TAOTAOMIA AIGA MA AFIO’AGA ONA O LE FA’AVAE; LEALI’IFANO
Tusia: Asenati Taugasolo Semu
“Aua a leai se aiā fa’asuli ma aiā fa’a aiga potopoto i totonu o le Fa’avae, e lē Samoa le Fa’avae, e palagi le Fa’avae mai lava i le amataga,”
O le finagalo lea o Leali’ifano Dr. Iopu Tanielu o ia o le Sa’o o lona aiga ma le afio’aga o Auala i Savai’i. E le gata i lea a’o Leali’ifano o se alii Fomai fa’amauina ma a’o se Loia foi.
O le taofi o lea tamali’i ua fa’aleoina e lagolago ai I le Tulafono Tau Fa’aofi mo le teuteuina o le Fa’avae a Samoa 2020, ma suia ai le fa’atautaia o galuega fai a le Fa’amasinoga o Fanua ma Suafa lea o i luma nei o le laulaufono a le Palemene.
“Ua uma ona ave so’u manatu i le Asosi a Loia e uiga i le matuapu ona o a’u o le matai sa’o, ua uma ona ou fai i le Preresetene o le Asosi a Loia o lea e tau su’e so’u avanoa ou te molimau ai i le Komiti a le Palemene pe a o’o i le taimi e valaau mai ai.
“Ou te molimau i le tulaga o a’u o le matai sa’o o le aiga, ma o le matai sa’o o le afio’aga, ma ua silia ma le 40 tausaga o o’u matai.”
“O le mea o lo o atugalu ai lo’u mafaufau mai lava i le amataga ina ua ou matai, ma ou sau e fai fa’amasinoga o lo matou aiga, i fanua ma suafa, o le aiā fa’a sa’o ma le aiā fa’a aiga potopoto. O mea ia e lua sa ou vaai lava i ai i taimi na amata ai ma fa’asolo mai ai lava i le tausiga o lo’u aiga ma nu’u, fa’apea le itumalo, e pei o mea ia e tūtā’ia ai lata vaai i Fa’amasinoga o Fanua ma Suafa.”
I lona tulaga fa’a Loia, na saunoa ai Leali’ifano, i le tāua o le amanaia o le aiā fa’a sa’o ma le aiā fa’a aiga potopoto i totonu o le Fa’avae, e fua i ai fa’ai’uga a le Fa’amasinoga.
“Taimi lenei ua avea a’u ma Loia, o le fa’afitauli tonu lava lea, auā na ou i ai i luma o le Fa’amasinoga Maualuga e fai ai fa’amasinoga o mataupu nei tau Fa’avae. Mataupu ia e aumai mai lalo o le Fa’amasinoga o Fanua ma Suafa for judicial review (Fa’amasinoga Toe Iloilo) e toe silasila i ai le Supreme Court (Fa’amasinoga Maualuga).
“E pei o la’u vaai, o le Article 9 o le Faavae, e le o aofia ai totonu se aiā fa’a aiga potopoto (communal right). A o’o la ina fai fa’amasinoga ma fai finauga ia, e taotaomia lava matou i le finauga ona o le mataupu lea i le Vaega 9 o le Fa’avae.
“Manatua la, o le Vaega 9 o le Fa’avae, o lea fai mai o le Individual Right. A o le popolega lea ou te fia molimau ai i luma o le komiti, o fea la o ta’atia ai le communal right?
“Auā a leai se aiā fa’a suli aiā fa’a aiga potopoto i totonu o le Fa’avae, e lē Samoa le Fa’avae, e palagi lava le Fa’avae mai lava i le amataga.
“Na ona tu’u lava o upu na i luga o le Fa’avae e fa’apea o Samoa e fa’avae i luga o aganu’u ma uiga fa’akerisiano, ae a tilotilo i totonu o le Fa’avae, e leai se fa’amalamalamaga o aumai ai e uiga i tu ma aga fa’asamoa.”
E ui o lona finagalo fa’a sa’o lea e fa’aalia, ae atagia ai lava le silafia e le alii Loia o taualumaga uma o le Fa’amasinoga ma le Tulafono.
“O lo’u lagona to’atasi na o a’u, lea foi ua ou i ai i le Fa’amasinoga ma ou tu i luma o le Fa’amasinoga Maualuga e finau mataupu ia, e taotaomia ai lava matou i le Article 9, Vaega 9 o le Fa’avae.
“A o’o foi la ina toe finau matou i se mataupu, na ona o atu lava e faamalamalama pe na atoa fa’amasino i le taimi na fai ai le fa’amasinoga, ae pe na i ai se fa’amasino e aiga i se isi, ae pe na tu’uina atu lau talosaga i le taimi na tatau ona taunuu ai i totonu o le piliota fa’amauina, ae le taitai ona toe talanoaina le mataupu lea na manao ai ita, lea na faaletonu mai lalo o le Fa’amasinoga o Fanua ma Suafa. E le toe talanoaina.
“O le mea tonu lenā e ala ai ona ou fa’apea, e lē talafeagai. E lē talafeagai. A o’o fo’i ina aumai le tulaga lea o le a o’o nei i ai le Fono a alii ma faipule, pe a aumai se latou fa’ai’uga, o le fa’aiuga e fai fa’atasi. A leai se communal right, e leai se aiā a matou to’atele i totonu o le Fa’avae.
“Ou te lagolagoina le suiga lea ua i ai nei, pe a fa’apea, e aumai e le Malo le communal right i totonu o le Fa’avae. Ae ‘aua le tuua to’atasi na o ia i totonu o le pili (Tulafono Taufaaofi) lea a le Fa’amasinoga o Fanua ma Suafa, e amanaia ai le aiā tatau a aiga potopoto ma le aiā tatau a le Sa’o o le aiga ma le afio’aga i totonu o le Fa’avae, ona ave lava lea faitalia le Fa’amasinoga o Fanua ma Suafa latou ma fai i ai le fa’ai’uga.
“O lo’u lagona, o i tonu lea e mafua ai le fa’aletonu. Auā ana i ai se matou communal right, le aiā fa’a aiga potopoto ma le aiā faa Sa’o…auā manatua o le Sa’o e filifili e le aiga potopoto, ona alu lea o le Sa’o e fai tiute uma. O le aiga potopoto e puipui i le latou Sa’o, e fa’apena fo’i i le Sa’o ona fai le finagalo o le aiga potopoto.
“Ae a tu atu le Sa’o e fai le mea lea ae fai mai le Article 9 e leai sau aiā ii na o le aiā a le tagata ta’ito’atasi, lona uiga e sau lava le tama’iti’iti fai le fa’amsinoga mālō ona alu lea ae valiano ai matou o aiga potopoto.
“O lo’u lea manatu, ua ou alu so’o foi i luma o le Fa’amasinoga o Fanua ma Suafa i fa’amasinoga tau le aiga ma le nu’u… o’o loa le ina aumai i luma o le Supreme Court, mo le Judicial Review lea, o le matua poloka lava o le mea lea.
“O lo’u manatu, ua ala ona inainā le Malo i le mataupu lenei, ona e leai se avanoa o aiga potopoto ma le Sa’o i totonu o le Fa’avae. Ae ou te le mana’o fo’i la e fa’aopeopea i totonu o le Lands and Titles Bill (Tulafono Taufaaofi o Fanua ma Suafa), leai aumai e tu’u i totonu o le Fa’avae le aiā a le aiga potopoto ma le aiā fa’a Sa’o ona uma a lea.
“O la’u lea tilotilo iai, o le a’ano tonu lava lea o le matuapu lenei. Ua le mafai e nai tagata, ua leiloa po o fea le mea e o i ai, aua a uma mai le Fa’amasinoga o Fanua ma Suafa e lē lelei, ae omai ii i le Fa’avae ae patatū atu e le Individual Right. E leai se aiā fa’a aiga potopoto ma le aiā fa’a Sa’o e leai se mea.
“O le fatu atoa lena o lo’u lagona. O la’u mau e lagolagoina ai le suiga lea ua i ai, ae ave i totonu o le Fa’avae le mea lea o le Communal right.
“Ave i le Fa’avae auā a fai faaiuga a le Fa’amasioga ia refer mai lava i le Fa’avae o lea ua i ai i totonu o le Article 9.
Na saunoa Leaaliifanolevalevale le tatau ona amanaia le finagalo o afio’aga i fa’ai’uga a le Fa’amasinoga o Fanua ma Suafa.
“E tatau foi ona amanaia le i’uga a se nuu auā e collective. O lea ua i ai le communal right mai le aiga e o’o i totonu o le nu’u.
“E i ai foi fa’aiuga a isi nu’u e le talafeagai ma le amiotonu, ae a aumai foi la, o lea i ai le protection i le Invidual right e tali atu ai i le fono a nu’u pe a aumai latou mau e fa’aletonu.
“Lea o le a i ai le communal right ma le individual right, ae ei le Fa’amasino lava le malosi’aga e silasila ma le toto’a ai i fa’aiuga.”
Na matuā fa’amanino e Leali’ifano, o lana molimau fa’a Sa’o e lagolago ai le mataupu.
“Ou te alu ou te molimau o a’u o le Sa’o o lo’u aiga ma o le Sa’o foi o le nu’u. Ou te lē molimau o a’u o se Loia po o se Fomai.
“Ou te alu ia i ai lo’u aiā le communal right. Ia i ai le aiā a le aiga potopoto i totonu o le Fa’avae.
“O la’u submission na ave i le Sosaiete a Loia po o fea o Tulafono ia ua ta’atia ai le mataupu i aiā a Sa’o ma aiā a aiga potopoto (communal right). Pau lena o la’u tala na ave i Loia.
“Ae ua uma ona ou fai i le Peresetene, ou te alu ou te molimau fa’asa’o ae le o se Loia.”
