SUIGA I LE FA’AMANATUINA O LE TUTO’ATASI O SAMOA 2020
Tusia: Tusiga Taofiga
E fa’ataunuu lava le fa’amanatuina o le 58 tausaga o le Tuto’atasi o le Malo o Samoa i lenei tausaga 2020, peita’i o le a leai ni sauniga tetele fa’apitoa e fa’ataunuuina e pei ona masani ai i tausaga ta’itasi.
O le fa’ai’uga aloaia lea a le Komiti o le Tuto’atasi, ua manino ai le usitaia o tapu o le Poloa’iga o Fa’alavelave Tutupu Fa’afuase’i mo le Koviti 19, ina ia taofiofia ai le so’ona feoa’i o tagata ma tumutumu ai i nofoaga faitele, a’o feagai ai le lalolagi ma puipuiga o le soifua maloloina mai lenei fa’ama’i mata’utia.
O le finagalo o le Komiti o le Tuto’atasi e pei ona fa’ailoa e le Palemia, Tuilaepa Sailele Malielegaoi o ia fo’i o le Ta’ita’ifono i le polokalame ma le 2AP e fa’apea;
“O le a pu’e fa’apitoa mai lava le malelega a lana Afioga i le Ao o le Malo Samoa, Tuimaleali’ifano Va’aletoa Sualauvi II, i lona Maota i Vailele.”
“Mo i si polokalame masani o le sisigafu’a i tausaga uma, e aofia ai savali fa’aaloalo ma fa’afiafiaga fa’aleaganu’u, o le a fa’aaogaina ai fa’afiafiaga o tausaga ua mavae mo polokalame fa’asolo a televise auā maimoaga a le atunuu.”
Ua fa’atino e le Malo lenei faiga, ina ia taofia ai le so’ona feoa’i solo o tagata, i lea aso fa’apitoa, pe afai ae fa’ataunu’u pea polokalame masani o le tuto’atasi.
Na fa’amalūlū fo’i le Palemia i nai Afio’aga sa valaaulia e fa’afiafia mo le sisigafu’a o lenei tausaga, ona ua fa’afuaseia ona taofia ona o le vaai maualuga lava o Ta’ita’i o le Atunuu i le saogalemu o Samoa ma ona tagata.
