“E LEAI NI TUPE PALAPALĀ I SAMOA,” PM TUILAEPA
Tusia: Tusiga Taofiga
Ua toe saunoa manino le Palemia, Tuilaepa Sailele Malielegaoi, e leai ni tupe palapalā i totonu o Samoa. Na fa’asa’o e le Palemia tu’uaiga a Tui Ātua Tupua Tamasese Efi, e fa’apea o Samoa o lo o atia’e ma fa’agaioi lona Malo i tupe palapalā. Na ia taua ai, e le talafeagai le so’ona fausia o atina’e tetele ma malae va’alele ae le’o maua ai se tupe mamā.
Saunoa Tuilaepa e fa’apea;
“E leai ni tupe palapalā o sau i totonu o Samoa, ae sili ona ou ta’u atua le mea lea, e tāua tele. O le tausaga 1973 a’o o’u faigaluega i le Matagaluega o Atina’e, le taimi lena o Minisita o Tupe ia Sam Saili.
“I le taimi lea o Sam Saili, a o avea ai ma Sui mo tagata palota ta’ito’atasi, pei o le taimi fo’i lena e le’i suafa ai ia Fa’aso’otauloa, o le taimi tonu lea o Mata’afa ina ua toe Malo mai i le 1973, na ia filifilia ai loa Sam Saili e fai ma ana Minisita o Tupe, ma o se Minisita atamai tele, o le Su’etusi foi ma e malamalama lelei i tulaga tau tupe.
“Ona fai ai lea o le i’uga a le Kapeneta se’i alu e fa’atalanoa isi atunuu o le Pasefika ma mata’itu a latou atina’e (fact finding mission), ona sau loa lea e vaai po’o a ni atina’’e e ono faia mo Samoa nei. Ona ia filifilia ai lea o a’u ma te o, a’o le taimi lena fa’atoā 29 o’u tausaga, o lo o o’u talavou, ona ma o loa lea. Na ma malaga i Fiti, Vanuatu, Papua Niu Kini, ma toe fo’i mai lea i Ausetalia.
“O Vanuatu na fa’aautu ai le faigamalaga, ona o le naunau o Sam Saili, ina ia kopi mai ituaiga pisinisi Offshore, lea e mafai ona resitala mai, ma maua ai tupe a le atunuu, ae leai ni lafoga e totogia auā e le omai i totonu auā na’o le resitala lava ma tusi o latou igoa ae maua ai fa’amanuiaga na, ae le omai.
“O le mea lena lea ou te malamalama ai i mea ia, e le’i la se gaioiga na toe fai i le mea lea, o’o loa ina ou Minisita, o’u amata fa’atalanoa loa lea i le 1985 a’o o’u i ai i le fono a le Faletupe o le Lalolagi (World Bank), a’o le 1985 lena lea na o ‘ese ai loa le matou Malo ae tula’i mai loa le Malo So’ofa’atasi, toe fa’aauau ai loa e Sam Saili le mea lea, lea sa ma o ai i le 1973, 14 tausaga mulimuli ane ai, ua toe tuliloa e Sam Saili ina ua se’e ‘ese le matou faigamalo ae tauave loa e le Faigamalo So’ofa’atasi le ta’ita’iga o le atunuu i le 1986 – 1987, o le Malo So’ofa’atasi lea e 15 Faipule na o ‘ese atu ma matou fa’atasi ai ma le matou ta’ita’i ia Vaai, ua fa’apipi’i mai ai Tupua, ae 10 faipule a Tupua, tu’ufa’atasi ona maua ai lea o le 27, auā e na’o le 40 Faipule o le Palemene i lena taimi, lea sa paū loa le matou faigamalo ina ua avatu le matou tala o le tupe, fa’amavae loa ma Tofilau, matou se’e ‘ese mai loa, ae se’e atu Vaai ma Tupua ta’ita’i le Malo, Palemia Vaai ae Sui Palemia Tupua, Minisita lava o Tupe Sam Saili.
“Manatua la o Sam Saili e malamalama lelei i mea tau tupe ma pisinisi fa’avaomalo – offshore, manatua lea sa ma malaga ai i le 1973 i Vanuatu.
“I le fa’atoa fa’atuina ai o lenei fa’amoemoe, o le palagi mai Vanuatu na mua’i sau ma fesoaosani i le fa’atuina, o le fono la a le Palemene a’o ta’ita’ia e le Vaega Fa’aupufai So’ofa’atasi i lea taimi, 1986 – 1987, ae 1988 loa toe fai le faigapalota paū ai loa latou, o le 1986 ma le 1987 lea na avatu ai tulafono ia o Vaai le Palemia a’o Tupuola Efi le Sui Palemia ma Sam Saili i le Minisita o Tupe, ona fa’atuina ai loa lea o le Offshore, ona avatu lea pasi, a’o a’u la sa i le isi itu, o a’u o le fofoga mo tulaga tau tupe, o lea ou te malamalama ma na aumai ai la’u lagolago ma ou fautuaina ai le matou vaega tatou lagolagoa le mea lea, ona e tāua tele mo le saili tupe ai o le faigamalo, lea e malamalama lelei le isi Su’etusi (Sam Saili) i le isi Su’etusi (Tuilaepa), lea na fa’atuina mai ai loa le Tulafono lea o le VAGST.
“E lua la tulafono, o le VAGST e fa’apitoa la na’o faletalimalo mo potu totogi, ma le fa’amoemoe se’i fa’aaofia ai isi oloa ma isi auaunaga po’o tautua i le lumana’i, ma fa’atuina ai loa ma le tatou Offshore Center.
“Ae fai loa le palota o le 1988, paū ai loa le Vaega a Vaai ma Tupua o’u sau ai loa fa’aauau le mea na latou faia, i la’u fautuaga ia Tofilau e lelei tele le mea lea mo le atina’ega o Samoa, auā o lea e malamalama lelei le i si Samoa i le i si Su’etusi, e le fa’apea la e aumai le fai vaega e talepe ai se mea lelei, lea na ou fa’aauauina ai, avatu loa le tulafono lea, e fa’aauau ai le VAGST, i oloa ma auaunaga, lea na fa’ata’oto ai i totonu o le Palemene i le 1992, ae pasia i le 1993 ma le fa’amoemoe e amata fa’agaioi i le 1994, fa’atasi ai ma le tulafono o le fa’atuina o le SIFA.
“A’o le VAGST, ua galo atoa ia Tupua o latou e ana le VAGST, a’o lea na alu lana feau ia Tumua ma Pule lea omai loa fai le solo tete’e tele amata mai le 1994, 1995, 1996, toe sau ai ma le sainigalima, atili ai ona toe fa’aauau i le 1997, a’o le 1998 lea na ou tu’uina mai ai le tali, ona o la e malaga le To’oto’oali’i i Sikotilani i le fono a Malo o le Taupulega, lea sa ou tu tu mai ai i le fale o le Malo ma tali, ae tu atu Fa’amatuainu i le isi itu, ae 1,000 ma 1,000 tagata ia ua solo tete’e, ou te lagona na o atu ai fo’i ma isi tagata ma aupega, ae sa tu tu ai fo’i ma leoleo e ofu savili.
“Ae una’i uma atu e le toeaina lea o Tupua Efi, a’o mea na latou faia, le VAGST, lea ua matou fa’aauauina ma fa’aauau ai fo’i e le HRPP le Offshore (SIFA), lea e fesoasoani nei i le maua ai o tupe e ave ai tatou tama taa’alo, toe fesoasoani mai i le tatou Malo i le fa’atupega o le tatou tala o le tupe, a’o le SIFA la o lea ei totonu o le Komiti lea e i ai ma Malo ia ei fafo, e fa’ataute’e atu ai i money laundering po’o tupe ‘ele’elea, o lea fo’i e talia tatou i totonu o le fa’alapotopotoga o atunuu tau atia’e le OECD vagana le EU, lea e mafua ai ona blacklist tatou, ona e mana’o latou e tatau ona tatou tilotilo i tulafono e tu’utu’u ai luga lafoga a kamupani ia e fia resitala mai iinei.
“O le tala’aga atoa a lena o le SIFA, o lea tatou te faataute’e atu i tupe ‘ele’elea ia, ma o tatou lea e taulamua ai, a’o lea ua manino mai le tulaga sa’o o le mea lea, o le mea na amata e Tupua ma Vaai, ae fa’aauau e le HRPP, a’o lea ua ou vaai atu, ua tau le pua ma lafo mai, ae galo ia te ia, e le’o se mea na matou amataina, a’o se mea lelei e mafai ai ona fa’atupe tatou ta’aloga, a’o le ta’ita’ia mai e ia o le savali tete’e, ma tu mai luma o le fale o le Malo ma fai a latou siva fa’atauemu i le Malo, o le faigata ia o le onosa’i, ou te fa’amalo a ia Tofilau Eti Alesana, auā e faigofie a le tonu na i ai, o le a valaau loa e matou Itumalo, e omai loa matou Itumalo e savali e tali le mea lea, o le a la le mea e maua ai, o le tau o le toto masa’a, o le mea tonu a la lea e mana’o ai Tupua ia tau le atunuu.
“Sa matou fono ai luga o le fale o le Malo, matuā ou alofa i le toeaina i le taimi lena, a’o lea e fai pesepesega ma tauemu, ma upu tauemu, Na matou fono i luga ma fa’alogologo mai i upu tauemu, ae na ou matuā mata’ituina a le mafatia o le Ta’ita’i, na fai loa lea o matou lauga fa’asolosolo, o a’u lea sa ou nofo i autafa o lo’u ta’ita’i, ona fai loa lea o la’u upu ia Tofilau, Tofilau, o la e fa’apenei uma mai mata o Samoa ia te oe, o upu e masani ona e tulei ai, o le Atua na te faia tofiga, ia e loto tele, o tofotofoga nei, o tofotofoga o lea ei tua le tiapolo, oa upu a le Aposetolo, pe afai e au le Atua ma i tatou, o ai se e fa’asagatau mai.
Na saunoa foi Tuilaepa i tulaga o lana tusi lea o lo o faamatala ai mea na tutupu i totonu o le Malo.
“O lea fo’i ou te aumaia ai, e fou le HRPP, e le iloa e tagata le HRPP, ae toeitiiti a sao i le palota o le 1979, tasi a le palota na se ese, o le palota a le uso o Vaai, a’o Vaai Kolone lea na fa’atu e ta’ita’i. Semanū a la e Palemia ai iina Vaai Kolone, semanu o le sauga a na a le HRPP e le toe talitalia, lea na toe maua ai le taimi o Tupua, o’o mai loa i le 1982, fai loa le faigapalota lea na sao mai ai le vaega lenei.
“O le matuā mata’utia o le palota lena, sa le tatau ona sao mai le HRPP i le faigata ona talitonuina e tagata, o i si fo’i lafoga na lafo mai i si matou vaega, e fa’afefea ona tatou o e lagolago le vaega a lenei tagata, ae latou te le’i ta’ita’ia se Malo.
“Peita’i ua se’e ‘ese le talitonuga o tagata, ona o mea ia na tutupu, le savali tete’e lea na ai laulu ai le atunuu, i le taimi lea a’o o’u i le Matagaluega o Tupe, ua le avatua la le mataupu e lotea e matou, a ua ave i le Matagaluega e gafa ma le vaaia o tagata faigaluega a le Malo, a’o le mataupu e patino i mea tau tupe, lea e tagi mai ai le aufaigaluega a le Malo, lea fo’i e lomia i totonu o la’u tusi.
“I o’u toe aso a, o’u fa’amavae mai ai i le Matagaluega o Tupe, ua sui atoa lo’u mafaufau, o le a ou alu loa e tamo’e i le palota, ina ua maliu si o matou tofi ia Fatialofa Momo’e, ae ua omai fo’i si o’u Itumalo ma talosaga mai ua tatau ona ou alu i le palota, ae ta’atia la’u galuega.
“Fai ai loa ma la’u fa’ai’uga ma ou fa’amavae ai loa mai le Matagaluega o Tupe, tusa pe toe tolu aso o’u fa’amavae, a’o lea e alu a le savali tete’e, leai ni galuega o toe faia, leai fo’i ma se taumafaiga a le Malo, i nai tagata nei ua fia aai, o le ala lena na ou talanoa ai loa ia Afoa Kolone, tusa o le Pule o a’u, Afoa Kolone loa, ae ou te le’i ta’ua la ia Vaai Kolone toe lua aso o’u fa’amavae loa ma le Malo, ona ou sau loa lea tamo’e i le palota, ae na ala ona ou avea Afoa, ina ia i ai se molimau.
“Ona ou alu atu loa lea fai i la’u Minisita, e le’i fesiligia mai lava se sao o le Matagaluega o Tupe, lea ua ou o’o mai, malie lau Afioga talanoa atu i le Palemia e aumai le mataupu matou te tagofia, o le mataupu o se si’itaga mo tagata faigaluega a le Malo, o matou o le Matagaluega o Tupe e lotea mea ia, a’o le taimi fo’i lena, o lea fo’i ta te naunau ita i le leaga o totogi i lena taimi, ua ta lelava fo’i ai pogaivi moa i lena taimi, ua ta fia ai i ni moa e i ai a’ano, ae ua ou vaai atu, a alu ai lava fa’apea e i’u ina uma patua moa ae soso’o atu ai ma fulufulu moa.
“O’u alu loa talanoa i la’u Minisita, a’o a’u lea fa’atoa fo’i mai fafo pe fa’atoa tolu ea aso, ae ou te talanoa atu ae faimai si toeaina o Vaovasa, malie Tuilaepa, ua uma le i’uga a le Kapeneta, o le mea lenei o le Samoa e fia ai loa totolo i le manava, pe a o tatou fa’atali i ai e o’o ina fetolofi mai i o latou manava, ona ou faiatu loa lea i ai, o lea ua fa’ata’oto atu la’u fautuaga, ina ne’i te’i ua e pea mai, ua ou nofonofo o a’u o le Samoa, ae le avatu se tu’ualalo, ona ma toe fo’i lea ma Afoa, tolu aso mulimuli ane, tapena loa ma a’u mea ua ou fa’amavae, o’u sau loa o’u alu resitala o se sui tauva mo le palota, ae toe lima minute tapuni le avanoa mo sui fia fa’aulu, o a’u lava le sui mulimuli.
“O le faigata o mea na sau ai, a’o le 1983 o la’u paketi muamua lea ma o la’u tala o le tupe muamua lea a’o o’u Minisita o Tupe, ua vevela a le talanoaga,manatua o lea fa’atoa fa’atino ii le matamata ita o Tupua ma lana itu i le vaai mai o lo o saofa’i atu Tofilau i le nofoa sa tatau ona le saofa’i ai, o ia sa tatau ona saofa’i ai, o upu na lafo i na fonotaga e maoa’e.
“O a’u la ou te malamalama uma i mea tau paketi ma tala o le tupe, ona o lea ua leva ona ou galue ai, e pei o le ao ia te a’u le tala atoa o le tupe, ua ou te’i o la e fa’amatala atu le tala o le tupe, auā o le isi masani lea a Tupua e va’ava’ai vale a i le au fou atu, ae cheeky i totonu o le Palemene, e tu mai a, auako i se auako e pusi nofo ai a iina, ma matagā atu ai a iina, ma le toe palota mai ai ma le itumalo, o a’u la ou te le’i nofo sauni i le mea lena, i le auakoga o a’u e la’u tama, la’u tama fa’apelepele.
“Na’o na tu ane lava o Tupua fa’apea mai, lau Afioga i le Fofoga Fetalai, ou te tula’i atu e fa’atu se lafo, ave fuainumera a le sui talavou lea mai Lepā e fafaga ai matai o lona itumalo, se o a’u ua ou te’i, pei a e ta lo’u ulu i le lua i le fa, tu loa i luga ma Tofilau fai avauga, a’o a’u ia pei a o le tagata fo’i lea, o lea ua faitau upu, pei ou te tilotilo atu ua lanu meamata mea uma i le kapoleni, o lea ua oso lo’u itumalo, tafefē, e leai se isi o Lepā e toe palota mai ia te a’u, pe a ou le talia le manatu lea.
“Ua ou fiafia a isi toeaina o Tofilau, i lona tu a’e i luga fai avauga ma Efi, se o avauga i le taimi lena, se a tilotilo i ai tagata e mata’utia, e mata’utia gagana sa fai, a’o le taimi lenei, na’o sina tau saviligia atu lava o le ie o lea faipule, tu i luga ma faimai, toe fa’afo’i upu, oi o le to’atele e le’i fa’alogo i upu ia.
“Ona saunoa mai lea o le fofoga fetalai, Tuilaepa se o lea ua lava lea, ae ou tauanau atu lava se e i ai si a sina tama’i fa’afetai lea fia fai atu, oi ia tula’i mai, ona fai atu a lea o si a’u tama’i agiagi, e pau a le mea e fia fa’asa’o, o lo’u itumalo matai uma, taulele’a, ma tinā e matuā tino lelei i le tele o taumafa e i ai talo mai fa’ato’aga ma i’a o le sami, a’o a’u ou te le’i iloa e taumafa nei mea o fuainumera, a’o a’u fo’i ua ou fiu i lo’u tulaga o a’u o le Minisita o Tupe e tala’u tala’u mai fuainumera i totonu o le Maota i le talosaga a le Ta’ita’i o le Itu Agai, o a’u la ua ou leiloa po’o fea o galoma i ai fuainumera nei, a’o lea ua ou vaai atu nei, o lea e tausami e Tupuola Efi, o le mea lea, malie la afai e te iloa e lelei i lau tausami ia ave loa e fa’atausasami ai lou itumalo.
“A’e ona ou fa’apea loa lea, ua ma paleni ma square ma la’u kama, a’o lana lauga la lea na fai i luma o le maota ma faimai pe ai nei fale, na amata mai lava i le taimi lena ona ou popole, e tatau ona leoleo lelei fale ia, i te’i ua ma’alo mai le toeaina lea amata tausami le fale.
“A’o mea ia e aliali mai ai, lona tete’e i atina’e tetele nei, malae va’alele na fai mai lava i le taimi o Tofilau, e le fou la ia te a’u, tete’e i auala, se tafefe pe ana fa’apea o lea lava e Palemia, lona uiga e na’o le saofa’i a, ma talia lona fa’alupega afio maia lau Afioga i le Tama a Aiga, lau Afioga le Palemia ma nofonofo ai a, ma taofia aitna’e a’o lea e tutupu a’e fanau a le atunuu.
“Le isi lima tausaga ua tagi mai fanau nei i aoga, e le tatau ona malolo le Malo, e tatau ona galue, galue, galue i taimi uma, ae sa ou manatu, e na te le aumaia mea ia i luga, masalo toe 100 taga tala’aga o Tupua lea ou te nofonofo ma a’u, a’o lena ua te’a atu le lua, e le’i taitai, ae o la’u fautuaga i le toeaina, malie maia.”
