TUMAU PEA SAMOA I LE LI’O O MALO O LE TAUPULEGA
Tusia: Tusiga Taofiga
O Samoa o lo o tumau pea i le li’o o Malo o le Taupulega, e eseese ai ma le Malo o Fiti.
Na fa’amanino ai e le Palemia, Tuilaepa Sailele Malielegaoi le mafua’aga tonu na ave’ese ai le Malo o Fiti mai le li’o o Malo o le Taupulega, ona o faigamalo fouvale a lana fitafita.
“Pei o le vāvā mamao o sasa’e ma sisifo le mea lea sa tupu ia Fiti ma le mataupu lea e talanoa mai ai nei Tupua,” saunoa ai Tuilaepa.
“O le mea sa tupu ia Fiti, o le fouvale a fitafita po’o le ami, ua omai ma fana tuli ‘ese le Malo, ae fa’alāla fana i le Malo, o ‘ese loa lea o le Malo sa i ai i lena taimi, ae nonofo a latou ma pulea le Malo, ma o le tulaga mata’utia lena o Malo ae i ai ni a latou ami, auā e alu alu a, oso ane le manatu o le ta’ita’i au, sau loa fai ituaiga uiga fa’apea, e fōua ai le Malo. O le ‘ese’esega la lena o le Malo o Fiti ma Samoa.”
O lea fa’amalamalamaga na aga’i e fa’asa’o ai le finagalo o le sa avea ma Ao o le Malo ia Tui Ātua Tupua Tamasese Efi, ina ua fa’aali lona popolega i le ono aveesea ai o Samoa mai Malo o le Taupulega.
Saunoa le Palemia e fa’apea, e le aveesea Samoa mai le Malo o le Taupulega, ona o lo o lelei ana pulega Malo, ma o lo o sologa lelei ana atina’e ma le soifua lelei o tagata.
“O Samoa e leai sana ami, ou te fa’amālo ia Tupua Efi i lona naunau e aumai le vaega lea, ua ou iloa ai, le vaivai tele o le tulaga lea e mafaufau ai, e leai se mea fa’apena e tupu ia Samoa, o lea lava e malosi ma i ai le pulega mamalu a ali’i ma faipule aemaise a latou tama fanau, o lo o i totonu o le Malo, pei o le Matagaluega o Leoleo, ma so’o se
Matagaluega a le Malo, e o’o lava fo’i i le tautuaina o le Malo, e matuā vāvā mamao i sini le manatu lea e aumai.
“Ou te iloa o se manatu fo’i lea e tau fa’atāua ai lona finagalo, ae ua atili ai ona Matagā. Ana fa’apea e tausi mamalu, ma ‘aua le toe so’ona aga’i mai i mataupu fa’alemalo, semanu e lē iloa e tagata lona lē malamalama i mea ia e talanoa mai ai.
“O le tulaga fo’i o Malo o le Taupulega, o lea ou te saofa’i ai i totonu i fonotaga ma felafolafoa’iga e pei fo’i ona faia i le Malo Aufa’atasi, ta’ilua la tausaga e feiloa’i ai matou, ae i ai lava le Komiti e faia pea latou fonotaga, o le Komiti fo’i lea o le Ministerial Action Group lea e fa’aigoa o le CMAG, latou mea ia e tilotilo i ai.
“Sa ou auai muamua, a’o lea ua toe tofia ai a’u, a’o matou fono ai i Peretania, ou te saofa’i ai totonu fa’atasi ai ma fa’auluuluga o isi Malo, ae Failautusi Aoao ai le tama’ita’i lea o Patricia Scotland, lea e tau fesili ai le vaega lea o loia, ae sa tatau ona omai e fesili mai ia te a’u, po’o le Matagaluega fo’i o le vaifafo.
“O le mataupu tele sa matou talanoa ai i Fiti, auā na a’afia ai Fiti ona o le tulaga lea i le fou mālo, ae fa’aaoga ai a’upega ma tuli ‘ese ai Malo na fa’atuina e fa’avae i luga o mālo fa’atemokalasi, e le gata i lena a’o le avatu i totonu o fa’amasino, ua le’o toe i ai so latou tuto’atasi, auā fo’i ua leai se temokalasi, ae pei ua pule aoao lava Frank Banimarama ona o lea e fealua’i ma fana, o lona uiga e na’o na au ‘ese lava o lea, patatū ai le pulu fana.
“E ‘ese mamao a la le mea lena ma tatou, masalo ana le o’o i ai lona finagalo, e le iloa le telē o le vāvā mamao o sasa’e ma sisifo mea ia e lua, o mea la na sa talanoaina i le matou fonotaga, o mea ia na tupu i le Malo o Pakistan, mea ia na tutupu i le Malo o Zimbabwe, lea sa pule fa’asoloatoa ai le ami a le toeaina lea o Robert Mugabe e fa’apena fo’i la i Fiti, lea ou te malamalama lelei i tulaga ia e lagā mai i le tatou Malo, a’o le mea e tilotilo i ai le Commonwealth o Malo Fa’atemokalasi ua le’o toe temokalasi.
O le faatemokarasi, e muamua fa’atino a latou Palota i lalo o Tulafono ua pasia e le Palemene, i auala fa’atemokalasi, lona lua ia i ai le sa’olotoga o tagata, ia latou tapua’iga ‘aua le fa’alavelave fua le Malo e taofi tapua’iga a isi ekalesia, lea e faatino e Samoa. O lea e pule a le tagata ia e le’o taofia e le Malo.
“Tolu o le tulaga lea o le sa’olotoga o Nusipepa e fa’asalalau ai a latou mea, ua tou vaai i tala ia e fa’asau i le Observer, oka oka e, o o ni leoleo e loka mai? E leai.
“Ma le fa, o le tuto’atasi.
“O le a le mea e fua i ai le tuto’atasi o le fa’amasino, e fua i tofiga ina ia umi le taimi o tula’i mai pea i o latou tofi. Manatua la o lea sa toe fa’aumi mai e matou le tautua a le Afioga ia Tiāva’asu’e pei a o le 2002 lea na fa’aumi ai le latou tautua mai le 62 tausaga i le 68, o le 68 tonu lea na litaea ai loa le Afioga ia Tiāva’asu’e. Vaai la i le telē o lenei avanoa, a’o la lava e fai a latou.
“E tigā a ona tele moliaga o mea fa’aletonuga o la e fai e isi fa’amasino, a’o la e pule a latou se’i vagana fo’i la ua tapā e se fa’amasino lona aiā i lalo o le Fa’avae, ona tapā ai loa lea o le Palemene e fai se i’uga ona fa’atoā la’a mai loa lea o le mataupu i le Palemene, a’o la e i ai lava i le Judicial
Service Commission, o le Komisi lea e fa’atonutonuina le fa’afaigaluegaina ma le fa’ate’a po’o le fa’amalōlō tumau (hire and fire) o le auaunaga a le fa’amasino.”
