FA’AFETAIA E LE MALO LE PULEGA A ALII MA FAIPULE O FALEATIU
Tusia: Tusiga Taofiga
“E to lo’u pulou i le toa o loto o Alii ma Faipule o Faleatiu,” o le saunoaga lea a le Palemia, Tuilaepa Sailele Malielegaoi.
O le fa’aleoina lea o le fa’afetai a le Ta’ita’i o le Malo, i le Pulega mamalu a Ali’i ma Faipule o le Afio’aga o Faleatiu, e tusa ma le galulue fa’atasi ma le Matagaluega o Leoleo, e tineia amioga fa’asolitulafono o lo o a’afia ai nisi o tama fanau a lea nu’u, e ala i le tagofia o laau fa’asaina ma aupega malolosi e le fa’atagaina e le tulafono.
O le galulue fa’atasi o le Malo ma le Pulega mamalu a Alii ma Faipule o Faleatiu, o le fesoasoani tele lea i le Matagaluega o Leoleo, i le sailia o e ua solitulafono ma faia uiga tau fa’amata’u e a’afia ai soifua o tagata lautele.
Saunoa Tuilaepa;
“O la’u fa’afetai, e fa’apitoa mo Alii ma Faipule o Faleatiu, ua atagia ai i, le telē o le avega o lo o fa’afeagai ma lea Afio’aga, i Alii ma Faipule, i lo latou taumafai ina ia fa’atulaga le nu’u, ia maua le maopopoga ma le filemu, ae ua taotaomia le tofā mamao ma le fa’a’uta’uaga o’oo’o i le taumafai o Ta’ita’i o le nu’u, ona o le malosi tele o le fa’amaualuga ma le lima i fana o fanau a le aiga a lea, le aiga lava lea e tasi lea e fa’apogai ai nei mau soligatulafono, to’atele lea e fale puipui.”
“Ma ou te fa’afetai i le nu’u atoa, ou te mautinoa fo’i o lo o lotolotoi ai ma nai auauna a le Atua i le taumafaiga o lenei galuega lelei.”
“E ‘ese le lagona, ina ua maua mai lipoti, i gaioiga a le alii Komesina o Leoleo ma le Matagaluega o Leoleo.”
“O la’u fa’afetai la, e fa’apitoa ona o le latou tapāina o puipuiga a Leoleo, ou te fa’afetai fo’i i le Komesina, i le vave o le tali atu.”
“Mo le silafia e i latou uma lava o fa’atupu fa’alavelave, o taimi uma lava e masi’i ai leoleo i le taimi lenei e ave lava aupega, mo le puipuiga o le latou lava soifua, o le uiga o le fa’aupuga lea.”
Sa faaleoina foi fautuaga faatama a le Palemia, i le aiga o lo o faia pea lenei soligatulafono aemaise o le fa’alafiina o le pagota ia Pati Chong Nee, ina ia tautuana e leai se tasi e mafai ona tumau pea lona malosi, ma e leai fo’i se i si ei luga o le tulafono.
“O le tu’ualalo fa’atamā, masalo toe tasi le tama (pagota), lea e sola i tua, Pati Chong Nee, lea foi ua maua le i si na aumai e Alii ma Faipule o Faleatiu, e te fiu e fesolata’i, ‘aua lava ne’i manatu se tasi, e sola pea ma sola ai pea, e tuliloa a oe e Leoleo, o i latou uma lava o i ai manatu ia solitulafono, ae fa’aaoga aupega, e maua a e fiu a e sola e maua a, ua iloa le upu fo’i lea, e sola a le amio leaga ae tulituli a e le tulafono, e fiu a le amioleaga e sola, ae tuliloa a e le tulafono.”
“O lea ua maua uma a tagata ia sa sulufa’i ma lafi i ai Pati Chong Nee, o lea ou te tau matau atu toe o ia lea e totoe, o le taimi lenei, savalivali mai pe i ai se i si o le tou aiga e te sau ai, ona e aga’i mai lea i le Ofisa o Leoleo ma le saogalemu, nai lo lou fealua’i ma lafilafi solo, manatua fo’i e le maua ai pea oe i le malosi, e i ai fo’i taimi e osofaia ai oe i le vaivai, ma ia e mautinoa fo’i e le fa’apea e tutū ni ou mata i lou papātua, ma tua o lou ulu, e tu i luma o lou ulu, ma ia manatua e i ai fo’i le taimi e te moe ai.”
“O la’u la fautuaga ia Pati Chong Nee, o lou avanoa lelei lea e te fo’i malie mai ai i totonu, a’o le’i puea oe e Leoleo, auā e pu’e loa oe e Leoleo, leiloa pe fa’asola ai lava ma oe i le taimi lena, auā e te ono faia ni uiga e ono le fa’atali ai loa ma Leoleo.”
“O la’u tu’ualalo fo’i i le aiga lea e fa’apogai ai tagata lima i fana, i totonu o le Afioaga o Faleatiu, taumafai outou, tuafafine ma uso, ave le upu lelei i tou fanau, ina ia ola a’e fanau a fanau, i se soifuaga lelei, auā o le i si lea fa’aletonu o fanau nei, ma tuafafine ma uso ona e le’o avea i ai se upu lelei.”
“E o’o fo’i ia Filipaina la ei totonu o le falepuipui e faigofie lava ona fa’apea, o la fo’i e aumai lana fa’atonuga i fafo, i lea mea e fa’aauau ai pea le soligatulafono.”
“O la’u fautuaga fo’i lena e ave i uso ma tuafafine, a tou o e asi Filipaina, ave i ai se fautuaga lelei, ia salamō ma tu’u nei loan a amioga leaga, auā na tu’u atu i ai le avanoa, e te palola ai, ae e sau fa’aaoga lē tatau le fesoasoani na avatu e le Malo.”
“O le tāua lena o le mea lea ua tupu mai, le gata o le ave o le fa’afetai fa’apitoa i Alii ma Faipule o Faleatiu ona o le lagolagosua i galuega fai a le Malo, mo se Samoa saogalemu, a’o le fautuaga fo’i e ave i le aiga a lea, ma matai o le aiga, ia outou tu i tou tulaga o outou o ta’ita’i o le nu’u, ina ia aloalo ‘ese ma uiga nei, e le maua ai se filemu, ae manatua lelei o na e ti’eti’e ai le mala i o outou luga, o lona uiga o le mala lena e ti’eti’e i outou luga e fa’asolo ia outou fanau, ae pau a le mea, o le salamō ma omai loa e o e to’atutuli i luma o le Atua ma fa’ato’ese, ma susu’e le laupepa fou, ina ia avea ai outou ma tagata e aloaia i totonu o le nu’u.”
“Auā e ta’u mai ai iina le inosia o outou e le nu’u, ae matuā to a lo’u pulou i Ta’ita’i o le Nu’u o Faleatiu, ua le avane le taufa’afefe ae ua tutū i tulaga e tatau ona tutū ai, o Ta’ita’i o le nu’u alolofa.”
Ae to a lo’u pulou i le toa o loto o Alii ma Faipule o Faleatiu, ou te fa’amalo fo’i i le Komesina o Leoleo fa’apea Malu o le Malo, o lo o feagai pea ma tiute faigata nei, o tiute lava e ma’imau ai le ola, a’o leoleo o alii ma tama’ita’i ia o le Malu o le Malo, ua tauto i le latou galuega, mo le puipuia o le tatou atunuu.
“E tele tulaga ia e feagai ma i tatou, aemaise ai o le taumafaiga i le puipuiga o le soifua maloloina, a’o lea fo’i e fa’afeagai ma tulaga ia ogaoga ma le mata’utia.
