SUIGA O LE POLOKALAME O LE TUTO’ATASI 2020
Tusia: Asenati Taugasolo Semu
Ua faailoa faapitoa e le Komiti o Tapenaga o le Tuto’atasi le suiga o le Polokalame mo le faamanatuina o le Tuto’atasi o lenei tausaga, lea o le a faamamaluina i le Aso Gafua o le vaiaso fou, aso 1 Iuni.
O le Ofisa Sili o Pulega o le Matagaluega o le Palemia ma le Kapeneta, Agafili Tomaimanō Shem Leo na saunoa e faailoa le Polokalame, lea o le a momoli atu ma faasalalauina i luga o televise, leitio ma upega tafa’ilagi (internet ma le social media).
Ua suia ai le polokalame o lenei aso faapitoa taua mo tagatanuu uma o Samoa e le gata i totonu o le atunuu a o Samoa e alala i atunuu i fafo, ona o tulaga o le faama’i o le KOVITI 19 ma le Poloaiga mo Faalavelave Faafuasei o lo o i ai nei,
“Faafetai i le Atua o lea ua maua le laolao tatou te feiloai ai, e faaauau le anava o le logo puialii o lo tatou atunuu ia silafia polokalame o lo o agai i ai aemaise polokalame tetele o feagai ma Matagaluga ma le Malo.
O sui o le Komiti o Tapenaga o le Tuto’atasi 2020 na fofogaina le tulaga ua faataoto ai e le Malo polokalame e faamanatu ai le 58 tausaga o lo tatou Tuto’atasi, i se feiloaiga ma le autusitala/aufaasalalau i le aso ananafi.
Na saunoa foi Agafili, o se tasi lenei polokalame taua i luga o le kalena faaletausaga a le Malo, e faatilo laumea uma i ai le atunuu, e le gata i Samoa o alala i totonu o le atunuu, a o soo se Samoa o alala i atunuu i fafo.
“Ou te manatu i lenei tausaga, ua faiva ese ona o le puipuiga lautele mo le faamai o le KOVITI 19.
“O lo o faaauau pea tatou Poloaiga o Faalavelave Faafuasei, e tusa ma le Vaega e 105 ma le Vaega 106 o le Faavae o le Malo Tuto’atasi o Samoa. O le Poloaiga o lo o faaauauina nei, faatoa maea i le aso lua o Iuni, lona uiga ua pa’ū le faamanatuina o le Tuto’atasi Lona 58 o le atunuu i totonu o le vaitau o lo o feagai ai Samoa ma Poloaiga mo Puipuiga mai le faamai.
“Ma e o le manatu lea ma le finagalo lea ua faavae ai le finagalo o le Kapeneta, i le afio o le afioga i le Palemia ma le sui Palemia ma le Kapeneta, e ala atu i se fautuaga mai le Komiti o Tapenaga o le Tuto’atasi Lona 58 o le Malo o Samoa.”
Na saunoa Agafili, na i ai le fuafuaga a le Malo mai ia Ianuari e tau mai ia Mati e faatino le polokalame masani o sauniga o le Tuto’atasi, ae peitai, ua faaauau pea vavao o le Poloaiga, lea ua mafua ai le suiga.
“Mai le masina o Ianuari ia Mati sa manatu e faatino pea le tatou Polokalame e pei ona masani ai, ma e lē tau faailoaina polokalame masani, e aofia ai le Sauniga Lotu, sisiina a’e o le tagavai, o faafiafiaga faaleaganuu faapena ma valaaulia o Malo mai fafo, sa fuafua uma lava.
“Peitai ane ua le ōgatasi le uto ma le maene, o le futia ma le umele i le finagalo o le Atua. Ua po’ia le lalolagi atoa i le faamai lenei ma ua i ai nei le finagalo o le Kapeneta, i le suiga o le a i ai i lenei tausaga o le polokalame, o le a faaaoga ai a tatou ala ata ma upega tafailagi, ma faaaoga le saosaoa ua i ai fesootaiga e ala i le faatekonolosi e momoli atu ai sauniga ma le plokalame o le Tuto’atasi o lenei tausaga i tagata uma.
“O le a le uiga o le suiga? O le a le faataunuuina le polokalame e pei ona faataunuuina i tausaga taitasi. O Sauniga Lotu i le aso 31 o Me, lea e pa’ū i le Aso Sa nei, faapena polokalame e faasolo i le aso atoa, le aso 1 o Iuni.
“O le suiga la lea ua i ai. O lea o le a alu atu uma le polokalame i televise, o alaleo leitio, o ala ata ma le internet po o upega tafailagi ma le social media e faao’oo’o atu ai le polokalame ua tapena e le komiti (Digital programme) ma o le malosi lena ma le saosaoa ua i ai le tomai o alo ma fanau a Samoa, e mafai ona maimoa mai ai le olomatua ma le toeaina faapea tagata Samoa i le lalolagi atoa.”
Na faaopoopo le saunoaga a Agafili, o le 7.00am i le taeao o le Aso Gafua, o le a faasalalau ai le polokalame o le Tuto’atasi.
“O le a faatino lava le faasalalauga faalaua’itele, ma le Poloaiga a le Ao o le Malo, ma o le a malele mai le Ao o le Malo mai le Maota o le Ao Mamalu i Vailele. Ona see mai lea o le sauniga o le tatalo faamanuia mo le aso Tuto’atasi ua saunia e le Peresetene o le Ekalesia Metotisi i Samoa, le susuga ia Faulalo Leti. Ona see loa o le polokalame i le malae o Tiafau i Mulinuu, o iina o le a faatino ai le sisiina a’e o le tagavai.”
O le a pu’e muamua uma lava ata o le polokalame, ona tuufaatasia lea ona faaalu atu lea o le polokalame i le taeao o le Aso Gafua.
O le siiina a’e o le tagavai e faatinoina e le Sui o le Fono a Sui Tofia, Le Mamea Ropati Mualia faapea le susuga i le Komesina ma le vaega o malu o le Malo e pei ona masani ai.
“Lona uiga e alafa’i a’e le atunuu i le taeao o le Aso Gafua, fai lelei le ipu kofe ma le malu taeao, ona ki loa lea o lau ala ata i le TV faapena le leitio po o le internet ma le social media, lea o le a faaalu atu ai le tatou polokalame lenei.”
I le tulaga o afioaga na lautogia e faafiafia, e i ai le afioaga o Falefa, Tufulele, Fasitootai ma Salelologa, na saunoa faamalamalama ai le taitaifono o faafiafiaga faaleaganuu o le Tuto’atasi, o Taueva Lelevaga Faafouina Mupo mo le toe faataunuuina o lea tulaga i le tausaga fou.
“O afioaga o Falefa, Tufulele, Fasitootai ma Salelologa, o afioaga ia sa lautogia mo lenei tausaga mo faafiafiaga o pese ma siva faaleaganuu. Peitai ua le ō gatasi le futia ma le umele i fuafuaga sa i ai le tofa i le Malo ma le faamai ua lofia ai le lalolagi.
“Le paia e ma le maualuga o le atunuu, aemaise foi o afioaga ua lautogia i lenei tausaga, lea ua mae’a saunoa le afioga i le alii Palemia, o le taitai o le Malo o afioaga nei e toe valaaulia e faaauau i le polokalame o le Sisigafua o le 2021, aua le faamanatuina o le 59 Tausaga o le Tuto’atasi o le tatou atunuu.”
I tulaga o le puipuiga ma le saogalemu o le atunuu i taimi o le faamanatuina o le Tuto’atasi, na saunoa ai le Komesina o Leoleo, o Fuivailiili Egon Keil, o le tiute o malu o le Malo e tele lu’itau pe a oo i taimi o le Tuto’atasi.
Na saunoa foi Fuiavailiili, o se tulaga lelei foi ma faagae’etia ai leoleo i taimi o le Tuto’atasi, i le faatinoina o latou tiute, o savali ma faatinoga o faafiafiaga.
E ui i suiga o lenei tausaga, ae na saunoa le Komesina o Leoleo, o le a faigofie o latou tiute i lea taimi, ae e tumau pea le faamalosi o la latou galuega i aso uma mo le puipuia o le saogalemu o le atunuu.
O lo o avatu foi ma fautuaga mo le atunuu ia soso ese ma le taumafa ava malosi ma faafoe taavale i ia taimi ina ia saogalemu pea Samoa.
