OFISA O LE SO’OUPU; Ua toe faaopoopo le fa (4) vaiaso e faaauau ai le faamamaluina ole Poloaiga mo Faalavelave Tutupu Faafuasei mo le KOVITI 19 e pei ona faamaonia e le Kapeneta ma faatulafonoina e le Ao Mamalu ole Malo Tuimaleali’ifano Va’aletoa Sualauvi II ile afiafi nei.
Peitai ua faamaonia foi ele Kapeneta nisi o teuteuga e tatau ona usitaia se ia aulia le Aso 30 o le masina o Me e pei ona faatulafonoina ele Poloaiga;
O nei teuteuga fou e aofia ai;
i. Le faaauauina o le Faasalalauga mo Faalavelave Tutupu Faafuasei (Proclamation of the State of Emergency) mo le isi fa (4) vaiaso seia aulia le Aso Lua 2 Iuni 2020;
ii. Tuaoi Faavaomalo (International Borders)
a) Le faaauau pea ona tapunia tuaoi faavaomalo mo le isi 4 vaiaso sei vagana faigamalaga faapitoa e muai faamaonia e le Kapeneta;
iii. Femalagaiga Faapitoa
Le faaauau pea o tuutuuga ua iai nei mo malaga vaalele o loo aumai ai uta o oloa ma vailaau manaomia, air ambulance faapea foi i vaa lau oloa ma suauu.
Femalagaiga i le va o Samoa ma Niu Sila
a) Le amata faatagaina faasolosolo ona toe foi mai o tagata o loo nofomau i Samoa (returning residents) mai Niu Sila ma o loo umia pepa malaga o vaalele e toe foi mai, pe a mautu tapenaga a Samoa mo le mafai ona faia Covid19 test i Samoa nei;
e) E tatau ia i latou uma nei ua sauni e toe foi mai ona faia Covid19 test i le 3 aso ao lei malaga mai i Samoa;
i) E toe faanofoesea (quarantine) i le 14 aso i latou nei pe a taunuu mai i Samoa;
o) E le taliaina nisi e malaga mai i Samoa mo ni faalavelave poo ni faamoemoe mo vaitaimi pupuu.
Femalagaiga i le va o Samoa ma Amerika Samoa
a) E tatala femalagaiga i le va ma Amerika Samoa mo na o Aso Faraile o vaiaso taitasi;
e) E tatala nei femalagaiga mo na o i latou e nofomau i Amerika Samoa e toe fia foi i Amerika Samoa, faapea tagatanuu o Samoa o loo ua poloka i Amerika Samoa talu mai ona faamamaluina vavao mo le faamai Covid19;
i) E faatinoina pea le siakiina ma le faanofoesea mo le 14 aso o i latou uma e malaga mai Amerika Samoa.
Femalagaiga i le va o Samoa ma Tokelau
a) E faaauauina pea aiaiga o loo iai mo femalagaiga i le va o Samoa ma Tokelau.
iv. Tapuaiga (Lotu)
a) Le tatala o tapuaiga (lotu) mo le nā o le tasi le sauniga lotu i le Aso Sapati;
e) Le taofia o potopotoga i fafo o malumalu tapua’i ao le’i amata pe mae’a foi le sauniga poo nisi lava faamoemoe o Ekalesia, e ese mai i tapuaiga lotu masani;
i) E taatia atu i Faafeagaiga e taulamua i le faamamaluina o le va o tagata (social distancing) i totonu o malumalu tapua’i.
v. Aoga
a) Le toe tatala o aoga uma (aoga amata, aoga tulagalua, kolisi, Iunivesete ma aoga faaauau) e afua atu i le Aso Gafua 4 Me 2020 i taimi masani;
e) Le taoto atu i le Matagaluega o Aoga, Taaloga ma Aganuu, Puleaoga uma o Aoga Ekalesia ma Aoga Tumaoti ina ia faamalosia le mulimulitaia o le va o tamaiti (social distancing) i totonu o potu aoga mo le puipuiga o le pipisi ai o le faama’i;
i) Le faamalosia ona faaaogaina taavale a matua e momoli ai fanau ma toe piki ai pe a tuua le aoga e foia ai le pipisi o le faama’i;
o) Le faaitiitia o le soona tumutumu o tamaiti aoga i nofoaga faitele e pei o fale faatali pasi ma maketi;
vi. Pisinisi ma Faafiafiaga
a) Le tatala o faleaiga mai le 6:00 i le taeao ae tapunia i le 10:00 i le po;
e) Le tatala o matafaga ma vaitafe mo tafaoga ma taelega i aso o le vaiaso sei vagana le Aso Sa e faaauau pea ona tapunia;
i) Le tatala o auaunaga a fale talimalo (hotels) sei vagana ai le sami e tapunia pea i Aso Sa;
o) Le tatalaina o Supamaketi i le Aso Sa mai le 3:00 i le afiafi i le 7:00 i le po;
u) E faaauau pea isi aiaiga o iai nei seia toe maua atu se isi faaaliga.
vii. Pasi Laupasese
a) Le tatala o le aofaiga masani o pasese mo pasi la’u pasese uma;
e) Le mulimulitaia pea o numera faatagaina faaletulafono mo le aofai o pasese o pasi mo le saogalemu.
viii. Vaa mo Malaga i Savaii ma Upolu
a) Le tatala o pasese i luga o vaa ae mulimulitaia pea le va o tagata (social distancing) mo le puipuiga o le faamai;
e) Le tatala o le malaga a vaa mai le Aso Gafua i le Aso Toonai;
i) Le faaauau pea ona tapunia faigamalaga i Aso Sa.
ix. Taaloga e lē Pa’itino (Non-contact sports)
a) Le tatala o taaloga e lē paitino e pei o tenisi, ta polo ma isi, faapea avanoa faamalositino;
e) E taatia atu i le Pulega o nei taaloga e faamalosia pea le va o tagata (social distancing) mo le puipuiga o le faama’i;
x. Taimi Faigaluega a le Malo
a) Le toe foi o taimi faigaluega a le Malo i taimi masani mai le 9:00 i le taeao i le 5:00 i le afiafi ma faatino aiaiga masani o le faafoeina o galuega a le Malo;
e) Le taoto atu i le Komisi o Galuega a le Malo e faafoeina nei aiaiga e aofia ai ma Faalapotopotoga a le Malo;
xi. Vaa Fagota
a) Le tatala ona aumaia o vaa fagota mo le utuina (refuel) faapea le lauina o uta ma le tuuina atu o vaiinu ma meaai mo le auvaa;
e) E tailua vaa e aumai i le aso mo le faatinoina o nei tulaga ae faatumauina pea isi aiaiga mo le faatinoina o siaki mo le soifua maloloina;
i) E tapu ona ō ese le auvaa mai le vaa;
o) Faamalosia le tuuina mai o le polokalame o vaa fagota e fia ofi mai i le atunuu i le Pulega o Uafu ma Taulaga, Matagaluega o Faatoaga ma Faigafaiva, Matagaluega o Leoleo ma Falepuipui ma le Matagaluega o le Soifua Maloloina;
u) Ia le i lalo ifo o le 28 aso talu ona tuua e le vaa fagota le uafu mulimuli sa taula ai, poo ni fesuiaiga o le auvaa;
f) Ia faailoa mai le talosaga a soo se vaa fagota e fia ulufale mai i Samoa i le lima (5) aso ao lei taunuu mai i le uafu i Matautu. Ia logoina le Matagaluega o Faatoaga ma Faiga Faiva ma le Pulega o Uafu ma Taulaga;
g) Tapu ona fesuiai auvaa i ogasami poo nisi galuega faatino i luga o le vaa e aofia ai isi vaa fagota.
xii. Le faamalosia o le tuuina atu o polokalame faalauiloa i le atunuu mo le puipuiga lautele mai le faamai;
xiii. Le amata faatino o nei suiga e afua atu i le Aso Sa 3 Me 2020 seia toe iai se isi faaaliga;
xiv. Le taoto atu i Matagaluega eseese o loo aafia i nei suiga ina ia faamalosia pea le va talafeagai o tagata (social distancing) mo le puipuiga o le faama’i;
xv. E faaauau pea isi aiaiga o Poloaiga o Faalavelave Faafuase’i na mua’i tuuina atu.
O lenei faaiuga na faia i lona tulaga faanatinati e tusa ai ma le Vaega 38(1)© o le Faavae o le Malo Tutoatasi o Samoa.
Mo le silafia e le atunuu ole atoaga lea ole Poloaiga ua teuteuina ua toe lomia atu;
1. Vaiaso Anapogi ma le Tatalo:
Ia faamamaluina e aiga uma o Samoa, le vaiaso anapogi ma tatalo mai le Aso Sa 22 Mati 2020 i le Aso Sa 29 Mati 2020, mai le 6.00 i le taeao seia aulia le 12.00 i le aoauli.
2. Femalagaiga Faavaomalo vaalele ma vaa a lalo:
(1) Sei vagana ni tulaga faanatinati e tatau ai ona faataga e le Kapeneta, e tapunia femalagaiga faavaomalo i vaalele.
(2) Mo se faaiuga a le Kapeneta e faatauaina vaega nei:
(a) Mo pasese e toe foi mai i Samoa:
(i) e na o tagata nofo mau i Samoa (returning residents) ma o loo umia pepa malaga toe foi mai mo vaalele e faataga ona ulufale mai
(ii) ua maea taimi faatagaina o pemita;
(iii) o auaunaga manaomia mo Samoa;
(iv) ma isi mafuaaga e tatau ai ina malaga mai i Samoa.
(e) O aiaiga nei e tatau ona mataituina mo pasese taitasi:
(i) Faamaoniga sa fai se COVID 19 test i totonu o le tolu (3) o aso ao lei malaga mai i Samoa; ma
(ii) Faamaoniga sa nofoesea (quarantine) mo le 14 aso a o le malaga mai i Samoa;
(iii) E tatau ona toe faanofoesea pe a taunuu mai i Samoa mo le isi 14 aso.
(3) Ua tapu le toe ulufale mai o soo se ituaiga vaa sei vagana ai:
(a) vaa oloa ma vaa suauu; ma
(e) vaa fagota mo le la’u ese o a latou uta (offload) ma le utuina (refuel) ma mo sapalai moomia.
(4) Mo vaa fagota e faatagaina i lalo o le (3)(e) o aiaiga nei e tatau ona mataituina:
(a) e tai lua (2) vaa i le aso ma ia usitaia siaki mo le soifua maloloina (quarantine); ma
(e) tapu ona o ese le auvaa mai i le vaa; ma
(i) faamalosia le tuuina mai o le polokalame o femalagaiga o vaa fagota e fia ofi mai i le atunuu i le Pulega o Uafu, Matagaluega o Faatoaga ma Faigafaiva, Matagaluega o Leoleo ma Falepuipui, ma le Matagaluega o Soifua Maloloina; ma
(o) ia lē i lalo ifo o le 28 aso talu ona tuua e le vaa fagota le uafu mulimuli sa taula ai, poo se fesuiaiga o le auvaa a o lei taunuu mai i le uafu i Matautu; ma
(u) ia faailoa mai le talosaga a soo se vaa fagota i le Pulega o Uafu ma le Matagaluega o Faatoaga ma Faigafaiva e fia ulufale mai i Samoa I totonu o le lima (5) aso ao lei taunuu mai i le uafu i Matautu; ma
(f) e tapu le fesuiai o auvaa i ogasami poo nisi galuega faatino i luga o le vaa e aofia ai isi vaa fagota.
(5) Ua faatonuina le Matagaluega o le Soifua Maloloina ina ia matua faamalosia puipuiga mo tagata uma.
3. Potopotoga i nofoaga faitele:
(1) E tatala o tapuaiga (lotu) i tuutuuga nei:
(a) e tasi le sauniga lotu i le Aso Sapati (faataitaiga, SDA – Aso Toonai, EFKS – Aso Sā); ma
(e) e fautuaina le fuafuaina lelei le vā o tagata taitoatasi; ma
(i) e fautuaina pea le taofia o potopotoga i fafo o malumalu tapuai ao lei amata pe maea ai foi sauniga, po o nisi faamoemoe o Ekalesia e ese mai i tapuaiga; ma
(o) e lafo atu i faifeau latou te faamalosia le faamamaluina o le vā o tagata i totonu o malumalu tapuai.
(2) E tapu le faia o ni potopotoga i nofoaga faitele uma e sili atu ile lima (5) tagata mo faamoemoe nei:
(a) maliu, saofai, aso fanau, faaipoipoga, faatasiga aiga (reunion); ma
(e) faaulufalega poo le umusaga.
(3) E tapu ona faia ni taaloga fai tupe (faataitaiga bingo ma casino).
(4) E tatala taaloga lē pa’i tino (faataitaiga golf, tenisi, volipolo, fale koleni po o le gym), ae tapu pea ta’aloga pa’i tino (faataitaiga lakapi).
(5) E tatala le taeele i matafaga ma vaitafe i aso uma o le vaiaso ae tapu i le Aso Sā.
(6) Ua tapu nei ona toe tatala ni fale kalapu, faletifaga ma falepia, ma soo se ituaiga faafiafiaga uma e ono tumutumu iai tagata.
(7) O pā pia i totonu o fale talimalo e mafai ona tatala ma tapuni i taimi masani.
(8) E tatala fale’aiga mo taumafataga ma le oka e aveese (take away) mai i le 6.00 i le taeao i le 10.00 i le po ma e tatau i faipisinisi o fale’aiga ona mataituina ma faamamaluina le 2 mita o le vā o tagata (social distancing).
(9) Ua tapu nei ona toe tumutumu tagata i nofoaga o femalagaiga e pei o malaevaalele ma uafu, se’i vaganā o tagata e malaga.
4. Femalagaiga faalotoifale:
Pasi ma Taavale laupasese
(1) Mo auaunaga o pasi:
(a) ua tatala le femalagaiga o pasi i taimi masani; ma
(e) e tapu le feoai o pasi i le Aso Sā.
(2) E faataga le faaaogaina o taavale la’u pasese laiti, e i lalo o le lima (5) pasese, ma taavale a aiga pe a moomia.
Vaa
(3) O femalagaiga i tagata lautele i luga o Vaa i le vā o Upolu ma Savaii i lalo o aiaiga nei:
(a) e tapu le feoai o vaa i le Aso Sā; mai
(e) mai le Aso Gafua i le Aso Toonai e feoai vaa i taimi masani;
(i) e tatau i le Ofisa o Va’a ona mataituina ma faamamaluina le 2 mita o le vā o tagata (social distancing) i taimi o femalagaiga.
(4) Mo tagata uma e 60 tausaga ma luga atu, e fautuaina pea le usitaia o aiaiga o le poloaiga 8 (malaga mo se togafitiga matuā moomia mo mafuaaga tau soifua maloloina).
(5) Soo se tagata penisione e malaga mo se mafuaaga e i fafo atu o aiaiga o le Poloaiga 8, o le a lē agavaa i le malaga fua i lalo o le tulaga tau penisione.
5. Maketi, Faleoloa, Supamaketi ma Pisinisi:
(1) Mo maketi uma:
(a) e aofia ai maketi i Savalalo, Fugalei, Salelologa, Vaitele, Taufusi ma Afega, maketi o i’a ma isi ituaiga maketi i nofoaga faitele:
(i) e faatapulaa itula e tatala ai mai le 6.00 i le taeao i le 6.00 ile afiafi; ma
(ii) ua tapu ona toe momoe ai nisi i nei nofoaga i le po;
(e) e tapu ona tatala i le Aso Sā e aofia ai:
(i) maketi i Savalalo, Fugalei, Salelologa, Vaitele. Taufusi; ma
(ii) maketi o i’a i Savalalo, Vaigaga, Fasitoo-Uta, Afega ma so’o se faatauga i’a i autafa o auala; ma
(iii) so’o se ituaiga maketi i nofoaga faitele.
(2) Mo Supamaketi:
a. mai le Aso Gafua i le Aso Toonai e tatala i le 6.00 i le taeao – 6.00 i le afiafi; ma
(e) mo le Aso Sā, e tatala i le 3.00 i le aoauli – 7.00 i le afiafi; ma
(i) mo faleoloa laiti, e faaauau fefa’atauaiga i taimi masani.
(3) E tapu ona tatala soo se pisinisi i le Aso Sā vagana:
(a) faleoloa laiti, e fa’aauau fefa’atauaiga i taimi masani; ma
(e) Supamaketi i taimi faatapula’a ua taua i luga i le (2)(e).
(4) Mo le faatinoina o lenei poloaiga:
(a) o le “Supamaketi” e faatatau i fale oloa e faaoga faitotoa e ulufale atu ai le tagata e fa’atau ai oloa (groceries ma isi);
(e) “faleoloa laiti” o faleoloa e le o iai ni faitotoa mo le ulufale o tagata ae tu le tagata faatau i fafo o le faamalama ma fai lana faatau.
6. Faatau oloa i magaala ma tafaala:
(1) Ua tapu nei ona toe fa’atau ni oloa i magaala ma tafaala ole taulaga i Apia, Vaitele ma Salelologa.
(2) Ua matuā tapu ona toe faatau savali e tamaiti ni oloa i soo se taimi.
7. Aoga:
(1) E tatala uma aoga i Samoa i le aso Gafua 4 Me 2020 seia iai se isi faaliga.
(2) E tuuina atu i le Matagaluega o Aoga, Taaloga ma Aganuu:
(a) tapenaina o polokalame ma faatualagaga o aso taitasi e faatino ai aoga mo aoga uma (ekalesia, aoga tumaoti); ma
(e) unaia le mulimulitaia o le va o tamaiti (social distancing) i potu aoga e atagia ai puipuiga mai le faamai.
(3) E fautuaina matua i le faaaogaina o taavale e momoli ai fanau pe a mafai, ina ia faaitiitia ai le tumutumu i pasi ma nofoaga faitele.
(4) Ia faaiititia le soona tumutumu o tamaiti aoga i nofoaga faitele e pei o fale faatalipasi ma maketi.
8. Falema’i, ma’i, tausima’i ma siigama’i:
(1) Ia faaitiitia le soona feoai, ae maise i latou ua 60 tausaga ma sili atu le matutua, se’i vagana ua mātuā moomia ona vaai se fomai.
(2) Ua matua tapu ona toe ulufale se tagata i soo se falema’i sei vaganā ai, ua moomia ona vaai se foma’i.
(3) Mo le tagata ua taofia:
(a) ua nā o le tasi le tagata tausima’i e faataga; ma
(e) e nā o le toalua (2) tagata e faataga mo asiga.
(4) Ua taofia ona toe auina atu i Niu Sila o gasegase mo togafitiga i lalo o le Polokalame masani le Malo, seia toe iai se isi faaliga.
9. Aiaiga mo galuega a le Malo:
(1) Ia faatino e le Komisi o Galuega a le Aufaigaluega a le Malo, (“Komisi”) ni aiaiga e alagatatau ona faatino mo tagata faigaluega a le Malo, e faitiitia ai le ono pipisi o le fa’ama’i e pei o le galulue mai i le fale e faaaoga ai initaneti.
(2) O aiaiga e faataatia e le Komisi, e aiaia uma ai Ofisa ma Matagaluega a
le Malo.
(3) Ua taofia uma malaga faalemalo i atunuu i fafo seia toe iai se isi faaaliga.
10. Tiute o le Matagaluega o Soifua Maloloina:
Ia faatinoina e le Matagaluega o Soifua Maloloina le unaia o polokalame falauiloa o le puipuiga o le pipisi o le fa’ama’i o le Korona Vairasi 19, mo le nofo silafia o le atunu’u.
11. Malosia’ga o le Matagaluega o Leoleo:
Ua tuuina atu ile Matagaluega o Leoleo le malosiaga e faatino ai le mata’ituina o lenei Poloaiga.
12. Malosiaga faapitoa o faauluuluga o Matagaluega:
(1) Ua tuuina atu le malosiaga i faauluuluga o Matagaluega ma Ofisa uma o le Malo, o loo iai ā latou malosiaga fa’aletulafono e faatino ai ia malosiaga faaletulafono, faapea ai, malosiaga o faauluuluga e faatino ai Fuafuaga Mamao a le Malo ile tali atu i le Korona Vairasi 19 (Response Matrix).
(2) E mafai e le Kapeneta ona faia Tulafono Faatonutonu poo tulafono laiti mo le faatinoina o gaioiga uma e Ofisa a le Malo mo galuega e tatau mo le soifua saogalemu o tagata, ma mo le tausiga o le nofo filemu.
13. Pepa faailoa o le Solia o se Poloaiga Faalavelave Faafuasei:
(1) E mafai e leoleo ona tuuina atu le Pepa Faailoa o le Solia o se Poloaiga i soo se tagata ua solia aiaiga o Poloaiga ua faataoto i totonu o Poloaiga mo Faalavelave Faafuasei.
(2) O Pepa Faailoa i lalo o lenei poloaiga e tatau ona faamaonia e le Komesina o Leoleo.
(3) Soo se tagata ua tuuina atu i ai se Pepa Faailoa o le Solia o se Poloaiga, e mafai ona ia totogi le sala tupe ua ta’ua i lea Pepa Faailoa, i totonu o le 24 itula talu ona tuuina atu iai le Pepa Faailoa.
14. Faasalaga:
(1) E solitulafono le tagata e lē usitaia Poloaiga uma ua taua i luga, ma o faasalaga nei:
(a) sala tupe:
(i) mo tagata ta’itoatasi, $200 mo le solitulafono muamua, ma le $500 i aso ta’itasi e faaauau ai lea solitulafono; ma
(ii) mo faalapotopotoga faatulafono, $5,000 mo le solitulafono muamua, ma le $7,000 i aso ta’itasi e faaauau ai lea solitulafono; poo le
(e) taofia i lalo o le vaaiga a Leoleo e lē sili atu i le 3 masina; poo le
(i) taofia i lalo o le vaaiga a Leoleo ma le sala tupe i lalo o le parakalafa (a).
(2) O le totogiina o se sala tupe atoa i lalo o lenei poloaiga, o le a lē molia ai se tagata i se faamasinoga o soligatulafono mo le faasalaga i lalo o le Pepa Faailoa o le Solia o se Poloaiga i lalo o le poloaiga 13.
(3) A faamaonia le solitulafono a se tasi i lalo o nei poloaiga i luma o se faamasinoga o soligatulafono, e mafai ona faasala i se sala tupe e le sili atu i le $10,000 poo le fale puipui e lē sili atu i le 12 masina, poo faasalaga uma e lua.
15. Komiti Fautua – Mataupu 108:
O le Komiti Fautua ua faatuina i lalo o le Mataupu 108, e puipuia mai i ni tagi faaletulafono e ono tulai faasaga i le Komiti i le faatinoina o tiute fai i lalo o le Mataupu 108.
16. Taualumaga:
(1) Mo le nofo sauniuni mo se tulaga ogaoga mai auga o lenei faamai Korona Vairasi-19, ia mafai ona faataatia ese Tulafono o taualumaga a le Palemene ma le Kapeneta, ina ia mafai ai pea ona faia ni faaiuga tatau mo le atunuu.
(2) Mo faaiuga tatau, o poloaiga i luga e le taofia ai ni taualumaga faanatinati o le Palemene ma le Kapeneta i lalo o malosiaga o le Tulafono Faavae.
17. Faatupeina:
O le faatupeina o fuafuaga a le Malo i lalo o lenei Poloaiga e faatupeina mai vaegatupe talafeagai a le Malo.
Ua soloia le Poloaiga Faalavelave Faafuase’i Numera 9 o le aso 17 Aperila 2020.
O lenei Poloaiga e amata faamamaluina i le aso 3 Me 2020.
