LAGOLAGO E LE SIS TEUTEUGA O LE FA’AVAE
Tusia: Asenati Taugasolo Semu
E le tau fesiligia le lagolagoina e le Faafaletui a le Vaega Faaupufai o le Pulega Aoao Samoa Tutoatasi (Soverign Independent Samoa Political Party(SIS) I teuteuga ole faavae mo le faatautaia o galuega fai ma tiute ole Faamasinoga o Fanua ma Suafa lea oloo folasia nei I luma ole Palemene.
O le taofi ole taitai ole SIS, Fesola’i Logomalieimatagi Toloa o se matai tausi aiga, ma fai nuu mai le Afioga o Faleasiu e tele suiga lelei oloo iai I totonu nei teuteuga ole faavae.
Saunoa Fesolai;
“O Tulafono e tolu o lo o faapena ona silasila totoa i ai i lenei vaitaimi si o tatou atunuu, o lo o i ai vaega lelei lea ou te iloa e aiāina ai foi mataupu a lo’u aiga i tulaga faamatai,” na saunoa ai Fesola’i.
“O lo o i ai le itu lelei e pei ona aiaia nei e le Malo. Lea ua ou maua e faapea, ua fesiligia le tulaga tau sa’o.”
I sona manatu na ia taua ai o aiga Samoa na o le toatasi lava le sa’o, ae ona ola aiga, ua talafeagai le teuteuga ua folasia mai e le Malo.
O le tulaga la i le faatulafonoina o le lima sa’o o le aiga, na saunoa ai Fesola’i, o se tulaga talafeagai lelei.
“Ae o le tulaga tau fuainumera, ona ou faapea lea, e tasi lava le sa’o sa i ai. A o le taimi lenei, ua le tasi, ua le lua, ua le tolu, ua le fa, ua oo atu i le lima sa’o (o se aiga).
“So o se mea lava e faataua e tagata Samoa po o le Malo foi, e ao ona i ai se Tulafono e pola puipui ai. Lea la ua ou manatu, ua lava ia sa’o.
“Ou te lagolagoina le tulaga lea (o le faatulafono o le aofai o sa’o o se aiga), aua a tatou o faapea e tuufau….
“Tatou te iloa lava i fanau, a tuufau le tamaitiiti, e leiloa se mau uiga e sau e faaali mai.”
Ma ua faaalia ai le agaga faafetai o Fesola’i i le Malo ona o le Tulafono ua faatulagaina nei.
“Faafetai ua a’e le tofa ma le faautaga. Ua lima sa’o, ae a tuu ina ia faitalia, e oo lava i le 20 sa’o (o se aiga), e tumu Mulinuu.
“Lona uiga e 15 sa’o e tetee i sa’o e lima. E 12 sa’o e tetee i sa’o e valu. Ona tumu lea i faiga sa’o, ma o le mea lea o le a fai.
“O le mea lea e ao ona silasila i ai le tatou atunuu, e moni lava e i ai mea e faaletonu ai le Malo…e leai foi se Malo e atoatoa, e leai foi se tagata e atoatoa, a o le mea lava e ese lota fia vaai i ai, ia tatou iloa ave le tatou tuualalo ina ia silasila totoa i ai le Malo, ma tuu i tafatafa o le Malo.
“Ou te lagolagoina ua lava le lima o sa’o e saili i totonu o aiga po o ai le e agava. Aua o isi e faapea mai e faa sa’o le suli o lo o nofo i fafo aua e sapalai mai ai le tupe. E faapefea ona fai e ia tiute faa sa’o, e ao ona nofo i totonu o le aiga.”
Na saunoa Feso’ai, e lē a’oaia e Laupua Tamafaiga ae tatau ona tatou mata’itu, ina ia tatou faia mea uma ma le poto ma le alofa.
I le mataupu o Faamasinoga e pei ona teuteuina foi i totonu o nei Tulafono, na faaalia ai foi le lagolago a Fesola’i i le mataupu o le feaiā a’i o Faamasinoga ma le tulaga o le saolotoga o le Faamasinoga o Fanua ma Suafa.
“Sa ou manatu lava ua leva lava ona tutotasi, pe independent a, e le mafai ona feavea’ia mea a Samaria ma Iutaia e tusa ai ma le tulaga lea e i ai le Land and Titles Court (Faamasinoga o Fanua ma Suafa) ma le common law (Faamasinoga o solitulafono)…e ese lava.
“Seiloga la e faapea ua tatou appeal (fai se talosaga toe iloilo) i le Supreme Court (Faamasinoga Maualuga), ona e manaomia se fair trial (faamasinoga tonu). O iina la e mafai ai ona totogi tupe, ma e le laitiiti foi ia tupe, a o lou popolega o a’u o se matai tausi aiga, ou te le manao e faaalu ni tupe ii, pea le mafai e le Faamasinoga Maualuga ona suia ia faaiuga a le Faamasinoga o Fanua ma Suafa).
“So o se matai o lo o saili se vaifofo ina ua uma le Faamasinoga Maualalo, uma le appeal, a o lea lava ta te manatu, o lea e tele le faaletonu. Ona o lo o iai le afaina lea ou te malamalama i ai,
O fea la ou te sulu i ai?
“Lea ua ou faafetai ai ua a’e le tofa ma le faautaga, ina ia fai se Faamasinoga Maualuga mo Talosaga e toe Iloilo e faapitoa tonu lava ile Faamasinoga o Fanua ma Suafa.
“O i e agai suli oloo talosaga le apili e faailoa ai ma ave uma lava i ai mea ia e le i silasila i ai le Faamasinoga Apili ma le Faamasinoga Maualalo.
“Afai e faamaonia e mafai e le Faamasinoga o Apili ale Faamasinoga o Fanua ma Suafa ona suia faaiuga nei, ia e lei mafai e le Faamasinoga Maualuga ona fai, o le mafuaaga lena ou te lagolago ai tulaga nei.”
Na saunoa Fesola’i, tusa lava pe tuu eseese Faamasinoga nei, e leai lava se afaina.
“O lo o i lalo lava o le faamalu e tasi, a ua eseese i latou e gafa ma vaega nei.”
Na saunoa Fesola’i, e le o malamalama pe aisea e le talia ai e nisi le faatulagaga o teuteuga o le Tulafono ua folasia nei.
“Ou te leiloa la po o le a le mea e le fiafia ai i le set up lea, le set up lea…lea ou te sulu i ai ma maua ai la’u faamama avega. O a’u o le matai tausi aiga ma le matai tausi nuu.”
Na fesiligia foi Fesola’i i le mafuaaga ua faatu ai le Faafaletui ale SIS ma ia saunoa ai, o lo o mulimulitai lava i aiaiga i totonu o le Faavae o Samoa, o lo o amanaia ai le saolotoga o tagata uma.
“Viia le Atua ona o le tulaga saoloto o lo o i ai Samoa. Ma le tulaga o lo o tutoatasi. E i ai lava lana Tulafono maualuga o lo o faapena ona taiala uma ai nisi o Tulafono o lo o aiaia ai ma aiāina ai le soifua o tatou tagata Samoa.
“Ae tusa o le mafuaaga ua ala ai ona fausia lenei Vaega Faaupufai, e ese le taua ia te a’u ma ua leva ona ou tapena. Ae sa ou saili lava i se igoa o le Vaega Faaupufai.”
Na faafetaia e Fesola’i le musumusuga a le Atua na aumai ai le igoa o lana Vaega Faaupufai, e atagia ai mataupu loloto ma fuafuaga fai o lo o agai i ai.
O le faia o lana Vaega Faaupufai, e manatu Fesola’i e faailoa ai ana mau ma ona lagona i mataupu, ma tuualalo ai i le Malo, aua o le Malo lava e pulea le atunuu ma faia faaiuga talafeagai.
“Ma e faapena ona fai lo’u tiute faatagata nuu. O le ave o le tuualalo ae pule latou (le Malo) pe faaaoga pe le faaaogaina foi. A o le tulaga lea ua ou manatu ai, sei avatu mea o lea e fausia e le Atua i lo’u loto.”
O le faaaauau pea ona umia meatotino a Samoa ma ana aganuu, o le mau lea a le Vaega Faaupufai e pei ona saunoa Fesola’i.
“O le Vaega Faaupufai lea, o le a focus (taula’i) i Tulafono. O Tulafono nei e li’oli’o i meatotino a Samoa. E li’oli’o i le talitonuga o lo o faapena ona aiāina ma taitaiina ai o tatou tagata ma latou talitonuga.”
O mea ia e tolu na saunoa Fesola’i o le a taula’i i ai le silasila a le latou Vaega Faaupufai ina ia faatumau pea le saolotoga o tagata ma puipui meatotino a Samoa.
“E faapena se manatu. E tele polokalame ua uma ona fausia, ae manaia le auaua’i atu i lea taimi i lea taimi, ina ia nofo uta ai si tatou atunuu i mea o lo o faapena ona fausia i le loto o se tamaitai Samoa, o se matai Samoa o lo o tausi nuu tausi aiga ma tausi foi eleele.”
