FUALAAU, VAILAAU MA AUPEGA FA’ASAINA MAI AMERIKA SAMOA
Tusia: Tusiga Taofiga
“O le tasi lea auala na ala ai ona tapuni le malae va’alele lea ei Fagali’i, o lea sa mata’itu pea e leoleo, o i sa auala mai ai i si mea mai Amerika Samoa, e i ai fo’i ma tatou tagata iinei o lo o a’afia ai.”
Saunoa le Palemia, Tuilaepa Sailele Malielegaoi, ua matuā tutū aai leoleo e vaai toto’a tagata femalaga’i i le va o Amerika Samoa ma Samoa fa’apea i oloa feavea’i, ona e i ai le manatu o le isi faitoto’a lea o lo o auala mai ai nisi o aupega malolosi e le fa’atagaina i Samoa, aemaise nisi o fualaau fa’asaina.
O le vaiaso ua mavae, na maua ai e Leoleo ma le Ofisa o le Tiute, se pepa pauta cocaine na tu’uina mai i se fa’amomoli, e tusa lona tau ma le $250,000 ae 200 kalama lona mamafa.
I le fa’amatalaga mai le Ofisa o Leoleo, ua fa’amanino ai o lenei fa’amomoli na nanā i totonu o le au o le ofe ma o lea meli na auina mai Mexico, ma o lo o sailia i le taimi nei, i su’esu’ega a leoleo, po’o ai na aumai ai, a’o ai fo’i o lo o fa’amoemoe e tu’uina atu ai nei fualaau fa’asaina.
O le auga atoa lea o le finagalo o le Malo e pei ona saunoa ai Tuilaepa, ina ia matuā mata’itu toto’a femalaga’iga i le va o Samoa ma i si atunuu o le lalolagi e aofia ai ma Amerika Samoa;
“O le ala lena lea e mata’itu lelei ai le va lea o tatou ma Amerika Samoa, se’i vaai i nei fana o lea e fai ma maua, a’o fea la e oso mai ai fana nei, o lona uiga o lea lava e i ai le auala lea e sao mai ai, e tatau la ona matuā mata’itu lelei.”
“Aemaise o va’a ia sa femalagaa’i i le va o tatou ma Amerika Samoa, e i ai a lo’u masalo e oso mai Amerika Samoa fana ia, o le mea fo’i lea e tatau ona taula’i i ai le vaaiga a Leoleo, o la’u tu’ualalo foi lena i le Malo o Amerika Samoa, mata’itu lelei i latou nei, auā e lē mafai ona le iloa, o la e iloa, i latou nei latou te ola i luga o mea nei o aisa, auā e feololo lava i latou na ei Tutuila, e ola i le aisa, lea e i ai fana.”
“O le tulaga fo’i o tupe ia, e le te’ite’i o’o mai tupe nei ma fana ia, o Iraq, o lea e i ai tagata o le ISIS, ua le’o toe fa’atāua le ola, ma o lea ou te taumate, masalo o ni tagata Samoa sa tau i le taua e oatu i Amerika Samoa, e oso mai la i Amerika Samoa mea ia.”
“A’o mea nei o fana e umia e tagata nei, na’o tagata e palaaai, auā e ala ona oso i luga le loto toa, ona o fana, o lona uiga e leai loa ni fana, o tagata palaaai, lea latou te faia mea ia, lea e omai ma tupe ia, o lona uiga o tupe sa serve i o i Iraq, ou te le talitonu o lo o i ai ni sui o le ISIS, o mafai na omai, ae vagana ni fitafita Amerika sa tau i o, o i ai nisi o malōlo mai, ua matuā loloto i le tulaga lea o le fa’atau o le aisa.”
Na ia toe fautuaina malosi fo’i nisi o tagatanu’u Samoa o lo o tagofia nei aupega malolosi ma fualaau fa’asaina e saili ma atia’e ai o latou aiga, ina ia manatua, e leai se aogā o ia mea uma, pe a solia le tulafono, auā e te i’u lava i le falepuipui mo le olaga atoa.
“A’o fa’alogologo mai la outou ia ei nei, outou a ia e ola i le aisa, tu’u nei loa, tu’u nei loa, auā e le fa’apea e fai ma le iloa e leoleo, o lea lava e aga’i pea i luga tatou gaioiga mo le mata’ituina o tulaga nei, e a’afia ai ma nisi o lo o fai a latou Rental Cars.”
“Ae lelei fo’i lea ua tou lagāina maia, auā e le te’ite’i lava o’o lava o’o mai tupe nei Iraq, tasi a le auala e sao mai ai, sao mai fitafita sa tau i Iraq, a’o la e i ai o tatou fanau mai Amerika Samoa, ma e to’atele tele latou o lo o a’afia i mea nei o aisa, ona e faigata tele ona taofiofia mea nei, ona o le tupe vave, lea fo’i e lavea ai ma i si tatou tagata iinei, la fo’i e mata’itu lelei e leoleo.”
