FA’ALILIU LE TUSI A LE PALEMIA I LE GAGANA SAMOA
Tusia: Tusiga Taofiga
E le’o toe mamao ona fa’alauiloa aloaia lea o le tusi a le afioga i le Palemia, Tuilaepa Sailele Malielegaoi i le Gagana Samoa.
O lenei tusi o lo o faamatala atoa ai le soifuaga Tuilaepa mai lona laitiiti seia o’o mai i le vaitaimi na lolomiina ai.
Na faailoa e Tuilaepa i le polokalame ma le leitio 2AP i le vaiaso ua te’a, ua mae’a tuuina atu kopi o le Gagana Samoa mo le lolomiina o kopi o le tusi i le Iunivesite Aoao o Victoria i Niu Sila.
O le faletua ia Ainslie So’o na gafa ma le fa’aliliuina o le tusi mai le Gagana Faaperetania i le Gagana Samoa.
Saunoa Tuilaepa e fa’apea;
“I la’u tusi lenei o lo o sau uma ai lava lu’itau sa fa’afeagai ma le Malo, lea ua uma ona fa’asalalau le fa’aperetania, lea e sau uma ai lava mea ia e pisa ai nei, o le mafua’aga ua ou naunau ai e fa’apepa mea ia, o le tāua mo augā tupulaga i le lumana’i ia ‘aua ne’i fananau mai ma fa’asesēina ai i latou, lea e fa’ata’atia atu ai auala uma, na matou uia ma o matou ta’ita’i, ia Vaai ma Tofilau, e tau mai lava i lenei taimi, manū o lo o o’u ola pea, ina ia silafia e Samoa atoa ma silafia e tupulaga faimai, ina ia ‘aua ne’i se’etia, leaga o lea e toatele le au taufa’asese lea e i ai.”
E le o iloa tonu le faimi o le a faalauiloa ai le lomiga faasamoa o lenei tusi.
