TOFU FALEMA’I UMA I LE ATUNUU MA FOMA’I TUMAU
Tusia: Tusiga Taofiga
Ua tali le Malo i talosaga a le atunuu, e ala i le i ai o ni foma’i tumau e galulue ai i falema’i fa’aitumalo i Upolu ma Savai’i, mo le vaaia o ma’i e aga’i ane mo se fesoasoani i so’o se falema’i latalata ane.
Ua auina atu nisi o foma’i e galulue tumau ai i falema’i fa’aitumalo, e fa’a’iti’itia ai le so’ona feoa’i mamao o le atunuu, aga’i i le falema’i i Tuasivi po’o Moto’otua foi.
Saunoa Tuilaepa Sailele Malielegaoi, Palemia o Samoa, o lenei fa’ai’uga o le a fesoaosani tele i le toe lalagaina mai o Komiti Tumamā a Tinā i Afio’aga ta’itasi, aemaise ai o le vave tali atu o le Soifua Maloloina i gasegase ogaoga e mo’omia ai le fesoasoani vave i le 24 itula o le aso mo le fitu aso o le vaiaso.
O suafa nei o Foma’i ma Falema’i o le a galulue ai;
Saunoa Leausa Dr Take Naseri, Ofisa Sili o le Matagaluega o le Soifua Maloloina e fa’apea;
“O le tasi lea o fa’avae ma ta’iala a le Malo, ma lona naunauta’iga ina ia toe fo’i a lo tatou atunuu i lona soifua maloloina lautele, e pei o le mea lea ua i ai, ua fa’afou uma tatou falema’i i totonu o le falema’i ona fa’atali lea seia omai ma’i i le falema’i, tutusa lelei ma le faleoloa, e uma loa ona fai, ona fa’atoa fa’atalitali loa lea o tagata e omai e fa’atau ai.”
“A omai la nisi o gasegase, e matuā tigaina lava, e faigata fo’i la le vaaiga a’o le vaai fa’alesoifua maloloina lautele lea (public health), o le puipuia i lona tulaga taugofie e vaai ai ma’i.”
“O le aogā fo’i lena o le o i tua o foma’i, e le taugatā ai le auaunaga, ae pei ua fa’anatinati i le taimi lenei, pe a o tatou vaai i le misela ua mavae atu nei, na matuā paū ai lava le faiga o tui puipuia o tagata, o le tasi lea o puipuiga lautele e tāua.”
“A’o lea fo’i ua tula’i mai lenei fa’ama’i tele, o le Koviti 19, lea tatou te leiloa po’o a āuga o lenei fa’ama’i auā e le’i o’o mai lava i Samoa, o lea fo’i tatou te to’a filemu auā o lea e le’i alia’e se gasegase, a’o lea fo’i e vaai i le lumana’i, e i ai fo’i le taimi e tatala ai femalaga’iga i le va o tatou ma i si atunuu, e i ai malaga a va’alele, ona toe ulufale mai fo’i lea o i si tagata i le atunuu.”
“A omai fo’i la ma aumai se i si ma’i, o le fesili la, po’o le a se tatou tali atu, o lona uiga o vaega uma ia o le tali atu a le tatou Malo mo nisi fa’ama’i e o’o mai, o le tatou o e tapena nu’u i tua, auā e le fa’apea e sau le fa’ama’i ae fa’apea mai, tatou o i Apia la e tele mea i Apia mo togafitiga ae tia’i Savaii, tatou o i Leulumoega e lata mai, ae ‘aua ne’i toe alu se i si i le falema’i fa’aitumalo lena ei Lalomanu.”
“O lea fo’i e taumafai e fa’aleleia falema’i ma fa’atotoga ina ia mautinoa le atoatoa o auaunaga uma e ofoina atu i le atunuu, e tali atu ai pe a i ai se ma’i tupu i totonu o Afio’aga ma Itumalo lea e i ai falema’i fa’aitumalo, lea ua tapena i ai foma’i.”
“Ae a alualu fo’i ae maua se tali e tatau ona faia ni tui puipuia o lenei lava ma’i – Koviti 19, a’o lea ua mautū tagata i tua i falema’i nei, latou te fa’aitnoina galuega nei, o le lautele lea o galuega a le Malo o lo o faia nei, ina ia mafai ona tofu a le falema’i fa’aitumalo ma lana foma’i, o tausi soifua ma ana mea faigaluega.”
“E i ai lava le tulaga e le mafai ai ona togafitia i tua nisi ma’i, pei o le fa’ata’ita’iga o le Koviti 19, o le 80% o tagata e le tigaina e le ono mana’omia le taofia i le falema’i, o le 15% e ono taofia, a’o le 5% e ono tigaina, e tatau ona ave e taofia i le ICU, o le vaaiga la lea, e tatau ai lava ona fa’atino i tua i falema’i fa’aitumalo nei, le siakiina o le 80% lea, a i ai fo’i ni ma’i tigaina e le tigaina tele, e mafai fo’i ona taofia ai, a’o le 5% lava pasene pe tu’uina mai loa i Moto’otua po’o Tuasivi fo’i.”
“O le tapenaga lautele lena, auā o lea ua tatou vaai atu i atunuu e mamao, e tasi le aso, ae ua fia 100 tagata maliliu, o lea fo’i la ua tapena aga’i i ai le tatou falema’i tutotonu lea ei Moto’otua.”
“A’o le tāua o le vaai lea a le Malo, e le’o nofonofo a’o lea e aga’i lava i luga ana galuega mo le puipuiga, auā ia manatua e le na’o le tasi ai se fa’ama’i, ia o’o mai se i si fa’ama’i, a’o lea ua mautu uma auaunaga mo le tautuaina o le atunuu lautele.”
“O le fa’amoemoega tele fo’i lea ua i ai, ia toe fa’amalosia le faigapa’aga ma nu’u ma itumalo uma i Samoa, e i ai lava le lagona foi lea i nai o tatou tagata, o le latou falema’i o le latou foma’i o latou tausi soifua o lo o tautuaina i latou, e fa’apena lagona tāua e maua mai i le faigapa’aga lenei.”
“O le tasi lena tulaga e ‘ese le malosi ai le tatou atunuu i le tu ma le aga fa’asamoa i o tatou tagata, pe a o’o ina mafuli e opogi se fa’amoemoe, talitonu o se galuega e tatau ona fai i le vaiaso e uma lava i totonu o le lua aso pe a loto tasi uma i ai tagata Samoa e fa’atino loa.”
“O lea fo’i ua vaaia i le taimi nei, ua to’atele foi nisi tagata Samoa ua aga’i malie atu lava ma toe nonofo ai i aiga i nu’u i tua.”
“O le agaga atoa lena lea ua taumafai ai le Matagaluega, ina ia nonofo foma’i nei o le a galulue i falema’i ta’itasi nei, ia nonofo mo le 24 itula, o le a le taimi o le po e i ai le gasegase a ia mafai ona tali atu i ai, auā o lea fo’i tatou te vaai a tigaina le ma’i e tau tuli mai lava Apia nei.”
“Tasi lena tāua o le fuafuaga lenei a le Malo, ina ia ausia uma e le atunuu le auaunaga tau soifua maloloina i so’o se taimi o le aso, i le auaunaga ma ni mea e mana’omia, aemaise i le soifua maloloina.”
“O atunuu uma lava e lē tai tai lava, o le taumafaiga fo’i a le tatou Malo lea e i ai, e fua lava i luga o tatou galuega fai, e le mafai ona sau le foma’i fa’apea mai, o a’u lea ou te fia alu ou te foma’i tipitipi, ou te fia foma’i tipitipi, o lona uiga e le fa’apea e vaai atu le Malo e to’a 10 foma’i tipitipi lea ua i ai a’o lea fo’i o le a toe fa’a’opo’opo atu ma le isi, a’o lea e mana’omia se i si e alu e foma’i fatu, o lona uiga e le tu’una la e le Malo le galuega e tatau ona fai, ae tatau ona galulue malosi ina ia i ai se tatou foma’i fatu, e taumafai fo’i e fa’ailoa i foma’i nei, ina ia onosa’i ma fa’amalolosi mai e tauave i si tomai tau fa’afoma’i ona o lea e mana’omia tele.”
“O le tele o le galuega lenei, e tau leai sau filifiliga to’atasi e faia, e tatau lava ona e alu i le tulaga ma le auaunaga o la e mana’omia, auā manatua o le ala lena na afua ai ona tu’uina atu e le Malo avanoa sikolasipi e ao’oga ai ma le talitonuga ina ia omai e galulue ma tautua Samoa, e leai se Malo i le lalolalgi e ave avanoa e ao’oga ai, ae omai feofeoa’i solo, aemaise lava fanau a le Pasefika.”
“E to’afitu tamaiti foma’i o lo o fai a latou galuega fa’afoma’i fa’amasani i totonu o le falema’i i le taimi nei, e i ai le talitonuga a sologa lelei lava tatou aoga fa’afoma’i ia e lua o lo o i ai nei, e tatau lava ona maua ni foma’i se 20 e fa’a’opo’opoina i tausaga ta’itasi, o le matuā manaia lava.”
