FESILI A LE SUI O LE LEITIO 2AP (POLOKALAME FAAPITOA FA’ASALALAU TU’USA’O, ASO 16 ME 2020)
Tali Afioga i le Palemia:
E foliga mai, o lea ua oso tu vaelua Tupua e tete’e mai i le Malo. Sa ou tau masalosalo lava i le tele o mea ia e fa’asau nei, o lea e tu mai ai i tua Tupua. E manatua fo’i i se faatalanoaga na fai, e to’atolu tagata ia na Faipule lea ua tutū i tua o le Malo ma tete’e mai. A ou fa’alogologo la i le sau o fa’amatalaga ia e fa’asau nei, se o upu uma a ia a latou nei.
Ua uma fo’i ona ou talanoa atu, ou te iloa uma lava le vaega lea ei totonu o mea nei, ma upu ia e sau ma ituaiga gagana ia e sau, o gagana a i latou ia sa umia tofi o le Malo.
O la’u tu’ualalo la isi toeaina (Tupua), o lea ua malōlō manumalo, ae tula’i maia se Tui Atua fou, ua se’e ese ma uiga ia fa’avevesi Malo, fa’avevesi aiga, fa’avevesi nu’u.
Na fa’avevesi le afioaga o Nofoalii, alu i Lufilufi vevesi fo’i lea nu’u, lea lava na i’u ai ina aveese e Lufilufi lona Tui Atua, tele fo’i a’u fautuaga sa ave i ai, e alu i lalo. Saili i lalo Malo. O lea la ua ou vaai atu, o Tui Atua tuai a lea, e fa’avevesi atunuu ma fa’avevesi Malo. O si a’u lena tu’ualalo.
Mai lava i le aso na fai ai le iuga o le a tofia Tuimaleali’ifano e avea ma Ao o le Malo o Samoa, na amata ai ona ou vaai i isi uiga ia, auā na i ai lona manatu e tu’u oti le tofi. Ua faaloloto.
Ae fa’afefea ona tu’u oti o lea e matilatila le Fa’avae, na o Malietoa ma lona tuaā e tuu oti o lā tofiga. O le la matūpalapala to lena. E uma loa le lā nofoaiga, ona ta’i lima loa lea tausaga o le nofoaiga a le Ao o le Malo e sosoo ai. Lea la na uma loa le lima tausaga muamua a Tui Atua toe tu’u i ai le isi lima tausaga e le faigamalo lenei a le HRPP. A o ana upu na fai mai ia te a’u ma la’u Kapeneta, ‘ua tou tulia maua’. O lana upu taumavae mai lena e faaalia ai lona agaga moni i le faaaloalo a le HRPP na se’ei ai i le Tofiga mamalu o le Ao o le Malo o Samoa.
Se’i silasila i le tali mai i le fa’aaloalo na tu’uina atu i ai e le faigamalo lenei, lea e pei e sa’ili’ili masei ai lava, ona o le lē fiafia ua pa’i atu le la Tama a Aiga i le tofiga o le Ao o le Malo.
Ae le mafai ona aveesea le lagona o lo o ia te a’u ma le Vaega Fa’aupufai lenei, e tatau fo’i ona lava ia mamalu sa ia te ia. Sa Palemia, toe ave fo’i lea i ai e le Vaega lenei le tofi o le Sui Tofia, ona toe se’ei foi lea mo le 10 tausaga i le tofi o le Ao o le Malo Samoa.
O le mea ua ou vaai atu i ai ua fa’aloloto, ua fai si manao tele. O lea ua manatu le Malo, se’i aumai sia Tama a Aiga, ua leva ona nofonofo i tua ma tautua mai ai.
O lea fo’i sa matilatila lava lona aveesea o lona tausoga o Tupua Tamasese Lealofi IV mai le tofi o le Palemia i le 1976, na ia aveesea lava ma le lē vaai i tagata matutua.
O la’u la vaai ia Tupua, na o ia a ma lona lelei. E manatu faapito tele. Ona nofo loa lea ma aumai ona manatu lē faavaea e fa’a’oloataua ai tagata o le atunuu, aemaise o lea ua agai atu i le faigapalota o le 2021. O le fa’a’oloataua la i le Palota lana mea lea e fai mai.
A o le tulaga lava ia o le lafoga, ou te vaai atu ua matuā telē le sese o ona manatu ia e aumai. Sa totogi lafoga tatou faifeau i le vaitaimi o Siamani ma Niu Sila, lea fo’i sa ou tu’uina atu pepa i totonu o le Palemene e fa’amaonia ai lena mea. Ma o le Tulafono o lafoga i le taimi o le Malo o Niu Sila na sau ai lava seia tau mai i le 1977. Sa totogi la lafoga a faifeau i le vaitaimi lena.
Manatua la o Tupua na avea ma Palemia i le 1976. Ou te le o fai atu la o le fialelei na ia aveesea ai lafoga a faifeau, auā o le mea mo’i a le mea lena. Sa tatau ona vaai i le mafua’aga na fai ai Tulafono nei. O lona tuaā, Malietoa ma Tuimalealiifano, o i latou ia sa Ta’ita’i i le fa’atuina o le Malo Tuto’atasi.
E lē tu la i luga o se uāniu se Malo, ma fa’alagolago i lau laau o laau e faatupe ai le Malo. O le tagata e malamalama i mea tau tupe, e faigofie ona ia malamalama i mea ia o lafoga, ae pe aisea foi e mo’omia ai e le Malo lafoga.
Tusa o le Malo e galulue pei o Robin Hood, e o aoao mai tupe a tagata e tele tupe, ona aumai lea tufatufa i tagata matitiva. O le mea lena lea e fai e le Malo. E aoao mai tupe mai ia i latou o lea e fa’alagolago i ai le Malo e ola ai, ona aumai loa lea fa’asoasoa mo tagata lautele, e fai ai atina’e o aoga, atina’e o le falema’i, o auala, o mea uma eseese ina ia si’itia ai le soifua o tatou tagata.
O a la galuega e fai e le tatou Malo? O galuega o le alofa. A o le ‘au’au atoa o le Feagaiga Tuai ma le Feagaiga Fou o le ALOFA, lea fo’i e aumai i Afioga a le Alii, ‘o le sili o nei mea uma o le alofa’, ma e le o le tagata e fai mai ‘Le Alii e, Le Alii e’, a o le tagata e faia le finagalo o le Atua. O le a le finagalo o le Atua? O le alofa lea e tā’ui uma ai Tulafono e 10 a le Atua, o lea foi ua ou fa’amatalaina atu, o le tolu o Tulafono muamua, e aofia ai ma le tausiga o le Sapati, o le alofa i le Atua; a o le Tulafono 4 – 10 o le alofa i ou uso a tagata. Na ta i papa ma’a Tulafono nei na sau ma Mose mai luga o le mauga o Sinai. E tolu Tulafono – tasi, lua ma le tolu na ta i le isi papa maa ae fitu lea na ta i le isi papa maa, na aumai eseese e le Atua ina ia silafia e Mose ma Arona le agaga o le vaevae manino o Tulafono nei.
O le alofa o le ‘au’au o mea uma nei. E te alofa i le Atua e toe alofa i ou uso a tagata auā o la foi e afio ai le Atua. Auā o lou lē alofa i ou uso a tagata, o lona uiga o lou lē alofa foi lena i le Atua, o lou alofa i ou uso a tagata, e te lē alu ai gaoi ana mea, e te lē alu ai fai ni molimau pepelo i lafoga a faifeau.
O le taimi lenei e tatau ai ona nofo lelei i lalo Tupua ma faitau le Tusi Paia, aemaise o le taimi lenei ua matua le soifua ua lalata i le mea tatou te o i ai e faamasino ai i tatou.
O le tulaga la i lafoga, o lea ua maua mai, na totogi lafoga a faifeau i taimi o Siamani ma le taimi o Niu Sila seia tau mai lava i le 1977, mea la lena na te le o iloa. A o le taimi lena o Palemia i le suafa Tupuola Efi, nofo loa ma lana Minisita o Tupe i lena taimi ma soloia lafoga a faifeau.
O lea la ua toe fa’atu atu e fa’aauau pea mea na fa’ata’oto mai i Faigamalo ua mavae seia o’o mai i lona vaitaimi, mai ia Mata’afa ma Tupua Tamasese Lealofi IV, ae o’o mai i lona taimi (Tupuola Efi) nofo loa ma soloia, i le fialelei.
Ae malie la le mea ua tupu, tiga lava ona soloia ae totogi lava e isi faifeau, aemaise faifeau papalagi latou lafoga, o la e malamalama lelei i le Tusi Paia na totogi fo’i lafoga a Iesu. Ina ua agai atu le talaiga o le Talalelei a Iesu i nuu ese po o nuu fa’apaupau, na o ai Paulo ma Peteru i Roma, o Roma o le malo ua mafiafia ai faiga faatevolo e pei o le fasioti tagata, mulilua ma ituaiga agasala matuia maoa’e eseese o tuinanau o le tino.
Lea la ua i ai tagata to’aitiiti ua liliu ma ua avea ma Kerisiano a o lea e omai ia Paulo, e fesili, Aisea e saga totogi ai pea lafoga i nei malo fa’apaupau?
Manatua la le tusi a Paulo ia Roma 13 : 1-7, lena na faamanino mai ai, ‘ia outou usiusitai i Faipule’, e leai se pule pe a lē mai le Atua, o pule uma foi o fai nei, e o’o a i pule a Malo fa’apaupau o lo o latou fa’ata’otoina atina’e mo le manuia o tagata uma, e mai le Atua. O latou foi e tetee i le pule, ua tetee foi i le Atua.
Manatua fo’i i le taimi na fa’amasino ai lo tatou Alii, na fa’alāla atu ai le pule a Pilato ae fai mai Iesu o le pule lena ei ia te oe e mai lugā, o lea la e ta’u mai ai ii o pule uma e tofia mai e le Atua. Ona fai mai loa lea o Paulo, o sauniga uma e faia ei latou nei, o sauniga a le Atua, o le e tete’e i le pule lea, ua tete’e fo’i o ia i le Atua, o le mea lea totogi tou lafoga, totogi tou tiute.
E le i faitau la i ai le toeaina lea o Tupua i le tusi a Paulo ia Roma, afai la o fa’alogologo mai, alu e faitau le tusi a Paulo, ona e lē toe sau ai lea ma aumai ni au upu fa’apea, e atagia ai le ta’ita’i seseina o oe ona o lou fialelei o lea ua e ta’alo polokiki ae le o sau ta’aloga lena i le taimi lenei, o le ta’aloga lena a matou o lo o i totonu o le Palemene.
Manatua fo’i ua sau sau le pulega o le nu’u o le Atua, ua le fiafia tagata Isaraelu i le mea lea ua tupu, o le alu na o le ositaulaga sili i totonu o le potu e sili ona paia o lo o iai le atolaau e pupuni i le ie puipui e osi ai le taulaga. Le ie puipui lea na saelua i le taimi na maliu ai Iesu e faailo ai le taeao o le Feagaiga Fou ua faataoto mai, e ala i ana lauga ma ana apoapoaiga, e pei ona momoli mai e Mataio, Mataupu e 5, 6, 7 o iina o lo o aumai ai taiala o le olaga e tatau ona ola ai le Kerisiano.
O iina foi e tāua ai le mataupu lea na lagā e le toeaina lea. Ma o le fa’agasologa mai o lea tala, na mananao Isaraelu ia i ai se latou tupu e talatalanoa atu i ai, ma va’ava’ai atu i ai pei o tupu a isi atunuu, tofia ai loa e le Atua Saulo e fai ma tupu, ae le’i umi ae toe tofi e le Atua ia Tavita. I le taimi la o Tavita ma lana vaegaau mai ituaiga eseese o Isaraelu, pe ova lava ma le miliona le autau i le 40 tausaga o lana nofoaiga.
E totogi la i le a?
E totogi i tupe ma meaai.
O lafoga e ola ai tagata, a o ai la e aumai ai lafoga?
E tilotilo le Malo i tagata ma a latou tupe maua e fua i ai lafoga.
O Tupua la a tuufaatasi lona totogi ma isi mea, e ova i le $300,000 lona totogi a o Ao o le Malo i le tausaga. Ae leai sana lafoga o totogia. A o ia le tagata pito sili ona maoa’e lona totogi e pito i maualuga lava i tulaga tofi uma o le Malo.
Lea la na taua e Tupua, na o atu le aufaigaluega e logo ia ae le manao e fai sona sao i le atina’ega o le atunuu. Lea la ua toe manatu fo’i le Matagaluega ua tatau fo’i ona toe asiasi i faifeau, auā o Tulafono o lafoga, e fa’avae i luga o lau tupe maua. Po o fea lava le auala e maua ai lau tupe maua, e le taua i lalo o le Tulafono.
A telē lau tupe maua fai sina ou sao. O le tele o lafoga ia e maua e matuā mamafa lava i pisinisi aua e fua i le tele o a latou tupe maua, e aofia ai ma tagata e tetele o latou totogi. A telē le totogi, e telē foi lo latou sao i le lafoga. E le o fa’apea mai la le Tusi Paia, vagana fa’afeagaiga, ‘aua le totogia latou lafoga, aisea? Aua o lea o lo o fa’ata’ita’i mai lava e Iesu ma le au Aposetolo sa totogi latou lafoga, le mea e tatau ona fai e ana ositaulaga.
I le tulaga o maliu, ua lava sina ‘aiga māmā ma sina ta’ita’i a le faifeau. Ave sana $200 ma nai ana pusa apa se lua. O upu lava e fai a’i. “I le taimi lenei o le koviti, malie lena itu o le ta aiga, e leai ni tatou faiga paolo e faia. O le a se tou puaa e maua, aumai ma si matou foi tama’i puaa. Afai e totoe se pusa apa lea na ta’iono apa i totonu, ia ave le tou tolu eleni aumai le matou tolu apa eleni, tatou faamavae.”
A ou toe fo’i mai la i le lafoga, o le taiala o lafoga e fua i le tupe e maua, a tagata uma lava. Nei, a $15,000 lau tupe e maua e leai se lafoga e totogia. E faalaugatasia uma ai lava tagata.
Afai e 20 matafale ose aulotu, ae taufai $15,000 uma tupe maua a matafale i le tausaga. Manatua lea ou te talanoa i le tausaga, a $15,000 la le tupe maua a le aiga, lona uiga e tusa lea e ta’i afe Tālā i le masina po o le ta’i $250 i le vaiaso. A faasoa e le aiga le $250 lea i le vaiaso e fuafua tatau i mea pito sili ona taua i le tausiga o le aiga, matua fiu e lava.
I aso la masalo a tele se tupe a le matou aiga i tuā, a o’u matua e maua i le vaiaso e lē oo i se $100, pe na o se $5 Tālā, ae a faasoa e nai matua, e lava lava aua foi e fai lava le faalifu i le taeao ma le ti laumoli, ae oo i le afiafi e tasi lava le apa eleni i le tau lea po o le lua aso o le vaiaso.
Ae a oo i le faaiuga o le vaiaso, ona aumai lea o sina pisupo 12 aunese e fai ai le toonai a nai matua e o e toonai ai ma le faifeau.
A fua la i le $1000 a le aiga, aua ou te iloa o le tele o aiga e le o’o i lena mea, pe na o le $100 i le vaiaso. O lea ou te talanoa atu i mea ia aua ou te malamalama lelei ai, ona o le olaga lea na ou ola mai ai.
O le mea ua tupu, o le telē o lou totogi, o le telē foi lena o le faaalu.
A fua i faifeau, o faifeau e tausi toatele. Afai e 20 aiga o le nuu i se Ekalesia ae ta’i $100 mai a le aiga i le faifeau i lona alofa, e maua lana $2000 i le lua vaiaso. A o aiga uma nei, pe na o le $100 po o le $200 e maua i le vaiaso. O lona uiga o le faifeau o le tagata aupito telē le tupe maua mai aiga uma o le aulotu.
O mea foi o aiga e faamoemoe i fanau i atunuu i fafo e fesoasoani mai i le alofa o le faifeau. E ono i ai foi isi e maualuga alofa, ae i ai foi isi e maualalo.
A o lea e sese le faasalalauga a Tupua….fai mai o teutusi o faaipoipoga, o oti, o saofai e aofia (i le lafoga). Na pau lava tupe e fua i ai lafoga o tupe ia e maua i le ta’i lua vaiaso o le alofa o le faifeau.
E i ai faifeau e ova atu i le $100,000 le alofa, e i ai faifeau e ova ma le $200,000 e i ai faifeau e ova ma le $500,000, e i ai foi faifeau e $750.000. O Samoa lava ia e talatalanoa toatele ai tagata i alofa o latou Ekalesia i o latou nuu i aso o le Mē – e afua ai ona iloa toatele alofa o faifeau ma o latou fanua umia saoloto e faatau ma fale e nofo totogi ai isi tagata ma a latou taavale tioata.
A tuu la i ai ma mea ia e maua mai i faaipoipoga, oti aemaise lava la aso tetele nei o Lotu a Tamaiti, o Kilisimasi ma Faamati. Manatua Faamati sa na o fala lilii, a ua ese le mea lea ua aofia ai ma taavale ma fale. A tuu i ai ma ipu a olomatutua ma toeaiina ua feoti, o ipu a nai fanau e oo atu i le $5,000 isi, e $10,000 isi, ma afai e toatele lava le fanau ma tulelei e oo lava i le $30,000. E le o i ai mea na i totonu o le lafoga.
Lona uiga e latiiti lava si mea lea e fua i ai lau lafoga, e fai ma sao i galuega fai a lo tatou Malo.
O lona uiga afai la o le faifeau e oo i le $300.000 po o le $400,000 i le tausaga lona alofa, a o le tele o le aulotu e le oo i se $20,000 le tupe maua, o lona uiga ua sili atu ona tele tupe a le faifeau, ua tatau ai ona fai sona sao.
Po o fea lava le mea e te tilotilo i ai i le itu o le amiotonu, lea e talanoa mai ai Tupua, e faigata tele ona maua ai sona ‘ai i le ituaiga finau lea e finau mai ai. A tuu i le Tusi Paia, o le a le mea la e fai mai ai le Tusi Paia, ‘Totogi au Lafoga’.
O la’u fautuaga ia Tupua, soia ia e te agai mai ii i mea e le oo i ai sou malamalama.
E i ai lava mau o lo o faasalalau faalauaitele e fa’aoloataua ai tagata ia tetee i le Malo e faapea ua gau le Malo, lea e sau i le “Observer”.
O a’u lea ua tau manatu, po o le mea ea o lo o tau manatu le toeaina i le taimi lea sa Palemia ai, a o lea ua sese mai ia te a’u.
Aua o lea e faapea mai ua gau le Malo, ona e faapea o le vaega lea a le Ofisa o Lafoga na o atu ta’u atu ua leai se tupe, lea ua mafua ai ona fai lafoga a faifeau. O lo o teena e le Matagaluega lea saunoaga a Tupua.
O le mea mo’i e igoa o le gau o le Malo, o le leai o ni oloa o le faleoloa ma leai se foreign reserve, ma a taunuu mai vaa oloa ua taufao oloa e tagata.
E leai se mea faapena o toe tupu.
Aso o Tupua e sau le vaa kamupani suauu tu tu mai tai ma aumai le avea’i a lē totogia le uta suauu o le a toe fo’i le vaa i fafo. O le mea lena e igoa o le gau o le Malo, o le leai o ni oloa. Toe faamata’u e vaa suauu.
Sa i ai le tama’i faleoloa o si o’u tama i Lepa, o le mea lena sa ola ai. O lo’u totogi i le taimi lena, o si tama’i totogi, na o le $3,000 i le tausaga, i le tulaga lea na ou i ai i le Matagaluega o Tupe. Matua o’u leiloa faasoasoa, o fanau, o le aiga, a o nai o’u matua.
E atoa le isi vaiaso o lea e iinei lo’u tamā i le matou aiga i Apia. O’u fesili i ai, o le a ea lau mea ua e nofo umi ai iinei?
Se o lea e tau su’e se pusa apa se tasi, ua leai ma se pusa apa o maua. Na ou fai isi o’u tamā a ou fesoasoani atu e su’e se pusa apa o lou faleoloa, o le taimi ou te alu ai, ona faapea foi lea o tagata ua faaaoga le position o le alii lea. Ua faaaoga lona tulaga.
E ui e le o a’u o se faipule i le taimi lea, o a’u o le tagata faigaluega a le Malo i le Ofisa o Tupe.
O le mea lena na savavali tetee mai ai le aufaigaluega se’i fai sina latou siitaga, ae folalima. Lea na fai ai le tete’e lea a tagata faigaluega, ma o le mea lena e igoa o le Malo ua gau. E le o gau foi lele na o sina tama’i gau, ae matua gau aano lava ua leai ma ni oloa, leai se foreign reserve.
E oo i le tatou ofisa i New York, le taimi lena o Amupasa ai Maiava Iulai Toma, a o le taimi lea faato’a ou fo’i mai Peleseuma lea faato’a ou toe amata faigaluega i le Matagaluega o Tupe, ou te le o iloa le pakālū lea ua i ai tatou. Ua matua bankrupt atoa le Malo.
Lea la na logo mai ai a’u e Maiava, e lafo atu se US$20,000 e faagaioi ai le latou Ofisa ua leai se tupe i le faletupe. Na ou tali i ai ‘ua lelei lea o le a alu atu’. Ave loa ma la’u faatonuga i le Bank of Western Samoa, e ‘remit le US$20,000 i le Amupasa i New York, se’i iai sina tupe e deposit atu, ae se’i faatalitali le faaletonu lea ua i ai le tamaoaiga. E lua vaiaso ae toe uaea mai Maiava, lea ua Komesina nei o Sulufaiga, fai mai ‘Se Tuilaepa, se faamolemole lea lava e le i taunuu mai lava le $20,000 Tala Amelika, ma e ta’u atu lava ia oe faamolemole toe lava o pa’u pa ia e alu ai le matou taavale’. O’u tago loa foi ave i ai la’u feau, e oo mai nei lava a ma talanoa ua ma talie ai foi lele i mea na tutupu i na taimi.
O la’u feau, ‘Maiava, o lea ua faato’a uma nei lava ona ma talanoa, lea fai mai Nigel Burr (pule o le BWS) o lea e tau su’e lava se US$20,000 o tupe mai fafo po o foreign reserves e faaliliu i ai le seleni lea e lafo atu iina, o le mea la lea, ia lava lau onosai. Ua ta’u mai nei o pa’u pa na e alu ai tou taavale, a o taavale a Samoa lea ua alu i uili u’amea ua leai ni pa’u.
E ala ona taua ia a’u mea ia, aua o lea e soifua mai Maiava e faamaonia upu nei.
O le taimi lena, ua le gata i le gau aago, a ua gau ivi.
Afe atu le isi alii o le matou nuu o Lepa i le Public Works fai mai e matautia le mea ua tupu i lea vaitaimi, fai mai na usu atu i le taeao saini, tafao loa, ua leai ni galuega, leai ni laupapa, a fai atu i kamupani ae fai mai kamupani e totogi muamua aitalafu ia ua fia tausaga o taatitia…..
E oo i Faletupe uma i Samoa ua leai se tupe ua faaaoga uma e le Malo. O le mea la lena e igoa o le gau aago. Le taimi lena ua taofi uma galuega.
A o le taimi lenei, e leai se galuega o taofia a le Malo, lea e alu lava galuega, ae o lea e sese si toeaina, o lona taimi lea e talanoa mai ai. Faato’a o’o lea o le Malo o Samoa i se luma maoa’e faapea. E le gata iinei ae ua silafia e Malo i fafo.
Na ou malaga i Sineva a o o’u Minisita o Tupe, matou ma faauluuluga o Matagaluega i le tolu vaiaso o matou auai i feiloaiga po o roundtable meetings i Sineva, matou feiloai ai ma Amupasa uma o Malo o le lalolagi ma faalapotopotoga tau tupe. Sa matou i ai ma le failautusi o tupe ma le kovana o le tatou Faletupe Tutotonu i Samoa.
Tolu lelei vaiaso o matou feiloai i le tau faatalitonuina o Malo e toe tatala mai a latou faitotoa ma a latou fesoasoani, lea ua sui le faigamalo, ua mae’a faataoto foi faiga faavae malolosi e toe atia’e ai le Malo o Samoa.
Lea la ua toe matalatala mai ai loa faitotoa o fesoasoani mai lava i lena taimi e tau mai i le taimi lenei.
A o lea ua fai mai Tupua, ua ala ona fai mea nei ua gau le Malo, ma totogi ai aitalafu a le Malo, o le ala lea o le fai o lafoga a faifeau.
O le a fai atu sina a’u faamatalaga i le mea lea, i tulaga tau tupe a le Malo. Ia malamalama lelei ai le tatou atunuu.
O le mea lenei o le taufaamalamalaina o mea tau tupe e le faigofie. E tolu Tala o le Tupe lea e faagasolo nei i le tausaga faaletupe lenei e uma ia Iuni 2020.
O le Tala o le Tupe Autu, Tala o le tupe Faaopoopo e tau kava ai tupe alu o le misela, ma le Tala o le Tupe lona tolu, lea e alu ai ma le tatou stimulus package mo le KOVATI 19.
Lona uiga la i le tuuaofai uma o le tatou Tala o le Tupe i le taimi lenei, lea o le a ou liliu ai loa e talanoa e faamalamalama.
O le aofai o le Tala o le Tupe lea e faagaioi ai le Malo e $885 miliona. O tupe ia e maua mai tatou lafoga ma nai palupaluga e ala i aisiga. E $885 miliona le aofai, e le i oo i le piliona, lea e faagaioi ai nei le Malo. Ona faapea loa lea ona vaevae.
Totogi muamua lava tatou nonogatupe po o aitalafu mo tatou atina’e eseese ona aveese lea o le $89 miliona e totogi ai tatou aitalafu uma lava e faapea e $76 miliona nonogatupe i faletupe i fafo ae $13 miliona aitalafu i totonu o le atunuu e maua ai le $89 miliona.
Ona totoe ai lea o le $796 miliona e faagaioi ai le Malo e totogi ai taavale, o penisini, telefoni etc. E 623 miliona le tupe mo le faagaioiga o le Malo, ona ova ai lea o le $73 miliona. O le tupe la lea o totoe e $73 miliona faaaoga loa i atinae.
Manatua e aveese muamua vaegatupe o aitalafu, vaegatupe e faagaioi ai le Malo, o le a le mea e totoe, fai ai loa le atinae. Aisea e faataua ai?
O atinae lea e maua ai galuega. Atinae e pei o auala, lea na matou o nei foi tatala le auala laupapa-sima-u’amea i Maliolio, na amata e le isi faigamalo e le uma, toe pala ifo ai lava na o pou.
E $73 miliona e faagaioi ai le atinae.
A o faafogafoga mai Tupua ma ana mea ia e fa’a’oloataua ai tagata, o le faamalamalamaga lena.
Lea la e totoe le $73 miliona e fesoasoani mo le tatou atinae, ae i ai le mea uiga ese lea ua i ai, e lē $73 miliona le telē o le atinae o lo o faagasolo nei.
Ua e iloa atinae ia faagasolo nei. E $176 miliona.
O lona uiga la e ova i le $103 miliona le mea lea sili atu ai. Sa tatau ona na o le $73 miliona le tupe lea totoe mai mo le tatou atinae, o tatou lava tupe, lea la e i ai ma le $103 miliona e maua ai le $176 miliona ai. O fea la e sau ai le isi $103 miliona?
O le tali, e sau mai a tatou paaga. Ua tumu i le fiafia i le vaai mai o lo o lelei ona faafoe e tatou a tatou atinae. E leai se Malo faavalevalea e aumai ni latou fesoasoani mo atinae ae vaai mai o lo o soona fai ma faaaoga lē tatau. O lea foi e omai latou Economists ma suetusi e toe siaki uma mea ia o lo o faaalu ai le afu o o latou tagata totogi lafoga.
O isi tausaga e ta’ilua missions e omai. World Bank, Ausetalia, Niu Sila. ADB, IMF e omai uma lava e asiasi mai, suesue ma faamaonia ona o ai lea ma le fiafia ma toe amata ai foi ona toe talosaga mo isi tatou poloketi o atinae fou.
A avatu a la tatou talosaga, e talia lelei, tuu ane i le faatinoga a tagata faigaluega a le Malo, o tagata aoaoina, o le aufai Tikeri sa sikolasipi ma a’oa’oina i Iunivesite i fafo.
E maualuga tele le amanaia ma le faaaloalo o atunuu tetele nei i tagata faigaluega a le Malo lea e galulue ona o le ma’ati o o latou mafaufau. Manatua e ala ona latou iloa mea ia, e malaga ane foi talanoa i isi atunuu, ae malaga mai i Samoa nei ona iloa ai lea le maualuga o le tomai o tama fanau a Samoa.
O le isi itu e tuuavanoa mai faletupe tetele nei a le lalolagi, e galulue ai tatou tagata faavaitaimi, e i ai le ADB, World Bank ma le IMF latou te malamalama ai i galuega o lo o faatino i totonu o Faletupe Tetele nei o le lalolagi.
E omai la papalagi ia ma nanu mai, pei a o le siamu ia tatou tama fanau soo se ituaiga metotia e moomia.
Ae i ai le mea lea e tatau ona oo i ai so’u leo. O le faagaioiga lea tau tupe o le Malo. E lua ituaiga teugatupe e tatau ona faataua. E ese le teugatupe, o a tatou lava tupe. Tatou Tālā e maua mai lafoga. A fuafua Tala o Tupe, ma galuega fai ia lava tupe maua.
Ae i ai le isi teugatupe lona lua mo le faatau mai o oloa, o tupe la na e matua mata’itu ia aua nei faaletonu. E faaletonu loa, oti loa pisinisi e pei o le mea lea na tupu i le taimi o Tupua, na matua leai ma se tupe na i ai mo fefaatauaiga – po o le oka mai o oloa.
O le mea na tupu, na ona omai o vaa suauu ma taula mai le taulaga ma fai mai a leai se tupe e totogi ai le uta lea o le a toe foi ma ave latou suauu ona pogisa faasoloatoa ai lea o Samoa.
Le mea lea na tuai ai ona ave le US$20,000 i o, i le tatou Ofisa i Niu Ioka. Aisea? O le ala lena na le mafai ai ona soona oka ni meaai e aumai, aua e le mafai ona totogi uma oka ia.
O kamupani tetele suauu i Samoa e tolu, o le Shell , British petroleum, ma le Mobile, o kamupani uma ia ua na o le faulalai iinei o latou tupe, ua le mafai ona ave i fafo ona o le leai o ni tatou teugatupe mo fefaatauaiga e faaliliu i ai latou tupe ma ave loa i fafo. O le tulaga tonu lena, o le le mafai ona oka mai ni oloa. Lea foi a aumai nai tamai uta taga araisa e fai taufaoga araisa ma laina tagata e kiu uumi i le fia maua o se taga se tasi ma i’u lava ina misa ma feoti ai isi tagata, i le faigamalo lea na i ai talu ai. O le mea lena e ta’u o le gau, gau aano, gau ivi. A o le nofo ma faasalalau, ua gau le Malo e leai se mea faapena o tupu nei. O lea e alu lava a tatou galuega, leai ni taufaoga meaai, e maua faasoloatoa.
O iina na faatulaga mai ai loa e le Malo i le 1984 o le a faatu le tatou Faletupe
Tutotonu a o o’u Minisita o Tupe.
O le Faletupe Tutotonu e fulisia le latou galuega i le matua mata’itu o tatou teugatupe mo fefaatauaiga, aua a faaletonu loa teugatupe, ia ona gau loa lea pei o le taimi o Tupuola Efi. O le taimi lea na o patuamoa na mafai ona oka mai. Masalo e tele tagata e le i malamalama i le mea lea, o le faataumamafa o Samoa i ivi moa e Tupuola Efi.
Sa ou faigaluega i le freezers works i Aukilani a o o’u aoga i taimi o tuuaga, o a’u mea ia na fai, a i ai ponaivi faapea, ona ave lea e vili e fai ai fertilizers, pe fai ai foi meaai a manu. A lea na la’u mai e aai ai Samoa. Ae taumafa faapitoa Tupua i steak.
O le taimi lena ta te manava mai le galuega ua supo atu ponaivi moa aua e leai ni aano. Na o le tamiti lava ma etoeto ponaivi moa. Masalo ua professional uma ai tagata i le etoeto o ponaivi moa. A tuu i ai le aniani, e faamanogi ai, tuu i ai ma le ginger, matua poto si o’u toalua e fai le mea lena. Pau a lena o freezer goods na maua i totonu o faleoloa o le atunuu.
O oloa nei na faataumamafa ai tatou e le alii lea ma lana faigamalo. O le ala foi lena na tupu ai le vevesi lea ma le PSA. Sei fai se siitaga pe 1% ae tetee foi i le latou talitonuga, o le Samoa e fia’ai loa totolo loa i itulivae ma sosolo i le manava ma aioi. Strike loa le PSA. Tolu masina o alu pea le solo tetee.
O le tau fofoina o le strike, na faatu ai loa le komiti, ae sau Tofilau Eti Alesana, Deputy a le vaega a le Human Rights Protection Party saofai ai e taitaifono, ona e leai se isi o le pati a le Malo e iloa taitai se fono ma fai se tonu. O Tofilau Eti Alesana la lena na sau fai le tonu e sii lafoga lea na maua ai tupe e totogi ai le PSA. Ua matua leiloa e Tupua le mea o le a fai. O mea ia ou te le i manao e toe oo iai. A o lea e nofo la’u faatoeaina ma eneene mai lava a’u.
Ua pei ni vale le au ulaula tapaa i lena vaitaimi ua leai ma se sikaleti e faapusa. Matua leai ma se sikaleti. Fai le fono a le komiti a le autoeaiina na i ai Tofilau, ae alu atu loa Tagaloa Pita, fai loa i ai le au toeaiina, e te maua alii Tagaloa se matou sikaleti, ae tali Tagaloa, ‘taatia mai ia te a’u’…tusi loa le note tuli ma le tama ia Komisi Ah Mau, fiu e faatali ae uma ane e leai se mea. E i ai ma isi upu na fai a Komisi ae o le a ou le faia ou te alofa isi o’u uso. E tele foi ana mea na fai.
O le tulaga lena o mea uma ia na tutupu e iloa ai le Malo ua gau. Leai ni sikaleti, taufao taga araisa ma pusa apa i’a, tausami ponaivi moa ma taofia galuega a le Malo.
E i ai se mea malie na tupu i le pamu i Taufusi i le fia ula sikaleti o le aufaigaluega. A o tu le taavale i le laina umi e fia utu le penisini, na vaaia ai le sikaleti o ula a le isi toeaina, omai uma loa le to’a 16 o le aufaigaluega ma talosaga, faamolemole pe mafai ona aumai lana sikaleti sei ula ai. Ona avatu lea o le sikaleti, uma na miti lesi, miti lesi, faasolosolo ai lava i le sikaleti e tasi le aufaigaluega.
O le mea moni, o le lē fiafia o tagata i nei faaletonu ona o le gau o le Malo, na manumalo ai le HRPP i le Faiga Palota Lautele o le 1982. O upu ia na fai i le matou HRPP… ‘o ai nei ponaua e leiloa taitai se Malo?’ Faasino lea ia Tofilau ma si toeaina o Vaai ma le matou vaega atoa o le HRPP.
Ona omai loa lea o matou o le au vale ia, faatulaga loa ma le Malo. Aua o aso na o lo’u foi vae māmā, pei na o a’u le faipule e leai se mea lelei o faia na o le tafaovale. Tofi loa a’u e Tofilau i lana Kapeneta, e gafa ma Tupe a le Malo.
Sa ou tautua loa o’u taitai ma le vaega ma faatulaga faiga faavae o le Malo na ai loa i luga le tatou teugatupe mo fefaatauaiga. O le 1984 na faatu ai le tatou Central Bank.
Uma le tausaga muamua ua $12 miliona le tatou teugatupe mo fefaatauaiga. Uma le tausaga lona lua ua $24 miliona ona faasolo mai ai lava lea le malosi o tatou teugatupe ma o lea e i ai le faiga faavae lea e i ai nei, ina ia aua nei toe i ai se faaletonu.
O teugatupe nei mo fefaatauaiga e maua mai i turisi, a o lea ua leai ni turisi.
Faapena foi ma seleni e lafo mai e tatou tagata mo latou faalavelave fai a aiga, e faafesuia’i ma tatou Tālā Samoa e mafai ai loa ona latou faaaoga, o fua o faatoaga e faatau atu i fafo, o seleni e maua mai fesoasoani mai fafo.
O le taimi lata mai na ou vaai i ai i teugatupe ia mo fefaatauaiga, e tusa ma le $600 miliona tala o lo o i ai. O lea e mata’itu lelei e le Malo teugatupe nei e lua ona e soolua mea ia. A soona faaalu teugatupe muamua ia o Tālā Samoa, e i ai le aafiaga o tatou teugatupe e faatau ai oloa po o reserves. Aisea? Leaga e maua loa lau tupe e alu faatau lau taavale. O fea e aumai ai le taavale lena? E aumai mai fafo. E le gata ina alu le cash ae aafia ai foi ma tatou tupe mo fefaatauaiga.
E soosoo tauau mea ia e lua.E ala ona ta’u atu mea ia, e matua le malamalama ai lo’u uso lea i le taimi sa Palemia ai. Ou te fiu a la e faamatala mea ia ina ua ou Minisita o Tupe, e matua le malamalama lava Tupua.
E le toe manaomia ni tagata faapea i totonu e taitaia le Malo ae lē malamamala i auala mo le puipuiga o le tamaoaiga o le atunuu. E le toe manaomia ni tagata e omai soona fai mea a le atunuu. Uma ifo ua ‘ai ponaivi moa le atunuu.
E fuafua pea e le Malo ia tulaga o tatou tupe alu ma tupe maua mai lea tausaga i lea tausaga. O le ala foi lena e le mafai le mafai ai ona nofonofo pea le Malo, ae tilotilo pea i tagata e tatau ona totogi lafoga. Aua o la foi e mata’itu tatou e isi Malo ma faapea ane, ‘tou te tagi mai e avatu tupe o afu o matou tagata totogi lafoga, a o lena e nofonofo tou tagata totogi lafoga e le o totogia se mea’. O le aiafu le mea lena.
E tatau ona ou tautala i le amiotonu, e te le vaai i sasae pe vaai sisifo ae ia e tautala i le amiotonu o le faasoa. Ma o le tagata e iloa le mea e tatau ona fai ae le faia, o le agasala lena i luma o le Atua.
O lea ua ou talanoa sa’o atu, ou te le o talanoa faapolokiki
O lea ou te talanoa i le mea e tatau ona i ai le atunuu lenei. Ua ou talanoa atu loa i tulaga faata’ita’i o le atunuu i le mea e tatau ona fai i totonu o le atunuu e moomia ai tagata e lē vaai pe maua ai ni palota. Ae e i ai lo’u talitonuga e aumai e le Atua manatu e tautala ai i le mea moni e aunoa ma le fefe.
Aua le tautala faa’ole’ole, ma le isi mea ae ou te le i tautala i mea ia, ia ota mafaufau ifo po o a ata mea na fai. Pe na faapefea mai. Manino lava upu a le Alii, ‘ae e te le i eueua le fasi laau i le mata o le isi, se’i vaai muamua ifo oe i le utupoto o lo o i ai foi i ou lava mata”.
Ou te le o ita i ana mea ia e faasalalau mai nusipepa, lea ua ou ta’u atu. I le tulaga o le Malo, lea fai mai ua gau ua tele aitalafu, lea ua ou faamanino.
E oo foi i fanua, o lona tausoga o Lemalu Herman sa Loia Sili a le Malo. Ae ua faafia ona talanoa i ai Lemalu o lena e te sese, o lea e malu eleele o le atunuu i le 102, le clause fuaiupu 102 o le Faavae. O ai na faia le Faavae? O tatou tuaa. Na taitaifono ai Tupua Tamasese Meaole. Lea foi sa ou fai atu, o se Faavae lavelave ae sa mafai ona latou faataunuuina ma maua le tōfā fetuunai na fausia ai le Faavae o Samoa.
A o lea foi la o lo o manino mai i le fesili a Toluono ma Auelua Filipo o Lepa, o Auelua Filipo o le isi Toeaina na umia le Tofi Faipule o Lepa, o lea foi ou te igoa ai i le suafa Auelua, i le tulaga o tatou tu ma aganuu, aemaise o le tatou aia tatau a alii ma faipule e tatau ona aiaia i le Faavae.
Na vave lava ona faalava Davidson ma faapea lana tala, ‘taatia mea na o aia tatau toatele e aofia ai ma alii ma faipule. Taatia i isi augatupulaga o le lumanai. Ae tatou ave ia le mea lea mo le taimi nei.’ Lea la ua oo i le taimi e fai ai, e pei ona laga mai ai le fesili, o lea la ua fai le mea lena i le taimi nei, ua leva ona sailiili i ai le Loia Sili. O ai le Loia Sili? O Lemalu Hermann Retzlaff, e tausoga ma Tupua.
E ma’ai le Tofa i le afioga ia Lemalu. Lea na ia faasalalau mai, pau lea o le faiga ua tatau ai mo le puipuiga o a tatou tu ma tatou agaifanua, e faapea ona i ai Tulafono Toe Teuteu e tolu o lo o soalaupule nei.
Lea la e tau fesili mai, o le tali lena. O le a le mea ua fai ai i lenei taimi?
E le i faato’a faia nei ananafi Tulafono ia.
Ua leva ona laga mai mataupu ia i le lima tausaga talu ai e Faipule. O lea la ua oo i le faaiuga o le Paeaiga lenei, ma ua amata ona faatalanoa loa le ata muamua o le Tulafono.
Lea la ua soalaupule nei. O le upu a le Faamasino Sili na fai, ou te faia a’u iuga ma loimata ona o a’u faaiuga e agai i le Faavae. Mea la ia e faataoto ma i totonu o le Faavae. A o a mea o lo o faataoto mai le Faavae?
O aia ta’ito’atasi. Ou te saini i luga o la’u tautoga na fai i luma o le Atua ma le tagi o loimata. Aisea? Ona ua le amanaia pulega mamalu a alii ma faipule.
O le tali lena. O le faaiuga foi lenei o la’u talanoa atu i le tou polokalame o le asō.
