SI’ITIA ASO E NOFOMAU AI SUI TAUVA I SAMOA
Tusia: Tusiga Taofiga
“Ua si’itia i le 305 aso ua tu’uina mai, e nofomau ai so’o se Sui Tauva i Samoa, ae tu’uina atu aso e 60 i le tausaga e tasi mai le taimi e fa’aulu ai lou suafa mo le Palota, e te alu ai e asi ou aiga, tafao, auai i ni fa’alavelave po’o le asiasi fo’i i atunuu mamao.”
O le suiga lea ua fa’alēaogaina ai le 240 aso sa i ai i le Tulafono muamua o Faiga Palota, o le umi lea e tatau ona nofomau ai se tasi e fuafua e fia tamo’e mo le tofi o Itumalo i le atunuu.
Saunoa le Komesina o Faigapalota, Faimalomatumua Mathew Lemisio e fa’apea;
“O le tasi lenei o suiga na fa’atuina mai, e i ai su’esu’ega ma na i ai mataupu na o’o i luma o le Fa’amasinoga, ma na taga’i ai le Fa’amasinoga i le agaga, na ala ai ona fau e le Palemene le 240 aso nei.”
“E māua mai se tasi o mataupu sa iloiloina e le Fa’amasinoga, o le agaga o le Palemene, so’o se matai Samoa e fia tauva i tofi Faipule o le Palemene a Samoa, e tatau ona nofomau i totonu o Samoa.”
“E i ai le talitonuga i le 240 Aso, e pei ua le amanaiaina ai le agaga na naunau ai le Palemene ina ia nofomau ai so’o se tasi e fia tamo’e i le Palota i totonu o Samoa.”
Saunoa fo’i Faimalomatumua, i lea 305 aso o le nofomau e i ai ma ona aiaiga fa’apitoa e mafai ai ona e tuua Samoa i mafua’aga tatau;
“Manatua fo’i o lea e i ai ma aiaiga, e mafai ona e alu e vaai le foma’i, afai o se fono fa’alemalo po’o se fa’alapotopotoga fo’i o lo o e galue ai o lo o resitalaina i Samoa nei, o lona uiga e lē mafai ona apoina ai oe i aso nei.”
“O lea la e i ai le 305 aso ua tu’uina mai e te nofomau ai, ae tu’uina atu aso e 60 i le tausaga e tasi mai le taimi lea e fa’aulu ai lou suafa e te alu ai e asi ou aiga pe te tafao, fa’alavelave po’o le asiasi fo’i i atunuu e mamao.”
“A’o le itu pito sili ona tāua o le tatau lea ona i ai se taimi fa’atapula’aina, e nofo ai tagata Samoa e fia tauva mo le palota i Samoa nei, a’o le agaga lena na fa’atino ai le fa’ai’uga lenei a le Palemene, ia nofomau le tagata iinei Samoa.”
“I le 240 aso i le taimi lenei, pei ua le mamafa tele, ua faigofie ona feoa’i tagata i le taimi lenei, ona ua la’ititi le lalolagi, a’o le agaga ia amanaina le tulaga na taumafai ai le suiga lenei, ina ia nofomau lea tagata Sui Tauva i totonu o Samoa.”
“O le fuaina la o le tausaga, o le aso lea e te sau ai e fa’aulu mai ai lou suafa, ona faitau atu ai lea o le 12 maisna mo le tausaga e tasi aga’i i tua, fa’ata’ita’iga o le Aso 12 o Oketopa lea e amata ai ona fa’aulu mai suafa o Sui Tauva, ona matou su’esu’eina loa lea, o lona uiga mai le Aso 12 o Oketopa 2020 aga’i tua i le Aso 12 o Oketopa 2019, ua tasi le tausaga, fa’asolo atu ai lea i tua i isi tausaga seia ausia le tolu tausaga na nofomau ai i Samoa.”
“I totonu la o Oketopa 2020 aga’i ia Oketopa 2019, e tatau ona 305 aso na e nofomau ai i totonu o Samoa, e fa’apena fo’i i si tausaga i tua atu ona atoa ai lea o le i si tolu tausaga.”
