TOE FAUSIA LE AUALA SIMĀ I MOAMOA
Tusia: Taunuuga Toatasi
Ua tali le Pulega o Felaua’iga i le Lau’ele’ele (LTA), i le talosaga a nisi o le atunuu o lo o alala ma papā aao i Moamoa sopoia le auala simā lea e masani ona a’afia pea tetele tafega.
O lea ua amata fa’agasolo i le taimi nei, le toe fausia o lenei auala simā e le Konekarate a Ah Liki ma o lo o fa’atupeina e le Faletupe o le Lalolagi ma le Malo o Ausetalia mo le umi e ono masina.
O le tali lenei a le Malo i mafatiaga sa feagai pea ma nisi o le atunuu o lo o nonofo i lea vaega o Upolu, pe a o’o ina tetele timuga ma loulouā le tau, e le toe i ai ma se tasi e sopoia lea vaega o le atunuu pe a tetele atu tafega.
I le feiloa’iga a le Savali ma le Ofisa Sili o le LTA, Galumalemana Ta’atialeo’iti’iti Tutuvanu -Schwalger sa ia fa’amanino ai le fa’agasolo atoa o lenei atina’e.
“O le auala simā lea i Moamoa, e tele lava ina taofia ai femalaga’iga a le atunuu pe a fai e tetele timuga ma pa ai le vaitafe.”
“O le vave fa’agaioi ai o lea auala, o le tali atu lea a le Malo i le vave foia o le fa’afitauli o lo o gafa ma le mamalu femalagaa’i o le atunuu aemaise i tagata o lo o nonofo i Moamoa.”
“E leai se i si auala i totonu o le afio’aga e mafai ona fa’aaoga pe a tulaga fa’aletonu le tau, ma o le ala lea ua tatau ai lava ona toe fausia lenei galuega.”
“O lea ua ave le fa’amuamua a le Malo e fa’atino ai le galuega lea, ina ia vave foia ai le fa’afitauli o lo o gafa ma le atunuu femalagaa’i.”
“E ui lava o lo o taumafai e fa’aauau galuega o auala, ona e pau lea o galuega i totonu o Vaega Tumaoti, lea o lo o maua ai pea galuega o lo o fa’afaigaluega ai o tatou tagata, aemaise o le taimi lenei o lo o feagai le atunuu ma lu’itau tetele i tulaga tau i galuega, ona o a’afiaga o le fa’ama’i o le Koviti 19,” o le fa’a’opo’opo lea a Galumalemana.
O le vaiaso ua mavae, na amata fa’agasolo ai le galuega mo lea atina’e a le Malo, ma ua o gatasi lenei fa’amoemoe ma Taunu’uga Mo’omia 14, o le Tusi Ta’iala mo le Atina’e o Samoa 2016 / 2017 – 2019 / 2020, Amanaia i totonu o faiga fa’avae vaega tuma’oti ma fuafuaga o galuega e fa’atino auā le nofo puipuia fa’apea le nofo sauniuni e tali atu i fesuia’iga o le tau fa’apea mala matuiā.
O le fautuaga malosi a le LTA mo atunuu e afea lea vaega o Samoa, ina ia fa’a’ete’ete ma usitaia fa’ailoilo ua fa’atutūina i lea vaega o le atunuu, e fesoasoani ai i galuega a le aufaigaluega o lo o fa’atinoina nei.
