“ONOSA’I PEA, MA TAUSISI I LE 20 LE PASESE …”
Tusia: Tusiga Taofiga
Ua fautuaina e le Ta’ita’ifono o le Komiti o Fa’alavelave Tutupu Fa’afuase’i (Disaster Advisory Committee – DAC), Ulu Bismarck Crawley le mamalu o le aufai pasi, ina ia to’a pea le tai, ma ‘aua le so’ona naunau i le seleni ona o lea e fai fuafua fa’ai’uga a le Malo, i le soifua maloloina lelei o Tagata lautele uma i Samoa.
O le tali lea a Ulu, e tusa ai ma le fa’aseā a nisi o le aufai pasi, i le gau o a latou femalaga’iga ae na’o le ta’i 20 le pasese a le pasi e mafai ona feavea’i i lana malaga e tasi.
Saunoa Ulu e fa’apea;
“O le measili o lena ua tu’u atu ai le avanoa e saili ai ni seleni e ola ai le pisinisi, auā e le fa’atusa le tulaga mo’omia e latou o se seleni, pe a ono afāina soifua o o tatou tagatanuu i le ono alia’e mai ai o lenei fa’ama’i.”
“Tele o i si pasi, e le’o usitaia lava le aiaiga o le Poloa’iga a le Malo, o i si pasi e avatu lava le tapu ia 20 le pasese, ae ova lava le pasese, ua fai mautinoa lava ma le talitonuga e le’o maua latou, a’o le itu tāua, o le fa’amamafa a le Malo, e lē pito tasi, e tatau fo’i ona silasila i le soifua maloloina o tagata lautele.”
Na fa’ailoa fo’i e le Ta’ita’ifono, ia onosa’i ma maua pea le to’ovae i le mamalu o le aufai pasi, atonu e i ai se taimi e toe tatala uma ai tapu o lenei Poloa’iga, ona toe fo’i lava lea o Samoa i le tulaga masani e pei ona i ai muamua, ma fa’amalieina ai loa mana’o o le aufai pisinisi mo tupe maua i aso ta’itasi.
Na fa’amanatu fo’i e Ulu i ‘ai latou nei, e lē na’o le aufai pasi o lo o mafatia i lenei fa’ama’i mata’utia, ae o lo o a’afia uma ai ma pisinisi ma le tamaoaiga o le atunuu ma le lalolagi atoa.
O le fa’aiuga o le vaiaso nei o le a mae’a ai le malosi’aga o le Poloa’iga o lo o fa’amalosia i le taimi nei, ma o le a toe fa’alauiloa e le Malo, pe toe fa’aauau lenei Poloa’iga mo nisi vaiaso fa’a’opo’opo pe o le a tatala nei loa vaega uma e aofia ai ma femalaga’iga fa’avaomalo i le va o Samoa ma i si atunuu o le lalolagi.
