“O LE SUPAMAKETI LAVA O LE SUPAMAKETI,” TUILAEPA
Tusia: Tusiga Taofiga
“Se o nei mea, ua matuā tele le lavelave, o le mea lea, pau lava le fa’amatalaga sa’o, o le Supamaketi, e fai faitotoa e o ai totonu tagata ma tumu vale ai tagata fa’atau, ae o le faleoloa e le’o se Supamaketi, e fa’atau sa’o mai lava oloa i le fa’amalama, mo le fa’afaigofie,” saunoaga lea a le Palemia, Tuilaepa Sailele Malielegaoi.
Ua toe fa’amalamalama manino e le Palemia le sa’oga o le Poloa’iga a le Malo mo le Koviti 19, i le ‘ese’esega o Supamaketi ma Faleoloa laiti.
Saunoa Tuilaepa;
“E i ai isi o i latou ua omai faimai, e fai le faitoto’a tele e mafai ai ona oatu tagata i totonu, ae fai le laulau (counter) mo fa’atau a tagata fa’atau.”
“Ae leai ni latou Supamaketi o faia, auā o Supamaketi lava ia e te alu atu, ona pule a lea o oe ia i lau oloa e te tago i ai, filifili po’o a oloa e te mana’o ai, ona fa’atoa e sau ai lea totogi ma e aga’i ai loa i fafo, o le mea la lena e ta’u o le Supamaketi.”
“Ae i ai la i si faimai latou, se o lo’u fale e le’o se Supamaketi, ae tatala a faitoto’a tetele e oatu ai tagata i totonu, ona oatu fo’i lea fesili i le fa’atau oloa, o le a fo’i le oloa lena, se’i aumai a se ta oloa lena se’tasi se’i fa’atau.”
“Tutusa lelei a faleoloa lena ma le faleoloa lea e fai le fa’amalama.”
“Se o nei mea, ua matuā tele le lavelave, o le mea la lea, e pau lava le fa’amatalaga sa’o, o le Supamaketi, e fai faitotoa e o ai totonu tagata ma tumu vale ai tagata fa’atau, ae o le faleoloa e le’o se Supamaketi, fa’atau sa’o mai lava oloa i le fa’amalama, mo le fa’afaigofie.”
“Auā e fai atu loa se isi mea, o ane fo’i lea ma i si Supamaketi fai fo’i latou laulau, o le mea la pito sili ona faigofie, tauave le mea lena sa faiatu ai, o le Supamaketi lea e fa’asino i ai le Poloa’iga lea a le Malo, o le faleoloa e fai faitoto’a tetele e oatu ai tagata e tumutumu vale i totonu.”
“A’o le lē Supamaketi o le tama’i faleoloa e fa’atau mai i le fa’amalama oloa.”
Fa’ailoa e le Palemia, o lo o i ai lava le fesēsea’i o Leoleo i la latou auaunaga i le fa’auigaina o le Supamaketi sa’o ma faleoloa laiti.
“O le itu tāua lena, se leaga o leoleo e te fiu e fa’amatala, a le fa’afaigofieina i ai le gagana, na’o na atili ai ona gugu le to’au ma tele mea tau fufulu.”
“O le mea la lea, tu’u ia le mea lea e faimai ai Leoleo, o le Supamaketi e o i totonu fa’aaoga ai faitoto’a lapopo’a, feoa’i ai totonu ma tumutumu vale solo ai i totonu ma e filifili ai i au oloa e te mana’o i ai.”
“A’o le lē Supamaketi, e te tu tu ai lava i fafo i le fa’amalama ma fa’atau ai lau oloa, ona faigofie lea.”
“Leaga ai tagata fa’apena pe fa’a’afa’afa, e ‘afa Supamaketi, ‘afa fa’amalama, ae tatou ia i le mea faigofie, o le Supamaketi ma le lē Supamaketi.”
Na toe fa’amamafa e le Ta’ita’i o le Atunuu i Supamaketi uma, o lo o nofo malamalama lelei le Matagaluega o Leoleo, i togagfiti ‘ese’ese e faia e so’o se Supamaketi, ina ia ‘aua ne’i tapunia i itula ua fa’atulagaina i totonu o le Poloa’iga o lo o fa’amamaluina i le taimi nei.
“O le togafiti le mea lena, a’o Leoleo fo’i latou ua malamalama lelei i togafiti, la ua uma ona sala isi i ta’i $200, toe sala fa’alua i le $500 la ua toe sala fa’atolu i le $5000.”
“Ua fiafia ai lava nai Leoleo ua lava ai latou tupe maua, ma ua fa’a’opo’opo ai ma latou tupe i lalo o latou paketi, ae ala fo’i ona fai e faleoloa mea na, ua leiloa po’o fea la ave latou tupe e fa’aaoga ai, na’o le fia totogi sala fia totogi sala ai.”
