E muamua ‘ona ‘ou fa’atulou i ou paia Samoa, aua o oe o le ao mamala.
• Tulouna ia lau susuga i le Taitai o le Sauniga, lau afioga Aki Epikopō Alapati Mata’eliga, o le Taitai o le Ekalesia Katoliko Roma i Samoa.
• Ou te faatulou atu i le afio o Lau Afioga i le Ao Mamalu o le Mālō Tutoatasi o Samoa, Lau Afioga Tuiaana Tuimalealiifano Va’aletoa Sualauvī le lua,
ma le Masiofo.
• Tulouna le afio o lau afioga i le Sui Tofia, Le Mamea Ropati Tuiletufuga ma lou Faletua, tainane le mamalu ma paia o le Fono a Sui Tofia.
• Tulouna Lau afioga i le Palemia, Tuilaepa Aiono Sailele Malielegaoi ma lou Faletua.
• Lau afioga i le Sui palemia
• Lau afioga i le fofoga fetalai o le Palemene.
• Le paia o le Kapeneta faapea le mamalu o le Palemene a Samoa. Tulou, tulou lava!
O paia o Samoa mai i le matāfanua i Saua, se’ia pā’ia le si’ufanua o le Alataua, na aofaga iai manū i aiga o tupu, aiga o nofo ma aiga o papa, tainane le afifio o tamalii faapea faleupolu o tofiga; ua taoto a’o se alao’o.
O ou paia, o ou sā e le avea, e tumau e o’o i le faavavau, o le paia lava lea i Tama ma o latou aiga, Aiga ma a latou tama, o paia iā Tumua ma Pule, Ituau ma Alataua, Aiga i
le Tai ma le Vaa o Fonoti.
E faatulou atu i le aufaigaluega totofi a le Atua, o loo tala’ina le Talalelei ia te Oe Samoa na potopoto. Malo lefai tatalo, ua tuana’i atu le faamanatuina o le Aso o le Toetu manumalo o le Alii Faaola. O le tatalo, Ia avea ia lea manumalo, e alofagia ai lo tatou lalolagi puapuagatia, i lenei vaitau faigata o le Covid 19, tatou te manumalo faatasi ai i lona alofa ma lona agalelei. Ou te faafetai tele i lau Afioga i le Taitai o le Sauniga, Lau Afioga i le Aki epikopō Alapati Mata’eliga, o le ositaulaga a le Alii, ua faauuina lo’u ulu i le suauu o le Agaga, ua ou lagona lo’u faatauvaa ma le lē atoatoa, ua ou valaau atu ai i le Alii, “O ai ea le tagata ua e manatu mai ai? Se’ia e faamagalo mai lo’u vaivai.’ Faafetai i le upu folafola, le tapuaiga ma le faamanuia, ia tumau i le Atua lona viiga e faavavau.
O le loto faafetai tele, ou te momoli atu i lau afioga i le Ao mamalu o le Malo Samoa, Lau Afioga Tuiaana Tuimalealiifano Vaaletoa Sualauvi.
Lau Afioga i le Palemia Tuilaepa Aiono Malielegaoi,
Lau afioga i le Fofoga Fetalai,
Le mamalu o le Palemene ma le Kapeneta
‘O le aso ma le fīliga, o le aso foi ma le māta’igatila.
‘O lea ua ia te au le loto maulalo ou te tautino atu ai, ‘ ua ou talia le tofiga ua outou faaee mai. “ Ia fesoasoani mai le Atua ia te au.”
O le tofi o le Faamasino sili ua tofia iai a’u i le asō, ou te talitonu ma le atoatoa, o le tofi e auauna mo tagata uma. E ui lava a tāua le tofi, ae e iai le manatu, po o leā le tāua e le tofi, e sili na tāua le fa’amaoni. Ou te manatua, ina ua valaauina a’u i se taimi ua mamao atu, pe fia avea ma faamasino i Niusila, sa ou fesili mai I lo’u tina o Ulufafo Satiu po o le a sona manatu, ae o lana upu na fai mai, “ Sole ou te le mana’o i lenā mea ua e manatu i ai, ina nei faaletonu lau tautala.” O nai taiala lava ia a si ou tinā, ou te manatua pea.
Ou te fa’amalō i le Ofisa o Faamasinoga, lau afioga i le Faamasino sili sa tauaveina le tofi, faapea lau afioga i le faamasino sa fa’a’auauina. O la tatou tatalo fai faatasi, ia fesoasoani mai le Atua le Tamā, le Alo ma le Agaga Paia, tatou te faatino ai galuega ua vala’auina ai tatou, ma ‘auauna ai mo le manuia o ona tagata.
Ou te faafetai i o’u aiga i Salimu i Fagaloa ma Magiagi, o nuu ia o lo’u Tama. O Tanugamanono, Matautu Uta ma aiga uma o lo’u Tinā i le Vaimauga, faamalo le tapuai, faafetai le tatalo, ua a’e manuia ai taumafaiga a au tama fanau.
Tupuaga:
O a’u, o le tama lava o le eleele. O lea ua ou manatu ai e faailoa atu lo’u tupu’aga.
O lo’u tamā, o Satiu Fea Sooupu Leasuasu Perese, na soifua mai I Salimu I Fagaloa; sa galue fa’aleoleo ma galue foi mo le malo o Samoa I le ofisa o fa’atoaga. Na maliu lo’u tama ae faato’a tolu o’u tausaga.
O le tamā o lo’u tamā, o le toeaina o Perese, sa a’oga faafaifeau I Malua, ae vala’auina la’ua ma le faletua o Faalua e tausia le nuu o Magiagi. O le tua’ā o le tamā o lo’u tamā, o Ulualofaiga Talamaivao Satiu Sila’ila’i.
O lo’u tinā o Ulufafo Samau, o ia lava o le faiaoga Samoa, na faiaoga I Tagunamanono ma Magiagi mo ni tausaga e tele. Na faatu fo’i si ona tamai faleoloa I Magiagi, e fesoasoani I le tausiga o lo matou aiga.
O le tamā o lo’u tina, o le failauga o Samau Timani I Leupolu, mai le nuu o Tanugamanono ma Matautu I le Vaimauga.
O le tamā o le tinā o lo’u tinā, o le toeaina o Te’o Tuvale Petaia. O le tamā o Te’o Tuvale, o le toeaina o Petaia Va’aelua, o se tasi o le to’alima o faifeau, sa fesoasoani I le fa’aliliuina o le Tusi Paia I le gagana Samoa.
O Te’o Tuvale, na ia umia le tulaga o le fa’amasino sili tau mataupu o fanua ma suafa I Samoa I le 1896, I le taimi o pulega a Siamani. Sa fa’aeaina Te’o I le tulaga o le failautusi mo Samoa I lena taimi, ma na maliu o ia I le Fa’ama’i tele i le 1919.
O lo’u Aiga ma nai a latou tautua.
E tele a’a o le tagata, ae tau ina ou faailoa atu na o se vaega itiiti o lo’u aiga latalata mai.
O Livigisitone Nuusila, (uso matua) sa faiaoga i Malua, faifeau i Vailima, Faatonu o Aoga a le EFKS mo tausaga e tele.
O Toalua Satiu Perese, F.S.(uso), ma le faletua, o le Faafeagaiga a le EFKS i Sapunaoa, Falealili.
O Faalele Asoleaga (tuafafine) ma le Susuga i le Faifeau Karima Faiai, galulue i le Ekalesia PIPC Manukau i Niusila.
Ou te fiafia foi e faailoa, O le Tofa Samau Piu Timani II, (tuagane o lo’u tina), sa Komesina o Leoleo, sa faipule o le Vaimauga i sisifo, ma fofoga fetalai foi a le Palemene mo se vaitimi.
O matou tausoga, afioga Tupuola Lesa ma Anauli Pofitu Fesili, na tulai foi i le tofi faipule o Vaimauga i sisifo, a o galulue i galuega faasu’etusi, faapea le komesina o Lafoga a Samoa. Tau ia, ia fai tau ane ai se tautua faatauvaa ua fai mo le atunuu pele o Samoa.
Ao i ai pea le avanoa, sei o’u liliu ane teisi lava e fai sina tala i le gagana faa-Peretania.
