FA’ALELEIA AUALA MA TALIGALU I SAVAII
Tusia: Taunuuga Toatasi
E ui o lo o i ai Samoa i le Poloaiga mo Fa’alavelave Fa’afuase’i, ae le’o tuua ai galuega fa’atino a le Pulega o Felaua’iga i le Lau’ele’ele i le fa’aleleia ma le fausia o auala ma taligalu e tali atu ai i suiga ma’ale’ale o le tau o lo o i ai nei.
O le fausia ma le toe fa’aleleia o auala aemaise taligalu, o nisi ia o galuega o lo o gafa ma le Pulega o Felaua’iga i le Lau’ele’ele mo le motu tele i Salafai.
E valu auala fa’atasi ai ma le taligalu lea o lo o galulue nisi o konekarate ua manumalo i tauofoga a le Pulega e faatino i le taimi nei.
O ia galuega o se tali atu lea a le Malo mo suiga maaleale o le tau o loo i ai nei, aemaise o le faaleleia o auala mo femalagaiga a le mamalu o le atunuu o loo alala ma papaaao i totonu o afioaga o loo faatino ai ia galuega.
O afio’aga o lo o fa’agasolo ai ia galuega e aofia ai le toe fa’aleleia o le auala i Vaia’ata, fausia o le auala i Sapini, fausia o le auala i Luua ma Salimu, auala i Sato’alepai ma Fagamalo, auala i Masamasa ma Vaisala, auala i Gautavai / Sili, auala i Tafua-tai ma le auala i Safua.
O le afio’aga o Faga lea o lo o fa’atautaia ai le galuega o le fausia o le taligalu, e tali atu i suiga ma’ale’ale o le tau o lo o i ai nei.
O le toe fa’aleleia o le auala i Vaia’ata i lona vaega muamua, o le Konekarate a Ah Liki lea o lo o gafa ma le galuega.
O le Kamupani a le TM Transport Co. Ltd o lo o gafa ma le fausia o le auala i Sapigi, o le Konekarate a le FICO o loo gafa ma le fausia o le auala i Luua ma Salimu ma Tafua Tai.
O le auala i Satoalepai ma Fagamalo o lo o fausia e le Konekarate o le Big Island, a o le Konekarate a Sakalafai o loo latou fausia le auala i Masamasa ma Vaisala.
O le Kamupani o le ON & SONS Ltd o lo o gafa ma le fausia o le auala i Gautavai agai i Sili fa’atasi ai ma le fausia o le taligalu i Faga, a o le Savaii Construction o lo o gafa ma le fusia o le auala i Safua.
O ia galuega o lo o fa’atupeina e le Malo o Samoa ma o lo o taimua ai le Pulega o Felauaiga i Luga o le Laueeleele.
E ono masina o loo fa’agasolo ai ia galuega sei vagana ai le galuega toe fa’aleleia o le auala i Vaia’ata e valu masina o lo o fa’agasolo ai.
O le fa’ataunuu ai o ia galuega a le Malo o se tasi lea o vaega o lo o i totonu o le Ta’iala mo le Atina’e o Samoa 2016/2017-2019/2020 i lona Taunuuga Mo’omia e 14 o lo o fa’apea mai, Puipuiga mo Fesuia’iga o le Tau ma Fa’alavelave Matuia.
