MONOTAGA FA’ALELOTU MA LE PALOTA
Tusia: Tusiga Taofiga
“E tāua lo tatou malamalama i le mafua’aga na tu’u ai totonu o le Tulafono monotaga fa’alelotu, auā o lea fa’atoā tu’u i totonu o le Tulafono o Faiga Palota le monotaga fa’alelotu i le 2015 ina ua mae’a ona fa’ata’atitia tuaoi palota tu taulaga lea na i ai.”
O monotaga fa’alelotu, e le’i leva ona avea ma agava’a o Sui Tauva i le Palota, peita’i o le mafua’aga tonu na tu’u ai lea tautua i le Tulafono o Faiga Palota, e fa’apitoa lava mo Itumalo Tu Taulaga ona e leai ni monotaga fa’alenu’u o faia ai.
Saunoa le Komesina o Faiga Palota, Faimalomatumua Mathew Lemisio e fa’apea;
“O le tulaga lea na i ai Individual Voters o lea na tāua o Samoa Aoao, o lona uiga sa mafai lava ona aumai lou monotaga i Savaii ma nu’u i tua, e fa’amalieina ai manaoga o le Tulafono i lau tautua lea fa’amonotaga.”
“Kosi loa tuaoi o nofoa ia tu taulaga, le mafai loa e sui lea e tauva i tofi o Itumalo tu taulaga, ona fa’aaoga mai monotaga o lo o fai i nu’u o lo o matai ai, ma ua le mafai ona aumai e fa’aaoga i totonu o Itumalo ia ua uma ona tusi.”
“Toe sui loa le tulafono o Faiga Palota i le 2015, tu’u ai loa i totonu ma monotaga i Ekalesia, maitaulia fo’i o le to’atele o sui nei, e nonofo iinei i le taulaga, lolotu iinei, ae to’atele e le’o i ai ni matafale fa’alelotu o lo o omai ai.”ē
“Fa’ata’ita’iga o le ekalesia Katoliko, e i ai nu’u e leai se ekalesia Katoliko, o lona uiga e lē mafai fo’i la ona fa’atino lau monotaga pe a naunau e tumau pea, o lona uiga e lē a’afia ai tagata e leai se latou Ekaleisa i totonu o se tasi o nei Afio’aga.”
“O le mea lena lea ua aveese ai Itumalo tu taulaga, o lona uiga ua tatau ai fo’i ona aveese ma aiaiga ia na fai fa’apitoa mo Sui Tauva ia ei Itumalo Tu Taulaga.”
“Ma o lea ua toe fo’i lava i le mea na i ai, o lou monotaga i totonu o le nu’u po’o le Itumalo lea o le a e tauva mai ai, auā o tofi Faipule o tofi o Itumalo nei, e le’o ni tofi o Ekalesia, o tofi o Itumalo lea e i ai le manaoga lea o le tulafono.”
“Na i ai le fesili na matou fesili ai i nisi o Sui na o’o mai fo’i ia te’i matou i le aveesea ai o monotaga fa’alelotu, ona matou fai lea i ai, afai ua ave’ese monotaga fa’alelotu ma totonu o le Tulafono o Faiga Palota, e le’o fa’asaina ai ona fai lau oe lava monotaga fa’alelotu i totonu o lou nu’u ma lou lava Itumalo.”
“E le’o taofia ma e fai lava lau oe monotaga, e pei o le tulaga lena e tāua ma tatau ai ona iloa lelei le mafua’aga na ala ai ona tu’u i totonu, manatua fo’i o lea ua aveese Itumalo ia Nu’u Tu Taulaga, ua talafeagai ai fo’i.”
“O tofi ia o tofi o Itumalo, na filifilia mai e le Itumalo e ala i le Palota, ae le’o ni tofi tau ekalesia, o le agaga fo’i lena, ina ia ‘aua ne’i nini fa’atasia le ekalesia o mea Paia ma le polokiki.”
“O lona uiga i le 2014 aga’i tua, e le’i i ai i totonu o le Tulafono lenei o Faiga Palota se monotaga fa’alelotu, o iina fo’i la tatou te fesiligia ai tuaa ua mavae na o latou amata fausia tulafono nei, po’o le a le agaga na o latou le tuua ai totonu le vaega lea, o lo’u ia fa’auigaina o le tulaga lena, o le puipui fo’i o nai na Ta’ita’i i mea Paia, ua talafeagai ai lava i totonu o Itumalo Nu’u Tu Taulaga, ona o el tele o matai ia ei totonu o le taulaga, o ekalesia ia na fa’atino ai a latou monotaga, lea ua toe aveesea, o lona uiga e le’o taofia ai lava le aveesea o latou monotaga iinei, afai fo’i o tuā e le’o taofia ai lava monotaga fa’alelotu, ae pau o lea e le’o toe avea ma se agava’a e avea ai oe ma tagata Sui Tauva o le Palota, o lea lava e i ai le tatou mea tuai na sau ai.”
