu’u Niu Sila o le a malaga, ma toe fo’i loa.”
“Na’o sitiseni Niu Sila ia ei nei Samoa, ai ua toe feso’ota’i atu i le Malo NZ, ua leva ona toe fia fo’i atu, ai ona o le tilotilo i le tulaga to’atele o foma’i ma togafitiga o lo o maua pea.”
“Ua ala ona ou tāua le itu lea, fa’apea lava ita e le to’atele ni sitiseni Niu Sila o iinei Samoa, e i ai fo’i nai o tatou tagata o la fo’i ua fia o, ae le’o taliaina la e Niu Sila, o la lava e aumai sa’o a e NZ le latou va’alele e avatu ai a latou sitiseni.”
Saunoa le Palemia, o lo o i ai fo’i le va’alele fa’apitoa (Ambulance) a le Malo Vanuatu o le a lelei mai Samoa, e avatu ai se tasi o sitiseni Vanuatu, o le faiaoga Vanuatu o lo o galue i le Aoga Matāta ‘Ese’ese a Ausetalia (APTC) i Vaivase ma o lenei alii o lona ma’i tunau o le suka (diabetes).
I le taimi nei o lo o tumau pea le tapunia o femalaga’iga fa’avaomalo a va’alele i va o Samoa ma i si atunuu o le lalolagi, ona o a’afiaga o le lalolagi i le Koviti 19.
