TOE O SE AGA ONA TATALA LEA O LE AUALA SIMĀ I MALI’OLI’O
Tusia: Taunuuga Toatasi
O le Kapeneta e tu’uina mai ai ai le fa’ai’uga aloaia, i le fuafuaga mo le tatalaina aloaia o le auala simā i Mali’oli’o, Samalaeulu Savaii.
Saunoa le Pule Sili o le Pulega o Felaua’iga i le Lau’ele’ele (LTA), Galumalemana Ta’atialeoitiiti Tutuvanu-Schwalger i le feiloa’iga ma le Savali, e lua auala o lo o silasila i ai le Pulega mo le tatalaina o lenei galuega tele a le Malo, peita’i e fa’alagolago mea uma i le fa’ai’uga aloaia e tu’uina mai e le Kapeneta.
O nei auala e lua, e aofia ai le tatala i le taimi nei o le auala simā i Maliolio mo femalaga’iga a le mamalu o le atunuu, ae fa’atoā faia le sauniga fa’apitoa i le taimi mulimuli, pe a mae’a le fa’ama’i o a’afia ai le lalolagi atoa, o le Koviti 19.
Ma le lona lua, o le fa’asalalau tu’usa’o lea e le Pulega o le LTA, o taualumaga o le tatala aloaia o le auala simā fou lenei, ae fa’aaoga ai le upega tafa’ilagi pei o le Live stream on Facebook Page a le LTA.
O ia fuafuaga e pei ona fa’ailoa e le Ofisa Sili o Pulega, o taumafaiga lava ina ia malu puipuia le atunuu ma ia tausisia aiaiga ma tapu o le Poloa’iga a le Malo, o lo o fa’amalosia nei.
O lo o fa’atupeina e le Faletupe o le Lalolagi (World Bank), le Malo Ausetalia ma le Malo Samoa lenei galuega tele, ma e tusa lona tau ma le $7.64 miliona, ma o lo o fausia e le Konekarate a Ah Liki ae o lo o fesoasoani i ai le Konekarate a le Apia Lua ma le Konekarate o le FICO.
“Ua mae’a ona fausia ma fa’ata le auala kolosi fou i Mali’oli’o peita’i e laiti lava galuega o lo o totoe ma o lo o taumafai e fa’amae’a ona atoatoa loa lea.”
O lea atina’e o se fuafuaga a le Malo e tali atu ai i a’afiaga o suiga ma’ale’ale o le tau o lo o i ai nei.
E pei ona silafia e le mamalu o le atunuu, fa’afitauli ua tutupu mai pe a tetele tafega i lea nofoaga.
Saunoa Galumalemana, e lē mafai ona tuua le fa’atinoga o galuega a le Pulega, aemaise lava i le fausiga o auala simā ma le fa’aleleia o auala tele auā femalaga’iga a le atunuu.
O le fa’ataunuu ai o ia atina’e o se tasi lea o vaega o lo o maioio i totonu o le Tusi Ta’iala mo le Atina’e o Samoa 2016 / 2017 – 2019 / 2020 i lona Taunuuga Mo’omia 14: Puipuiga mo Fesuia’iga o le Tau ma Fa’alavelave Mata’utia.
O lea Vaega Mo’omia o lo o amanaia ai faiga fa’avae i vaega tumaoti mo fuafuaga ma galuega e fa’atino auā le nofo puipuia fa’apea le nofo sauniuni e tali atu i fesuia’iga o le tau aemaise fa’alavelave mātuia ma mala fa’alenatura.
