LAVA MA TOTOE LE FA’ASOA A LE MALO
Tusia: Tusiga Taofiga
E le’i tu’u māmaina e le Palemia lafoga a le sa avea muamua ma Ao o le Malo ma Palemia, Tui Atua Tupua Tamasese Efi, e fa’apea ua pagātia le Malo i le maoa’e ma le maualuga o ana nonōgatupe mai atunuu i fafo ua o’o ai i se tulaga maualuga le nofo aitalafu ai o le Malo o Samoa.
Peita’i saunoa le Palemia, Tuilaepa Sailele Malielegaoi, a fa’atusatusa atu i lenei vaitau i le taimi a’o tulai mai ai Tui Atua e avea ma Palemia, e leai se fa’avae o nei manatu.
Muamua, o lo o i ai nei se Teuga Tupe Fa’avaomalo mo Fefa’atauaiga (Foreign Reserves) e $187.17 miliona tala Amerika, tusa lea ma le $522.7 miliona tala Samoa, e mafai ona fa’aaogaina e le Malo e fa’atauina pe oka mai ai oloa mo le fofoga taumafa o le atunuu i taimi e a’afia ai le tamaoaiga o le lalolagi ma Samoa. O lenei fa’aputugatupe e gafatia ai le manaoga o le atunuu atoa mo le 6.8 masina.
E le gata i lea, a’o se tulaga lelei o lo o i ai pea tupe maua a le Malo o lo o i ai nei pe a fa’atusatusa lea i le mala na i ai Samoa a’o pale mai ai Tui Atua i le tofi Palemia.
“O le aofa’i o le tupe lea e fa’agaioi ai le Malo i se gagana faigofie, e $885 miliona e le’i o’o i se piliona, o tupe na, o tupe lava a tatou e maua mai tatou lafoga totogi ma nai fesoasoani a nai atunuu laiti e le’o ni atunuu tetele.”
Ua tali le Palemia e fa’asa’o le saunoaga a Tui Atua Tupua Tamasese Efi, na ia faitio ai le Malo ua afua ona ‘apa’apa i lafoga a Faifeau ma le Ao o le Malo, ona o lo o mana’omia se tupe e totogi ai aitalafu.
“E $885 miliona lea e maua e tatou e fa’agaioi ai le Malo, ua tatou vaai la i ai i le fa’avalevalea o nei manatu, ona o lea e faimai ua ala ona mana’omia e tatou lafoga a faifeau ma le Ao o le Malo, ona ua gau le Malo ma ia totogi ai tatou aitalafu, a’o lea e manino e na’o le $89 miliona (e $76 miliona aitalafu i fafo, $13 miliona aitalafu i totonu o le atunuu) lea e alu e totogi ai nōnōgatupe i le tausaga fa’aletupe lenei, auā o tatou aitalafu e umi lava se taimi e totogi ai,” saunoaga lea a Tuilaepa, Palemia o Samoa.
“O la’u fautuaga la ia Tupua, se soia ia e te o’o mai ii i mea e lē o’o i ai lou malamalama.”
Saunoa Tuilaepa e fa’apea;
“E sili ona faiatu sa’u fa’amatalaga i le fa’ata’otoina o le paketi o lo o alu nei, e malamalama lelei ai si o tatou atunuu, o le mea lenei o le tau fa’amalamalamaina o mea fa’apenei e le faigofie, a’o le tulaga lea i ai le Malo i le taimi nei, e tolu tala o le tupe lea e fa’agasolo, o le tala o le tupe autu ma le tala o le tupe fa’a’opo’opo e tau kava ai tupe alu ona o le misela ma le tala o le tupe lona tolu lea e alu ai ma le tatou fa’amāmā avega (stimulus package).”
“O lona uiga, o le tu’ufa’atasiga atoa o le tatou tala o le tupe lea ua i ai nei, ona o lea ua faimai le alii (Tupua) lea ua gau le Malo, lea la o le a ou liliu loa ou te talanoa mae’ae’a i le tala o le tupe.”
“O le aofa’i o le tupe lea e fa’agaioi ai le Malo i se gagana faigofie, e $885 miliona e le’i o’o i se piliona, o tupe na, o tupe lava a tatou e maua mai tatou lafoga totogi ma nai palupaluga i nai atunuu laiti e le’o ni atunuu tetele.”
“Ona fa’ata’oto loa lea o le fuafuaga, e totogi muamua a tatou nonōgatupe, aveese le $89 miliona e totogi ai tatou teugatupe, o le mea lea le ala ai ona faimai tagata nei ua ala ona fai, se’i totogi ai tatou aitalafu ua tele.”
“O le tala o le tupe lea e ave i luma o le Palemene ma fa’amaonia mai ai, ma su’esu’e ai e le Komiti o Tupe ma aumai ai le latou fa’amaoniga.”
“E o’o fo’i la i aitalafu uma lava, e avatu uma i tala o le tupe ina ia manino i tagata uma, e $89 miliona e alu i tatou nōnōgatupe, o le vaega lena e tatau ona totogi i le tausaga fa’aletupe lea e fa’agasolo nei, o lena, e na’o le pau lava lena, e $89 miliona, a’o le fesili la, e fia la le tupe lea e maua e tatou.”
“E $885 miliona lea e maua e tatou, ua tatou vaai la i ai i le fa’avalevalea o nei manatu, ona o lea e faimai ua ala ona mana’omia e tatou lafoga a faifeau ma le Ao o le Malo, ona ua gau le Malo ma ia totogi ai tatou aitalafu, a’o lea e manino e na’o le $89 miliona lea e alu e totogi ai nōnōgatupe i le tausaga fa’aletupe lenei, auā o tatou aitalafu e umi lava se taimi e totogi ai.”
“Ona totoe ai loa lea o le $796 miliona, o le mea la lea e fa’atāua e le Malo, o le fuafuaina o le fa’agaioiga o le Malo mea na e igoa o current expenditure, muamua aveese le seleni e totogi ai aitalafu uma lava a le Malo, e $76 miliona aitalafu i fafo, $13 miliona aitalafu i totonu o le atunuu lea e maua ai le $89 miliona ona totoe ai loa lea o le $796 miliona, ona fua loa lea o tupe e fa’agaioi ai le Malo, e utu ai ta’avale, penisini, galuega tau pepa, o telefoni ma ua uma fo’i ona fuafua ma pasia e le Palemene, auā o mea uma ia e pasia e le Palemene e $623 miliona e fa’agaioi ma tausi ai le Malo.”
“Ona totoe ai lea o le $73 miliona, o le mea e fai e le Malo e mamao le latou vaai, magafagafa pei o le HRPP, o fea e fa’aaoga ai le $73 miliona lea, ia fa’aaoga loa i atina’e.”
“Manatua e aveese muamua tupe o aitalafu, o vaega tupe e fa’agaioi ai le Malo, liliu loa o a mea e totoe pigi loa ma atina’e, auā o le atina’e lea e maua ai galuega, e i ai auala pei o le auala i Malololelei lea na matou o tatala.”
“O le tala atoa lena o le tupe, a fa’afogafoga mai la Tupua ma ana mea ia e fa’a’oloataua ai tagata o le atunuu, na ala ona ia aumaia mea ia, e totogi ai aitalafu, ia o lea ua ou fa’amatalaina atua.”
“O ona uiga a ia a’o i totonu o le Palemene e ta’ita’ia mai le Vaega a le Itu Agai, out e fiu e fa’amatala i ai, ae matuā le malamalama lava.”
Na fa’ailoa foi e Tuilaepa, o lo o telē le fesoaosani mai a a tatou pa’aga mai fafo, mo le fa’atupeina o le tele o nisi o a tatou atina’e e aunoa ma se totogi.
“O lea la e totoe le $73 miliona e fa’agaioi ai tatou atina’e, ae i ai la le mea uiga ‘ese lea e i ai nei, e le $73 miliona le atina’e, e te iloa le aofa’i o le tupe mo atina’e lea e fa’agasoloina nei, e $176 miliona lea e i ai nei, o lona uiga la, e ova i le $103 miliona lea sili atu ai, auā sa tatau na’o le $73 miliona lea e totoe mai e pigi ai tatou atina’e i tatou lava tupe, a’o lea la e i ai le $103 miliona lea e $176 miliona ai, o le fesili la, o fea la e aumai ai lea tupe tele, o i la, o le tali, e sau mai nai tatou pa’aga mai fafo, ua tumu i le fiafia i le vaai mai, o lo o lelei ona fa’afoe a tatou atina’e.”
“Auā e leai se Malo fa’avalevalea e aumai ni latou atina’e ae vaai mai o so’ona fai, fa’aaoga le tatau, o lea fo’i e omai latou Ofisa, latou Okika – Economist e toe siaki atoa mea ia, o i si tausaga e ta’ilua malaga / savali (missions) e omai, NZ, AUSETALIA, World Bank, IMF, ADB ma i si, e omai uma a, e su’esu’e ma vaai le fa’atinoga o galuega, ona o ai lea ma le fiafia.”
“A avatu a la tatou talosaga, e talia lelei lava, tu’u ane i le fa’atinoga e le aufaigaluega a le Malo, manatua o le to’atele o le aufaigaluega a le Malo, o tagata a’oa’oina, o i latou fai tikeli ma le au sikolasipi uma ha ha ha ha ha ha.”
“Ia tu’u atu loa i ‘ai latou, e te iloa le mea lea e tupu o le maualuga ia o le fa’aaloalo ma le amanaia a atunuu tetele nei i tagata faigaluega a le Malo, ona o le ma’ati o latou mafaufau, e ala ona latou iloa mea ia, o le oane talanoa i si atunuu ma i si atunuu, ae omai iinei, oka 100%.”
“O le i si auala lea e ala ai ona si’itia le tomai o tatou tagata faigaluega ma lelei le fa’atinoga o galugea, ona o lea e fai ma o i o faigaluega i le ADB, World Bank, IMF, latou te malamalama ai i processes a le vaega lea, ona omai loa lea.”
“E omai la papalagi ia ma gagu mai, ae pei a o le siamu i tatou tamafanau ia fuafuaga mamao nei.”
“I le atina’ega o le tatou Malo, e lua teugatupe e tatau ona fa’atāua, e ‘ese a la teugatupe muamua lea i ai tatou lava tupe ia tatou tala, e i ai lafoga totogi a nai o tatou tagata, fa’atatau la a o’o ina fuafua le paketi, ona fuafua lea e latou ina ia sa’o, ae i ai la le i si teugatupe lona lua o teugatupe fa’avaomalo mo fefa’ataua’iga lea e fa’aigoa o Foreign Reserves, o tupe la na e matuā mata’itu e le atunuu ina ia ‘aua ne’i fa’aletonu, auā e fa’aletonu loa oki loa le mea lea na tupu i le taimi o Tupua, ua matuā leai ma se tupe na i ai, lea e i ai fefa’ataua’iga.”
