FESOASOANI NIU SILA MO LE SOSAIETE O LE KANESA
Tusia: Taunuuga Toatasi
E 18 pusa o taga faapitoa e faaaoga e gasegase o le kanesa na faameaalofa mai e le Malo o Niu Sila i le vaiaso ua te’a.
O le Sui o le Malo o Niu Sila i Samoa, o Tauā Pati Gagau na tauaaoina lea meaalofa taua i le Pule o le Sosaiete o le Kanesa i Samoa, Shelley Burich.
O ia taga faapitoa e faaaoga e tagata ua gasegase i le kanesa, ma e puipui ai foi latou mai le faaono aafia i ni siama.
Na saunoa ai Shelley, o le fesoasoani na tauala mai i tausi soifua o loo galulue i le Falema’i Faaitumalo i Manukau faapea ai ma le Falema’i i Middlemore i Aukulani. O se fesoasoani taua tele lea ua taulimaina e le Sosaiete e pei ona saunoa Shelley, talu ona tapunia malae va’alele ma tulaga o femalagaiga fa’avaomalo, ua lē mafai ai fo’i ona toe aumai latou sapalai lea e masani ona fesoasoani mai ai le fa’alapotopotoga o le Australian Fund.
Na saunoa faafetai ai Shelly i le Malo o Niu Sila ona o le agalelei faaalia.
O se fiafiaga foi lea i le tamaita’i tausi soifua o lo’o gafa ma le va’aia o gasegase a le Sosaiete, Fuamatala Tofilua, ma ia faailoa ai i le Savali, e tusa ma le 17 gasegase o loo va’aia e le Sosaiete i le taimi lenei, ma o taga ia ua faameaalofa, e aoga tele mo le tausiga o gasegase nei o le kanesa.
Na faaopoopo Fuamatala, sa fa’afaigata lava le tulaga mo nai gasegase, ona o le Poloaiga mo Fa’alavelave Faafuasei lea o lo’o i ai le atunuu o le Koviti 19, ma ua tapunia ai ma femalagaiga i le va o atunuu, ma ua a’afia atu ai ma le auina mai o tulaga faafoma’i ma mea e faaaoga e le Sosaiete, ia e masani ona aumai Ausetalia.
“O le faaetetega, ona a leai se taga lea, e telē lava se a’afiaga i le soifua maloloina o le tagata lea e gasegase, aua e lē mafai ona sui tulaga se taga pepa iila po’o se ieie (tulou Samoa), ona e ono mafai ona ulu ai le siama i totonu o le tino o le tagata o lo’o gasegase.”
