(OFISA O LE SO’OUPU A LE MALO); O le a amata i le Aso Lulu 15 Aperila ona faia faigamalaga a vaa laupasese ile va o Upolu ma Savai’i, peitai e iai ona tu’utuuga e aofia ai le faataua ole malu puipuia o tina ma tama matutua.
O se tasi foi o teuteuga fou ua faatulafonoina o le toe tatala lea o le auaunaga a pasi la’u pasese ma e iai foi tu’utuga e tatau ona mulimulita’ia.
E le gata I lea ua fa’amaonia itula e tatala ai faleoloa Supamaketi, Maketi o i’a ma Maketi mo fefa’atauaiga o fua o fa’aele’eleaga ae e iai foi tu’utu’uga.
Ole oto’otoga lea o teuteuga fou ua faatulafonoina o le Poloaiga o Faalavelave Fa’afuasei mo le Koviti 19 (Coronavirus) ua faatulafonoina e le Ao Mamalu ole Malo, le Tuimaleali’ifano Va’aletoa Sualauvi II ile afiafi nei.
1. Femalagaiga Faalotoifale i Vaa:
i. Tatala femalagaiga mo tagata lautele, vagana ai tagata matutua ua 60 tausaga pe sili atu ia usitaia pea tapu i lalo o le poloaiga 8 (Falema’i, ma’i, tausima’i ma siigama’i). Afai e malaga le au matutua (penisione) ona o nisi mafuaaga, ona totogi lava lea e le tagata lona pasese o le vaa, e lē faaaogaina ai le ID penisione e malaga fua ai;
ii. Le tatalaina o femalagaiga o vaa i le va o Upolu ma Savaii mo aso e 4 o le vaiaso e aofia ai le Aso Gafua, Aso Lulu, Aso Faraile ma Aso Toonai mo faigamalaga masani. O le aofai o pasese o vaa o loo auiliili atu i lalo:
1. Lady Samoa III-100 pasese (e lē aofia ai avetaavale)
2. Lady Naomi-60 pasese (e lē aofia ai avetaavale)
3. MV SSC40 ma le Fotu o Samoa e 20 pasese (e lē aofia ai avetaavale)
iii. Le tapu ona toe feoai vaa i le va o Upolu ma Savaii i le Aso Sa;
iv. Le faamamaluina o le 2 mita le va o tagata (social distancing) ma le aofai talafeagai o pasese (faataitaiga: o le vaa lau pasese e 200 le aofaiga o le pasese masani, ae ua tuuitiitia i le 60 le aofaiga o le pasese).
2. Maketi ma Faleoloa Supamaketi:
i. Le tatalaina o itula faatapulaa mo maketi ma supamaketi (markets and supermarkets) uma mai le 6:00 i le taeao i le 6:00 i le afiafi. O maketi uma e aofia ai (Maketi Savalalo, Maketi Fugalei, Maketi Salelologa, Maketi Vaitele, Maketi Taufusi, e tapunia i le Aso Sa e aofia ai ma le Maketi o I’a i Savalalo, Vaigaga, Fasitoo Uta, Afega ma isi nofoaga o loo faatauina ai I’a.
ii. Le taimi faatapulaa e tatalaina ai supamaketi (supermarkets) i Aso Sa mai le 3:00 i le aoauli i le 6:00 i le afiafi.
3. Pasi:
i. Le tatalaina o femalagaiga a pasi la’u pasese ae na o le 20 le aofaiga o le pasese faatulagaina e mafai ona tauaveina. E faamuta malaga mulimuli uma a pasi i le itula e 5:30 i le afiafi;
ii. Le tapu ona toe feoai pasi i le Aso Sa;
iii. Le unaia e le au faipisinisi pasi, le faamamaluina o le 2 mita le va o tagata (social distancing) ma ia tausisia le aofaiga o pasese i le 20 tagata.
4. Faleaiga:
i. Le tatalaina o faleaiga (restaurants) mai le 6:00 i le taeao seia oo i le 9:30 i le po;
5. Aufaigaluega a le Malo:
Ua taoto atu i le Komisi o Galuega a le Malo e taga’i i suiga talafeagai o taimi faigaluega ma tiute o tagata faigaluega a le Malo.
O lenei Poloaiga ua amata faamamaluina ile aso 15 Aperila 2020 ma ua toe lomia i lona atoaga mo le silafia ele atunuu;
1. Vaiaso Anapogi ma le Tatalo:
Ia faamamaluina e aiga uma o Samoa, le vaiaso anapogi ma tatalo mai le Aso Sa 22 Mati 2020 i le Aso Sa 29 Mati 2020, mai le 6.00 i le taeao seia aulia le 12.00 i le aoauli.
2. Femalagaiga Faavaomalo vaalele ma vaa a lalo:
(1) Sei vagana ni tulaga faanatinati e tatau ai ona fa’atino i luga o le Faamaoniaga a le Kapeneta, e tapunia femalagaiga faavaomalo i vaalele e amata faamamaluina i le 12.00 i le taeao o le Aso Tofi 26 Mati 2020.
(2) Ua tapu le toe ulufale mai o soo se ituaiga vaa sei vagana ai:
(a) vaa oloa ma vaa suauu; ma
(e) vaa fagota mo le la’u ese o a latou uta (offload) ma le utuina (refuel) mo se vaitaimi e faamaonia e le Kapeneta, seia iai se isi faaaliga;
(i) ma mo nisi mataupu e faamaonia e le Kapeneta pe a moomia i luga o tulaga faanatinati.
(3) Ua faatonuina le Matagaluega o le Soifua Maloloina ina ia matua faamalosia puipuiga mo tagata uma.
3. Potopotoga i nofoaga faitele:
(1) Ua tapu nei ona toe faia ni potopotoga i nofoaga faitele uma e oo atu ile lima (5) tagata.
(2) O potopotoga i nofoaga faitele e aofia ai tapuaiga, maliu, umusaga, taaloga faitupe, aso fanau, reunion ma isi potopotoga uma.
(3) Ua tapu nei ona toe tatala ni fale kalapu, faletifaga ma falepia, e aofia ai ma pa pia i totonu o faleaiga ma fale talimalo, ma soo se ituaiga faafiafiaga uma e ono tumutumu iai tagata.
(4) Ua tapu nei ona toe tumutumu tagata i nofoaga o femalagaiga e pei o malaevaalele ma uafu, se’i vaganā o tagata e malaga.
(5) E tatala fale’aiga mo taumafataga i aiaiga nei:
a) mai le 6.00 i le taeao i le 9.30 i le po; ma
e) mo le okaina ma le fa’atau o mea taumafa e taumafa i le fale;
i) e tatau i faipisinisi o fale’aiga ona mataituina ma fa’amamaluina le 2 mita o le vā o tagata (social distancing).
4. Femalagaiga faalotoifale:
Pasi ma Taavale laupasese
(1) Ua tatala le femalagaiga i pasi i lalo o aiaiga nei:
(a) le nā o le 20 pasese fa’ataga mo le femalagaiga i so’o se taimi:
(e) o le malaga mulimuli e tatau ona aga’i ese mai le taulaga ae le’i tāina le itula o le 5.30 i le afiafi;
(i) le tapu le feoa’i o pasi i le Aso Sā;
(o) o faipisinisi pasi uma e tatau ona mataituina ma fa’amamaluina le 2 mita o le vā o tagata (social distancing) i taimi o femalagaiga.
(2) E faataga le faaaogaina o taavale la’u pasese laiti, e i lalo o le lima (5) pasese, ma taavale a aiga pe a moomia.
Vaa
(3) Ua tatala le femalagaiga i tagata lautele i luga o Va’a i le vā o Upolu ma Savai’i i lalo o aiaiga nei.
(a) Mo tagata uma e 60 tausaga ma luga atu, e fautuaina pea le usitaia o aiaiga o le poloaiga 8 (malaga mo se togafitiga matuā mo’omia mo mafuaaga tau soifua maloloina).
(e) So’o se tagata penisione e malaga mo se mafuaaga e i fafo atu o aiaiga o le Poloaiga 8, o le a lē agava’a i le malaga fua i lalo o le tulaga tau penisione.
(i) O femalagaiga i le vā o Upolu ma Savaii, e i lalo o tuutuuga nei.
i. E tapu le fealua’i o se Va’a i le Aso Sā;
ii. O femalagaiga e i le Aso Gafua, Aso Lulu, Aso Faraile, Aso Toonai i taimi masani;
iii. O le aofaiga o pasese o Va’a o so’o se faigamalaga e fa’atapula’a e pei ona ta’ua i lalo:
A. Lady Samoa III – 100 pasese (e lē aofia ai ave ta’avale);
E. Lady Naomi – 60 pasese (e lē aofia ai ave ta’avale);
I. MV SSC 40 – 20 pasese (e lē aofia ai ave ta’avale);
O. Fotu o Samoa – 20 pasese (e lē aofia ai ave ta’avale);
iv. E tatau i le Ofisa o Va’a ona mataituina ma fa’amamaluina le 2 mita o le vā o tagata (social distancing) i taimi o femalagaiga.
5. Maketi ma Faleoloa Supamaketi:
(1) O maketi uma e aofia ai maketi i Savalalo, Fugalei, Salelologa, Vaitele, Taufusi, ma Afega, maketi o i’a ma isi ituaiga maketi i nofoaga faitele:
(a) e faatapulaa itula e tatala ai mai le 6.00 i le taeao i le 6.00 ile afiafi; ma
(e) ua tapu ona toe momoe ai nisi i nei nofoaga i le po.
(2) Ua faatapulaa nei itula e tatala ai supamaketi i le 6.00 i le taeao – 6.00 i le afiafi, se’ia vagana ai le Aso Sā, e tatalaina i le 3.00 i le afiafi – 6.00 i le afiafi.
(3) E tapu ona tatala maketi i le Aso Sā e aofia ai:
(a) Maketi i Savalalo, Fugalei, Salelologa, Vaitele, Taufusi; ma
(e) Maketi o i’a i Savalalo, Vaigaga, Fasitoo-Uta, Afega ma so’o se fa’atauga i’a i autafa o auala; ma
(i) se isi lava ituaiga maketi i soo se nofoaga.
6. Faatau oloa i magaala ma tafaala:
(1) Ua tapu nei ona toe fa’atau ni oloa i magaala ma tafaala ole taulaga i Apia, Vaitele ma Salelologa.
(2) Ua matuā tapu ona toe faatau savali e tamaiti ni oloa i soo se taimi.
7. Aoga:
(1) Ia tapunia uma aoga i Samoa, seia toe iai se isi faaaliga.
8. Falema’i, ma’i, tausima’i ma siigama’i :
(1) Ia faaitiitia le soona feoai, ae maise i latou ua 60 tausaga ma sili atu le matutua, se’i vagana ua mātuā moomia ona vaai se fomai.
(2) Ua matua tapu ona toe ulufale se tagata i soo se falema’i sei vaganā ai, ua moomia ona vaai se foma’i.
(3) Mo le tagata ua taofia:
(a) ua nā o le tasi le tagata tausima’i e faataga; ma
(e) e nā o le toalua (2) tagata e faataga mo asiga.
(4) Ua taofia ona toe auina atu i Niu Sila o gasegase mo togafitiga i lalo o le Polokalame masani le Malo, seia toe iai se isi faaliga.
9. Aiaiga mo galuega a le Malo:
(1) Ia faatino e le Komisi o Galuega a le Aufaigaluega a le Malo, (“Komisi”) ni aiaiga e alagatatau ona faatino mo tagata faigaluega a le Malo, e faitiitia ai le ono pipisi o le fa’ama’i e pei o le galulue mai i le fale e faaaoga ai initaneti.
(2) O aiaiga e faataatia e le Komisi, e aiaia uma ai Ofisa ma Matagaluega a
le Malo.
(3) Ua taofia uma malaga faalemalo i atunuu i fafo seia toe iai se isi faaliga.
10. Tiute o le Matagaluega o Soifua Maloloina:
Ia faatinoina e le Matagaluega o Soifua Maloloina le unaia o polokalame falauiloa o le puipuiga o le pipisi o le fa’ama’i o le Korona Vairasi 19, mo le nofo silafia o le atunu’u.
11. Malosia’ga o le Matagaluega o Leoleo:
Ua tuuina atu ile Matagaluega o Leoleo le malosiaga e faatino ai le mata’ituina o lenei Poloaiga.
12. Malosiaga faapitoa o faauluuluga o Matagaluega:
(1) Ua tuuina atu le malosiaga i faauluuluga o Matagaluega ma Ofisa uma o le Malo, o loo iai ā latou malosiaga fa’aletulafono e faatino ai ia malosiaga faaletulafono, faapea ai, malosiaga o faauluuluga e faatino ai Fuafuaga Mamao a le Malo ile tali atu i le Korona Vairasi 19 (Response Matrix).
(2) E mafai e le Kapeneta ona faia Tulafono Faatonutonu poo tulafono laiti mo le faatinoina o gaioiga uma e Ofisa a le Malo mo galuega e tatau mo le soifua saogalemu o tagata, ma mo le tausiga o le nofo filemu.
13. Pepa faailoa o le Solia o se Poloaiga Faalavelave Faafuasei
(1) E mafai e leoleo ona tuuina atu le Pepa Faailoa o le Solia o se Poloaiga i soo se tagata ua solia aiaiga o Poloaiga ua faataoto i totonu o Poloaiga mo Faalavelave Faafuasei.
(2) O Pepa Faailoa i lalo o lenei poloaiga e tatau ona faamaonia e le Komesina o Leoleo.
(3) Soo se tagata ua tuuina atu i ai se Pepa Faailoa o le Solia o se Poloaiga, e mafai ona ia totogi le sala tupe ua ta’ua i lea Pepa Faailoa, i totonu o le 24 itula talu ona tuuina atu iai le Pepa Faailoa.
14. Faasalaga
(1) E solitulafono le tagata e lē usitaia Poloaiga uma ua taua i luga, ma o faasalaga nei:
(a) sala tupe:
(i) mo tagata ta’itoatasi, $200 mo le solitulafono muamua, ma le $500 i aso ta’itasi e faaauau ai lea solitulafono; ma
(ii) mo faalapotopotoga faatulafono, $5,000 mo le solitulafono muamua, ma le $7,000 i aso ta’itasi e faaauau ai lea solitulafono; poo le
(e) taofia i lalo o le vaaiga a Leoleo e lē sili atu i le 3 masina; poo le
(i) taofia i lalo o le vaaiga a Leoleo ma le sala tupe i lalo o le parakalafa (a).
(2) O le totogiina o se sala tupe atoa i lalo o lenei poloaiga, o le a lē molia ai se tagata i se faamasinoga o soligatulafono mo le faasalaga i lalo o le Pepa Faailoa o le Solia o se Poloaiga i lalo o le poloaiga 13.
(3) A faamaonia le solitulafono a se tasi i lalo o nei poloaiga i luma o se faamasinoga o soligatulafono, e mafai ona faasala i se sala tupe e le sili atu i le $10,000 poo le fale puipui e lē sili atu i le 12 masina, poo faasalaga uma e lua.
15. Komiti Fautua – Mataupu 108
O le Komiti Fautua ua faatuina i lalo o le Mataupu 108, e puipuia mai i ni tagi faaletulafono e ono tulai faasaga i le Komiti i le faatinoina o tiute fai i lalo o le Mataupu 108.
16. Taualumaga
(1) Mo le nofo sauniuni mo se tulaga ogaoga mai auga o lenei faamai Korona Vairasi-19, ia mafai ona faataatia ese Tulafono o taualumaga a le Palemene ma le Kapeneta, ina ia mafai ai pea ona faia ni faaiuga tatau mo le atunuu.
(2) Mo faaiuga tatau, o poloaiga i luga e le taofia ai ni taualumaga faanatinati o le Palemene ma le Kapeneta i lalo o malosiaga o le Tulafono Faavae.
17. Faatupeina:
O le faatupeina o fuafuaga a le Malo i lalo o lenei Poloaiga e faatupeina mai vaegatupe talafeagai a le Malo.
Ua soloia le Poloaiga Fa’alavelave Fa’afuase’i Numera 7 o le aso 9 Aperila 2020.
