SAOGALEMU LELEI ALO O SAMOA O LO O GALULUE I LUGA O VA’A
Tusia: Taunuuga Toatasi
O le saogalemu ma le malu puipuia o alo o Samoa o lo o galulue i luga o vaa i atunuu i fafo, o se tasi lea o galuega tele o lo o ave i ai le fa’amuamua a le Malo e tauala atu i le Auaunaga o Va’a a Samoa (SSS).
Saunoa Lautimuia Afoa Uelese Vaai, Pule Sili o le Auaunaga o Va’a a Samoa (SSS), o lo o fa’aauau pea ona feso’ota’i i aso uma le tatou ofisa i alo ma fanau o lo o i luga o vaa mo se fa’amatalaga i a latou galuega ma lo latou saogalemu.
“O loo pule alofa le Atua o loo manuia ma saogalemu mai le faama’i o le Koviti 19.”
“O loo i ai le facebook page a le SSS lea na saunoa Lautimuia, o loo maua uma ai faamatalaga ma le tulaga o loo iai ia alo o le atunuu.”
Na maua foi le avanoa o le Savali e fa’atalanoa ai se tasi o alii seila o lo o galue i luga o le va’a MSC Grandiosa, ia Ipuniuesea Launoa Fau.
“O le vaa o le MSC Grandiosa o lo o tu i Civitavecchia i Roma i Italia e le’i toe alu ‘ese lava talu mai le aso 15 o Mati 2020.”
Na fa’afetaia e lea alii le Malo o Samoa aemaise o le SSS, ona o lo o āsia pea i latou i aso uma i le tulaga o lo o i ai luga o le va’a o lo o galulue ai.
“O le taimi lenei e leai se isi o matou o ma’i, o lo o manuia uma i le alofa ma le agalelei o le Atua.”
Na fa’aalia e Ipuniuesea, o lo o saogalemu pea le nofoaga o lo o i ai, ona o lo o i luga o le vaa ma o lo o tu le vaa i luga o le sami ma o loo nonofo pea i luga o vaa e leo feoai.
E fa’alua ona fai a matou siaki i le aso, e mata’itu ai matou po’o a’afia i le fa’ama’i ona o Italia le isi atunuu lea e maitau atu o lo o to’atele tagata o lo o a’afia i le Koviti 19, o le fa’a’opo’opo lea a Ipuniuesea.
“E toe toa 10 fanau Samoa lea e i luga o le va’a lea. E tele lava le toe fia fo’i atu i Samoa, ae ua matou manatu e sili lava le nonofo i luga o le va’a o lea e malu puipuia ai. Atonu se aso maua se isi tala mai le Kamupani va’a o lo o matou galulue ai, ae o le taimi lenei, o lea o lo o saogalemu luga o le va’a mo matou.”
O tulaga uma e pei ona fa’amalosia ai i latou e pei o le tumamā ma vaega e tausisia ai le soifua maloloina, o lo o fa’atino uma i luga o le va’a, ina ia ‘aua lava nei a’afia se isi.
“O le tatalo lava i aso uma o loo fai e pei ona masani ai tatou tagata, o le mea foi lena o loo fai i luga o le vaa.
“E i ai le talitonuga e sili le matou nonofo i luga o le vaa, nai lo le matou o atu i luga o isi malae vaalele, aafia atu ai se isi i le faama’i.
“E sili lava le puipuia nai lo le tau togafitia, e pei o lea mau, aua o lea e saogalemu uma matou i le alofa ma le agalelei o le Atua.”
I fa’amaumauga a le SSS e pei ona faailoa mai e Lautimuia:
E 321 le aofa’iga o seila Samoa o lo’o i luga o vaa i atunuu i fafo i le taimi nei.
E 257 o lo o i luga o vaa meli (cruise ships). E 222 o lo’o fa’aauau a latou konekatrate ma o lo o fa’aauau pea ona galulue. E 35 ua maea a latou konekarate ma o lo’o nonofo ma tausia pea i luga o vaa mo lo latou saogalemu seia tatala le lockdown period ona toe taliu mai lea i Samoa.
E 64 o lo o i luga o vaa container ma o lo’o fa’aauau ona galulue uma i latou nei e oo mai i le taimi nei.
“E tatalo atu ma le faaaloalo i le tatou atunuu ina ia manatua ane nai alo ma fanau seila a Samoa ia tatou talosaga, ina ia alofagia pea e le Atua lo latou malu puipuia ma le saogalemu a’o feagai ai ma galuega i luga o vaa i atunuu fafo,” na saunoa i ai Lautimuia.
E tatalo atu foi i le mamalu o matua ma aiga o a tatou seila ina ia lava papale ma onosai, ma tatou tu’u faatasi i le Atua e ala i talosaga le faamoemoe o alo ma fanau o lo’o feagai ma galuega i luga o vaa i lenei vaitau faigata ua iai le lalolagi.
