FAUTUAGA A MALU O LE MALO MO E O LO O SOLIA LE TULAFONO
Tusia: Taunuuga Toatasi
Ua toe fautuaina foi e le Matagaluega o Leoleo le mamalu o le atunuu o lo o fuafua e soli le tulafono e ala i le auina fa’ananā mai o fualaau fa’asaina i totonu o le atunuu, a o i ai le atunuu i le Poloa’iga o Fa’alavelave Fa’afuasei ona o le Koviti 19.
O lea lapataiga na afua ona o le Aso Lua, 21 o Aperila na logoina ai le Ofisa o Leoleo e le Ofisa o Tiute e fa’ailoa ai se pusa sa sailia ma maua ai se poloka e masalomia o ni fualaau fa’asaina.
Sa fa’atino suesuega amata a le Matagaluega e fa’aaogaina ai masini fa’aonaponei ma faamautuina ai o lea poloka o se fualaau faasaina ua taua o le Cocaine.
E fa’apea se lipoti mai le Matagaluega, o lea fa’amomoli sa auina mai Mexico mo Samoa nei.
O lea fualaau fa’asaina e sili atu ma le 200 kalama lona mamafa ma e ono maua ai se tupe pe a faatauina i le tau e $250,000.
I le lipoti lava a le Matatagaluega o lo o tā’ua ai e fa’apea, o lo o galulue fa’atasi le Matagaluega ma le Ofisa o Tiute, ina ia fa’amautu uma e o lo o a’afia i lea mataupu mo le faatinoina o moliaga faalesolitulafono.
E pei ona fa’aalia i le lipoti a le Matagaluega, a o feagai le atunuu ma le tali atu mo puipuiga o le fa’ama’i o le Koviti 19, e mautinoa e le muta ai le soligatulafono.
E to’atele foi nisi o le a fa’aaogaina lea avanoa e fa’atino ai pea soligatulafono ma a’afia ai le mamalu o le atunuu.
Ua tu’uina mai ai foi ma le fautuaga a le Matagaluega i le mamalu o le atunuu, ina ia galulue faatasi, aua se Samoa saogalemu i taimi uma.
O lo o i ai foi taifau sosogi a le Matagaluega aua lava le faatinoga o le galuega mo le mataitu lea o vaega uma faapea i malae vaalele ma uafu faavaomalo a le atunuu.
Ua fautuaina foi le atunuu, ina ia vave ona logo se ofisa o leoleo o lata ane i lou maota ma lou laoa pe a silafia se tulaga e ono soli ai le tulafono e nisi o vaavaai iai.
