FAUSIA LE OFISA AUTU FOU O FAIGA PALOTA
Tusia: Tusiga Taofiga
Ua amata le galuega tele, o le fausiaina o le Ofisa Autu fou a le Ofisa o Faiga Palota (OEC), i le nofoaga tonu lea sa tu ai le Ofisa tuai o le Fa’amasinoga o Fanua ma Suafa i Mulinuu.
Ua fa’amaonia mai e le Komesina o le Ofisa o Komisi o Faiga Palota, Faimalomatumua Mathew Lemisio, o le naunauta’iga ia mafai ona fa’aaogaina lenei fale fou mo galuega fa’atino auā le Palota tele a le atunuu i le tausaga fou 2021.
“O lenei galuega tele o lo o fa’atupeina e le Malo o Samoa, ma o lea ua fa’agasolo le talaina i lalo o le fale tuai o le Fale Fa’amasino o Fa’amasinoga o Fanua ma Suafa.”
“Silafia fo’i o le Ofisa lenei o lo o galulue ai le Ofisa o Faiga Palota, o le Ofisa le tumau, ma e le’o mautu fo’i i le taimi nei, o le fiafiaga lena o lo o i le Ofisa nei, ona o lea o le a tino mai se Ofisa
mautu a lenei auaunaga, auā le fa’atinoga o ana galuega masani i aso faiso’o.”
I le taimi nei o lo o vaeluaina le aufaigaluega a le Ofisa o Faiga Palota, o le i si aufaigaluega o lo o galulue i le potu o lo o avanoa i le Faletupe o Atina’e (DBS) a’o le i si vaega o lo o galulue ai i i si potu avanoa i le SNPF PLAZA.
“E ui e faigata feuia’iga i le taimi nei ona o le ‘ese’ese o nofoaga o lo o fa’amautu ai a matou auaunaga, peita’i e telē le talitonuga o le a toe fo’i le OEC i le tulaga manaia sa i ai muamua pe a tasi lona Ofisa mautu, i le mae’a ai ona fausia le Ofisa fou o lo o ua amataina nei galuega fa’atino.”
