AUTU: ‘E TATAU ONA PUIPUIA FANAU MAI GALUEGA E LE TALAFEAGAI’
O le Aso Faamanatu e tetee atu i le faafaigaluegaina o tamaiti i galuega e le talafeagai sa faapea ona atofaina i le masina o Iuni 2002 e le Faalapotopotoga o Leipa Faavaomalo (ILO). O le sini autu o lenei faamoemoe ina ia faalauiloa ma aoaoina tagata lautele i le ogaoga ma le aafiaga o le faafaigaluegaina o tamaiti i galuega le talafeagai faatasi ai ma gaioiga e faafoia ai lenei faafitauli. O le tausaga 2008 sa faapea ona faamaonia ai e Samoa le Tulaga Matautia le Talafeagai i le Faafaigaluegaina o Tamaiti ma avea ai ma matafaioi le faatino o gaioiga e faafoia ai lenei faafitauli matuia. Ao feagai le lalolagi ma le vaitaimi o le Koviti 19, o loo faapea ona maitauina aafiaga mo le soifua maloloina o tagata lautele, aemaise le tamaoaiga ma agafesootai e ta aofai ai ma aafiaga i le faafaigaluegaina o tamaiti i galuega le talafeagai mo atunuu e lima vaivai le tamaoaiga. O le aso faapitoa mo le tetee atu i le fa’afaigaluegaina faa le tatau o fanau 2020 olo’o taula’i lea i o latou fa’afitauli ma a’afiaga.
E tusa ai ma fa’amaumauga ale ILO, e 100 miliona tamaiti ua mafai ona aveesea mai i galuega le talafeagai ma faaitiitia ai le fuai numera 38 pasene mai le 2000 agai i le 2006. O le pepesi o le Koviti 19 o loo maitauina ai le lamatia pea o le soifua galue o tamaiti i galuega talafeagai. O nisi o aafiaga maaleale e tulai mai i lenei faama’i o le aafiaga o aoaoga, soifua maloloina o aiga, tupe maua o aiga i aemaise nofoaga e leo iai ni faiga puipuiga o agafesootai. i le taimi nei, o loo lona lua le atu Asia ma le Pasefika i le faafaigaluegaina o tamaiti i galuega le talafeagai ma faamaonia ai le mau o le tele o nei faafitauli e tula’i mai totonu o atunuu e limavaivai le tamaoaiga. O le lipoti na tuuina mai e le Ofisa o Faavaomalo i mataupu tau Leipa sa faamauina ai e faapea o Samoa o loo tulai mai ai nisi o le faafaigaluegaina o tamaiti i galuega le talafeagai i magaala. O lenei vaitaimi, ua mafai e Samoa ona faaititia lenei faafitauli e ala i nisi o gaioiga ua mafai ona faatinoina.
O loo taimua le Matagaluega o Pisinisi Alamanuia ma Leipa i le unaia ma le faamalosia o faiga faavae ma taiala talafeagai faaletulafono e taofia ai le faafaigaluegaina o alo ma fanau i Galuega Aloaia (Formal Sector). I le vaega e 51 o le tulafono o Leipa ma Galuega 2013, faapea ma le vaega e 21,22,23 o le tulafono Faatonutonu 2016, o loo faamanatu mai ai i tagata e onaina galuega a latou matafaioi i le faafaigaluegaina o tamaiti. O le Komiti o le Fono Aoao Faatafatolu o Leipa, (SNTF) e taulamua i le limataitaiina o faatinoga o polokalame ma faaiuga fai talafeagai e faaleileia ai mataupu tau le faafaigaluega o tamaiti i galuega le talafeagai mo Samoa. Mo le faaleleia atili o nei mataupu, ua taimua ai le malo ma le Matagaluega o Tina ma Tamaitai, e taumafai e taofia mai tulaga ma mataupu tau le faafaigaluega o tamaiti luga o magaala ma le faafaigaluega o tamaiti i totonu o Galuega le Aloaia e le o mafai ona faatinoina i lalo o tulafono o loo faatulafonoina i lalo le Matagaluega o Leipa. Mo nisi faamatalaga faafesootai le Ofisa Sili o Pulega i le telefoni 20441 po ole imeli: lyndoncl@mcil.gov.ws
