TALAFEAGAI TAPU O MALIU, SAOFA’I MA I SI POTOPOTOGA
Tusia: Taunuuga Toatasi
O lo o lagolagoina malosi e le Afio’aga Vailele – Uta le fa’ai’uga a le Malo, ina ia tumau pea tapu mo maliu, fa’a’ipo’ipoga, saofa’i ma isi potopotoga e masani ona tumutumu ai tagata.
I le fa’a’opo’opo ai o le i si fa vaiaso mo le Poloa’iga o Fa’alavelave Fa’afuase’i Matuia mo le Koviti 19, seia aulia Iuni Aso 02, 2020, na fa’ailoa ai e le Sui o le Nu’u o Vailele – Uta ia Tuioti Farani Oloapu, o se itu lelei lea, e alia’e ai ni suiga lelei e fa’amāmā avega i aiga i fa’alavelave fai.
I totonu o le Poloaiga o lo’o manino ai, le tapu ona faia o ni potopotoga i nofoaga faitele e sili atu i le lima (5) tagata mo fa’amoemoe nei:
maliu, saofa’i, aso fanau, fa’aipoipoga, fa’atasiga aiga (reunion); ma fa’aulufalega po’o le umusaga.
Saunoa Tuioti e fa’apea;
E ‘ese ma le matagofie o le fa’ai’uga lenei a le Malo, ina ia a’oa’oina ai mafaufauga o tagata Samoa, i le aogā o le fa’amāmā avega e lē tigaina ai i ni saoga tetele e fa’atino i lea taimi i lea taimi.
“Matua’i talafeagai lelei le tapu a le Malo mo vaega ia, a’o se faamāmā avega fo’i lea mo aiga uma o le atunuu.”
“Tatou vaai i le tulaga mafatia e o’o i ai le tele o aiga i taimi o fa’alavelave fa’apenei, peita’i i le taimi nei, e mafai lava ona kale ma le alaisa e kuka mo se maliu, a’o fa’aipoipoiga fo’i i le leai o ni valaaulia, a’o saofa’i fo’i i le fa’aitiitia o tupe alu.”
“Ua 100% le manaia o le tapu lea, ona o le alofa o le Malo i aiga, auā o le vaitau lenei, o lea tatou te i luga o le Poloa’iga o Fa’alavelave Tutupu Fa’afuase’i, ma o le to’atele o tagata ua leai ni galuega e o’o lava i tatou fanau o lo o aumau i atunuu i fafo,” o le fa’a’opo’opo lea a Tuioti.
“Afai e fa’alagolago tatou i fanau ma aiga o lo o i atunuu i fafo mo fa’alavelave fai, talofa, o le avega mamafa.”
Ae i le saunoaga a le Palemia, Tuilaepa Sailele Malielegaoi i le polokalame ma le Leitio o le 2AP, i le vaiaso ua mavae na ia fa’amanino ai e fa’apea;
“E tumau pea le tapu o potopotoga to’atele nei, ona o le vaai mamao a le Malo, ia malu puipuia pea Samoa mai le ono a’afia ai i le Koviti 19.”
“I aso ua tuana’i e tele lava ona fa’apea se tina matua o le aiga, ia tausi lelei le pua’a le la mo le lauava o Pai poo Lafai. E tasi ai a lea o le puaa, pe ave se si’i e tasi le pua’a tasi le ietoga.”
“A’o le tulaga lea ua i ai, ua nonofo lava tatou ma fa’amatitiva tatou”.
“I tulafono uma lava a le Atua lea na aumai, e tasi lava le auga o le ‘Alofa’.”
