“UA LEVA NA TOE FIA FO’I TAMAITI I LE AOGA…”
Tusia: Taunuuga Toatasi
“Ou te molimau atu o a’u o le Pule Aoga, ua leva ona toe fia fo’i nai fanau i le aoga.”
O se molimau lea a le Uluaoga a le Aoga Tulaga Lua a Faga, Savaii ia Tuala Ioane Seali’imalietoa, i lana vaai i le ulua’i aso na toe tatala ai a’oga mai le taofia ai ona o le Poloa’iga o Fa’alavelave Fa’afuase’i Matuiā mo le Koviti 19.
I le molimau a faiaoga o lea aoga, na fa’ate’ia ai le latou vaai, i le usu atu i le taeao o le Aso Gafua, 04 o Me, 2020, ua leva ona fa’atali mai mātua sa aga’i atu e momoli atu fanau i aoga.
Saunoa Tuala i le feiloa’iga ma le Savali e fa’apea;
O le fa’ailoga lea, e ta’u mai ai i faiaoga, ua leva ona toe fia omai nai fanau i le a’oga, fa’atasi ai ma le naunau o mātua ina ia una’i mai fanau ia toa’aga i aoga.
“E 225 le aofa’i o le aoga atoa lenei, ma e to’avalu (8) faiaoga e aofia ai ma a’u (Pule Aoga).”
“O le taimi nei o lo o mulimulita’ia lava aiaiga o le Poloa’iga ua tu’uina mai e le Malo, e ala i le fa’asoasoa o taimi ma aso mo vasega ta’itasi e pei ona fa’atulagaina mai e le Matagaluega o Aoga, Ta’aloga ma Aganu’u.”
“I le taimi nei mo le fa’amalosia pea o aiaiga o le Poloa’iga, o le mafua’aga lea ua vaevaeina ai tamaiti ma faiaoga i potu ta’itasi ina ia tausisia ai le ta’ilua mita o le va (social distancing).”
“Fa’ata’ita’iga e 30 tamaiti i le vasega e tasi, ona vaevaeina loa lea mo le ta’i 15 fanau i le potu aoga e tasi, ae galulue ai faiaoga e to’alua i le potu aoga e tasi, auā o lea e auaua’i aso o vasega a le fanau ma e fai lava sina tetelē o matou potu a’oga ma o lo o gafatia ai le fa’avāvā o fanau i le ta’ilua mita.”
“E le’o i ai se tulaga ponatia i le a’oa’oina o fanau, auā e ui i le tapunia ai o a’oga i ni nai aso ona o le Koviti 19, peita’i e le’i fa’atamala ai le aiga faiaoga, sa tapena uma meaaoga e o ma le fanau i o latou aiga, e galulue mai ai, ina ia ‘aua ne’i taotaomia le ola a’oa’oina o fanau i lenei tausaga ona o le fa’ama’i.”
“O le ola a’oa’oina o se tasi lea o vaega tāua tele i le va o faiaoga ma tamaiti, aemaise i le fa’amalamalamaina o meaaoga.”
Na fa’ailoa fo’i e le Pule Aoga, o le galuega tele lea a Faiaoga o le a feagai ma i latou i lenei vaiaso atoa, o le lava o le taimi e fa’amanino, fa’amalamalama ma saga fa’amatala atili lesona ta’itasi sa tu’uina atu i le fanau a’o malolo ai mo le Koviti 19, fa’atasi ai ma le soso’oina o lesona o i si mataupu e tatau ona o’o i ai, a’o le’i mae’a lenei kuata fa’alea’oa’oga.
I le tausisia o le soifua maloloina lelei o tamaiti, o lo o fa’atāua ai pea e le Aoga Tulaga Lua a Faga, Savaii, le tapena lelei e mātua o meaai a fanau mai le fale ona avatu ai lea i le aoga.
“E o’o fo’i i faleui (tulou) e fa’aaogā e tamaiti, o lo o tausisia pea le mamā ma le i ai o fasimoli e fa’aaogā e tamaiti e fufulu ai lima.”
“E ui i le tulaga faigata o lo o feagai ai ma Samoa, aemaise ai o le fetu’una’iga o taimi galulue a faiaoga ma nai fanau aoga, peita’i ou te matuā lagolagoina le finagalo o le Malo, lea sa fa’amalōlo ai aoga uma, seia toe fa’aa’e i lenei vaiaso, auā o le upu moni e le natia, e sili le puipuia i lo le tau togafitia.”
O aso nei mo Aoga Amata seia o’o i Kolisi Maualuluga, ua mae’a ona fa’alauiloa e le Matagaluega o Aoga, Taaloga ma Aganuu mo le fa’asoasoaina o aoga a le fanau, e mulimulita’i i aiaiga o le Poloa’iga a le Malo.
Vasega 11,12,13 Mo Kolisi uma:
Vasega 2,4,6,8 mo Aoga Tulagalua uma
Aso Gafua, Aso Lua ma Aso Lulu
Vasega 9 & 10 Mo Kolisi uma:
Vasega 1,3,5,7 mo Aoga Tulagalua uma:
Aso Tofi ma aso Faraile
Aoga Amata
(taatia atu i matua mo le maliega e ave ai lona alo i le aoga i aso ua faailoa atu)
Aso Gafua, aso Lulu ma Aso Faraile
