FESOASOANI O LE KOVITI 19 MO LE AUFAI FA’ATO’AGA
Tusia: Taunuuga Toatasi
A’o i ai le atunuu i le Poloa’iga o Fa’alavelave Tutupu Fa’afuasei ona o le Koviti 19, e $1 miliona le seleni mai le fa’amāmā avega (Stimulus Package) a le Malo i lana Tala Fa’atatau Fa’a’opo’opo o le Tupe, ua fa’atupeina ai polokalame fesoasoani mo le aufai fa’ato’aga.
O lā’au a’ina totō, pei o talo, manioka, umala ma saga, o laau nei ua tu’uina atu e le Matagaluega o Fa’ato’aga ma Faigafaiva i le faigapa’aga ma le Matagaluega o Tinā ma Tama’ita’i mo le fa’asafuaina.
O le tasi lea o sini autu o lo o tuli mata’i pea e le Matagaluega e pei ona saunoa i ai le Ofisa Sili o Pulega ia Tilafono David Hunter i le feiloa’iga ma le Savali.
O le fa’aaogaina lea ma le tatau o le tino i tupe sa fa’amatu’u atu e le Malo mo ana galuega fesoasoani mo le atunu’u.
Saunoa Tilafono, so’o se atunuu lava, e ave lava le fa’amuamua i o latou tagata, pe a o’o foi i se tulaga e pei ona i ai le fa’ama’i o le Koviti 19, e tatau ona matuā lava le tatou tapenaga.”
E $1 miliona tala le seleni lea sa galulue ai le Matagaluega o Fa’ato’aga ma Faigafaiva e fa’atino ai ana polokalame fesoasoani mo le aufai fa’ato’aga, fai lafu manu ma le aufai faiva.
Ae $3.5 miliona tala se vaega tupe na tu’uina e le Malo i le Matagaluega mo le si’itia o atina’e ma galuega a le Matagaluega ma Faigafaiva.
I le vaevaeina o lea tino i tupe e pei ona fa’ailoa e le Ofisa Sili, e $2.5 miliona tala ua tuuina atu i le Fa’alapotopotoga mo Su’esu’ega Fa’asaienisi a Samoa (SROS), ae totoe ai le $1 miliona tala i le Matagaluega.
O le vaega tupe e $820,000 e totoe i le fa’asoasoaina o galuega fa’atino a le Mataghaluega, sa fa’ailoa e Tilafono o le a fa’atau ai fatu lā’au, o fualā’au faisua, fatu o fuālā’au aina mata ma i si lā’au aina toto, pei o talo, manioka, umala, saga.
E le gata i lea, a o lā’au aina totō e vave ona tali mai pe tolu i le fa masina ua fa’aaoga, auā le fofoga taumafa o le atunuu.
