TELĒ LE TAIMI E FA’ALAUILOA AI SUI TAUVA MO LE PALOTA 2021
Tusia: Tusiga Taofiga
E ono masina ua si’itia ai le umi e fa’alauiloa aloaia ai Sui Tauva o le a tausinio ile Palota Tele o le tausaga 2021.
I le pasia ai o Teuteuga o le Tulafono o Faiga Palota 2020 i le laulauafono a le Palemene, ua soloia ai le tolu vaiaso sa i ai muamua e fa’alauiloa ai Sui Tauva a’o lumana’i le Palota.
O le mafua’aga na faia ai lenei suiga, ina ia lava le taimi i le atunuu, e iloa ai e le au palota, agava’a, fuafuaga mamao e fa’atino pe a tula’i mai i tofi Faipule, ma le tali atu I manaoga o itumalo pea manuia le taumafaiga e avea ai fofoga taumomoli o itumalo I totonu ole Fono Faitulafono Aoao a Samoa.
Saunoa Faimalomatumua Mathew Lemisio, Komesina o Faiga Palota e fa’apea;
“Tasi lea suiga na alia’e mai i fautuaga na tu’uina mai e le Komiti Fa’a Palemene lea sa iloiloina le tatou Tulafono.”
“O se suiga tāua i le vaai atu a le Ofisa o Faiga Palota, i le fa’agasologa o galuega i le fa’atinoga o Faiga Palota aemaise o le fa’auluina mai o Sui Tauva.”
“O le vaega muamua, o le malosi’aga lea ua toe tu’uina mai i le Ofisa o le Komisi o Faiga Palota, e talia pe tete’e ai se Sui Tauva, lea ua aumai atoa i ‘ai matou le vaega lena, e lē pei o le 2016 lea na ave ai le fa’atuatuaga i Sui Tauva, na’o le pau lava le mea e mana’omia e latou, o le fa’atumu mai o le pepa lea e tā’ua o le ta’utinoga fa’aletulafono, e ta’u mai ai ia matou, e i ai lana monotaga, e tolu fo’i tausaga talu ona nofo iinei.”
“Na maitauina ai i lea faiga e le Ofisa nei, e i ai le vaivaiga o le tulaga lea, ona e le’o telē se su’esu’ega e fa’ataga ai le Ofisa o Faiga Palota ona aga’i e su’esu’e mae’ae’a vaega nei, lea la ua i ai suiga lea.”
“I tua mai o le fa’auluga o Sui Tauva, lea sa maitauina ai le tele o fa’amasinoga na soso’o mai ai, o le faiga tuai e na’o le tolu lava vaiaso e fa’alauiloa ai Sui Tauva a’o le’i o’o i le Faiga Palota, la’ititi o le taimi, telē le pressure i le fa’agasologa o le vaega lenei, o le fa’amautuina po’o ai tonu sui o le a tauva, o le fa’amausaliina o le lolomiina o pepa palota, o le fa’amautuina po’o fea e tu’u ai lea fale palota ma lea fale palota i totonu o le tama’i taimi lenei.”
“E i ai la matou talitonuga, e ono i ai ni mataupu e ono fesiligia fa’aletulafono ai la matou fa’ai’uga lea, pe a o’o ina uma ona fa’aulu Sui Tauva, ma e tatau ona lava se taimi i le matou Ofisa (OEC) ma le Fa’amasinoga e iloilo ai mataupu ia, a mae’a, ona lava lea o le taimi e tapena ai mo le Faiga Palota.”
“O le i si vaega tāua mo le tagata palota, o le lava lea o le taimi e iloa tonu ai, po’o ai le Sui Tauva lea o le a tamomo’e mo le Palota, o le mea lea tatou te iloa nei, e o’o a i le taimi lenei, o lea tatou te fa’alogo i le igoa o ai ma ai lea o le a o e tamomo’e, a’o le telē ia o le lē mautonu i tagata palota, po’o ai tonu o le a alu i ai e palota ai.”
“I le suiga fou lea ua i le Tulafono lenei, e matua’i mautinoa ai lava i le toeitiiti lava atoa le ono masina e le tagata palota, o Sui Tauva ia o le a tamomo’e, ma fa’atino ai loa lana filifiliga sa’o ma le tonu po’o ai o le a palota ai.”
“Manatua fo’i o le i si suiga lea ua tu’u ai totonu, o le fa’atulafonoina tonu lava o le piliota po’o taimi fa’atapula’a e amata ai ona fa’agasolo fa’alauiloa (campaigns) a Sui Tauva, e uma loa ona fa’aulu Sui Tauva, tatala loa ma le avanoa e fa’atino ai campaign a Sui Tauva.”
“A tatou talanoa i Campaign se pei ua masani le fa’alogo a tagata, a campaign loa ua talanoa i le tupe ma meaai, ae leai ma o lea fo’i ua fai e le tulafono auala e tatau ona mulimulita’ia e Sui Tauva, e fa’atino ai a latou fa’alauiloa, i totonu lava o le piliota lea pe a mae’a ona fa’aulu Sui Tauva.”
“O lona uiga o lea ua matua’i tutusa uma le taimi, e ave i Sui Tauva, ma fa’alauiloa ai o latou Sui, aemaise o le lava o le taimi i tagata palota e silafia ai ē o le a tamomo’e, e tilotilo toto’a ai ma maitau, e fua tonu i ai lana filifiliga e fai e ala i le palota, aemaise o le silasila lelei lea i Sui Tauva po’o a ni mataupu ma metotia o lo o fuafua lea Sui Tauva ma lea Sui Tauva e tua i ai lana campaign, a’o le itu pito sili ona tāua ma ua tatou mautinoa lelei, o Sui sa’o lava ia e tauva, lea ua vave fa’alauiloa.”
“O lona uiga o le i si lea vaega lelei ua tatou tilotilo i ai mo le ono masina lea, e fa’amalosia atili ai le fa’agasologa o galuega mo Faiga Palota, e i ai le process lea o le Nomination, Judicial Review pe a fesiligia le matou fa’ai’uga fai ma le fa’atinoga o le Faiga Palota.”
“Manatua o le Aso 09 o Aperila 2021, lea o le a faia ai le Faiga Palota, o lona uiga e tapuni le lola palota i le Aso 09 o Oketopa 2020, tatala le fa’auluina o Sui Tauva e fia tamomo’e mo tofi Faipule o Itumalo i le Aso 12 o Oketopa mo le lua vaiaso.”
“O lona uiga, e tatau ona o’o atu i le vaiaso mulimuli o Oketopa 2020, ua tatou iloa lelei Sui Tauva o le a tamomo’e mo le Faiga Palota 2021.”
