VAEGA FA’AUPUFAI O LE A TAUVA I LE FAIGA PALOTA
Tusia: Asenati Taugasolo Semu
Ua fa’amanuia le Palemia, Tuilaepa Sailele Malielegaoi i Vaega Faaupufai o le a tauva i le Faigapalota tele a Samoa 2021.
O ia fa’amanuiaga, o lo o fa’ailoa atu ai foi ma galuega tetele ma atina’e ua ausia e le Vaega Fa’aupufai e Puipuia Aia Tatau a Tagata (HRPP).
“Ou te fa’amanuia i ai i Ta’ita’i (o Vaega Fa’aupufai) ma o latou sui Ia manuia tele a tou taumafaiga,” na saunoa ai Tuilaepa i lana polokalame o le 2AP ma le Palemia i le vaiaso ua mavae.
“O matou (HRPP) foi ia, lea foi matou te taumafai matou. O le ala foi lena matou te tilotilo ai i atinae tetele, aua e taua le talitonuina (o la matou vaega) e le atunuu.
O le matou lena campaign, e faavae i luga o galuega faatino. Auā e le aoga le pisa pisa pisa,ae leai ni mea e talitonuina ai, ae le na o upu….
“Lea foi e faagasolo le tausaga lenei, toe tasi lava le matou atinae lea e le i faia, lea o le a agai i ai e amata. Ina ia oo atu i le faaiuga o le tausaga, ona matou o atu loa lea ma faapea o mea ia sa matou talanoa atu ai o le a matou faia, lea ua uma ona matou faia.”
Ae mo le tapena atu o le HRPP mo le faigapalota o loma nei, na saunoa ai Tuilaepa, e tautatala lava galuega.
“A o mea ia ua matou te fuafua i ai, afai e toe aumai le tou faatuatuaga i le HRPP ona matou taumafai foi lea e faatino, ae afai ua see ese lo tou faatuatuaga ia matou, o iina lava o lo o i ai le pule.”
Na saunoa le Palemia, o tofiga o le Malo, e le o ni tofiga o le HRPP, a o tofiga a le atunuu.
“O tofi ia e le o ni matou tofi, o tofi o le atunuu. O tofiga uma e totofi mai le Atua e auala mai le musumusuga lilo ia i latou o le a faia faaiuga o le palota.. Momoli le faafetai ma le faamalo i Vaega Faaupufai eseese o le a taumafai i le faigapalota. O outou māmā na, ia manuia a tou taumafaiga, ia faamanuia mai foi isi a matou tama’i taumafaiga.
“O le atunuu lenei o le atunuu saoloto. E saoloto pati (Vaega Faaupufai) e fai campaign (faatosina). O se mea matasgofie tele ….aua tasi lea mea e faitio ai (nisi tagata), ma faapea mai o le ‘one party state’.
A o le measili ua lima Vaega Faaupufai.”
Ae na faamanatu foi le Palemia, e taua le fai o le Vaega Faaupufai, ae taua foi le galulue mo le atinae o le atunuu.
“E le faapeaa a toatele, ona nofonofo ai lea aua e le aoga le toatele o pati ae moomia le i ai o tagata e lagolagoina. O le tulaga foi ma filifiliga o sui e tamomoe ai, o le tulaga lava lena…e tatau ona fili le sui e talitonuina.
“Ia manatua lelei, o lesi vaega tele e tilotilo i ai tagata, o le faatuatuaina o latou e taitaia, pe talitonuina e tagata. O le mea lena e taua ai a latou foi tapenaga. Ma ia fai ni sui e talitonuina.”
O le HRPP e pei ona saunoa Tuilaepa, e faataua le auai o sui e lagolagoina e tagata palota.
“O le isi lea mea taua, o le vaavaai i sui e ono agai mai ai loto o tagata palota.
“O lea e le i taitai le faigapalota, e leiloa pe oo atu i lena taimi, ua 100 pati ua resitala.”
O Aperila i le tausaga fou lea na faailoa e le Minisita o o lo o gafa ma le Ofisa o Faigapalota, Faaolesa Katopau Ainuu, o le a faia ai le faigapalota tele.
“O le tatou atunuu, o le atunuu saoloto, e pule lava le tagata latou pe faatu sa latou pati, a o lea lava e i ai le saolotoga.”
Ae na fautua Tuilaepa, e taua le tapena lelei o le Vaega Faaupufai, e fua i manaoga ma fuafuaga e atinae ai le soifua ma le tamaoaiga o le atunuu.
