FALEAOGA FOU MO LE AFIOAGA O MANONO-UTA
Tusia: Taunuuga Toatasi
E $437,000 le tau atoa o le faleaoga fou o Manono uta lea na tatala i le vaiaso ua te’a.
O lea faleaoga na faatupe e le Malo agalelei o Iapani, lea e valu potuaoga ma o le a a’oa’oina ai fanau e 283 o le afio’aga, e aofia ai ma le potu tusi, potu komepiuta ma le potu fono mo faiaoga.
O le Konekarate a le Ah Ben na gafa ma le fausia o lenei galuega tele.
O le tasi lea o fa’amuamua a le Malo, ia unaia le lelei o a’oa’oga e aofia ai le lava tapena o faleaoga ia mamā mo le soifua maloloina o fanau, a’o faiaoga fo’i ia lava tapena mo le a’oa’oina o tamaiti, ina ia si’itia ai fanau Samoa e atamamai ma i’u lelei aoga, auā o le lumana’i lea o Samoa mo a taeao.
I le saunoaga autu a le Minisita o ‘Aoga ia Loau Keneti Sio, sa ia fa’amamafa ai le tāua o le mautu lelei o falea’oga mo aoga a fanau o le atunu’u.
Na momoli foi lana fa’afetai i le Malo o Iapani aemaise o le afio’aga i le lagalaga i mea lelei ma le va’ai alofa i le lumanai o fanau.
“O lea foi tatou te molimauina le malae ta’alo a le Aoga, talosia ia to’atele ni tama o le Manu Samoa e maua atu i le malae lea.”
O le ‘auga ma le fa’amoemoe lea o le Malo e pei ona saunoa Loau, ina ia fa’aosofia ai lagona fia aoga o le tamaititi pe a va’ai atu e manaia ma aulelei le faleaoga.
“Afai e mautu ma lelei le faleaoga, o le toa’aga foi lena o fanau e omai i le aoga.”
Na ia fa’afetaia fo’i le tofi o le Itumalo, Leiataua Laki ma le Komiti o le Aoga, ona o le mata’ala i fesoasoani lea o lo o ofoina mai e pa’aga a le Malo.
Na fa’afetaia e le Tofi o le Itumalo le Malo, ona o ana faigapa’aga ma atunu’u i fafo lea ua manuia ai le tele o afioaga, i le fausia lea o fale’aoga.
Saunoa Leiataua, ua le tasi ae ua atu lasi faleaoga ua fa’atupeina e le Malo o Iapani, lea ua manuia atu ai ma lo latou nuu o Manono-uta.
“Fa’afetai o lea ua taulau o le faamoemoe, o se galuega sa moe miti i ai, ona o le naunau i alo ma fanau o le afioaga, ina ia ave i le aoga, ina ia maua le poto ma le atamai e saili ai se latou lumanai manuia.”
Ua o gatasi nei galuega ma atinae ma vaaiga mamao i totonu o le Tusi Taiala mo le Atinae o Samoa 2016/2017-2019/2020 i le Taunu’uga Mo’omia e 7 mo Aoga ma A’oa’oga lelei ia si’itia.
I lea taiala e mo tagata Samoa ia a’oa’oina ma i ai le sao taua i so’o se atina’e.
