ASIASIGA A LE KOMITI O ATINA’E A LE KAPENETA (CDC)
Tusia: Taunuuga Toatasi
Na āsia e le Komiti o Atina’e a le Kapeneta (CDC) poloketi ma atina’e a le Malo o lo o i ai nei mo le Itu i Sasa’e o Upolu.
O le fa’amoemoe autu o lenei asiasiga ina ia silasila toto’a ai Ta’ita’i o le Malo, i poloketi ma galuega fa’atino a Matagaluega ma Fa’alapotopotoga ta’itasi a le Malo, pe o tulaga lelei pea le fa’atinoga o auaunaga ta’itasi mo le manuia o Samoa aoao.
O le avanoa tāua fo’i lenei, e pei ona saunoa i ai le Palemia, Tuilaepa Sailele Malielegaoi, e silasila toto’a i ai Ta’ita’i o le Malo, mo se fautuaga e tu’uina atu i Fa’auluuluga o Matagaluega ma Fa’alapotopotoga a le Malo, auā le fa’aleleia atili o la latou auaunaga.
O lenei asiasiga i le vaiaso ua mavae, e le’i pito tasi i se atina’e se tasi, ae na aofia uma atina’e ta’itasi a le Malo o lo o i le Itu i Sasa’e o Upolu.
O atina’e ma poloketi nei na afea e le Malo i lenei asiasiga;
Lafumanu a le Malo i Lemafa.
I le lafumanu a le Malo i Lemafa o lo o i ai lafu povi ma lafu mamoe.
I se ‘oto’otoga o le lafu povi, e tasi (1) le pulu failafu, 43 le aofa’i o aumatua, e fa (4) ta’anoa feololo, tasi (1) le pulu feololo, tasi (1) le tama’i povi fafine vavae ‘ese mai le aumatua ae lua (2) pulu ua uma ona launiu (steers).
I le lafu mamoe e 46 le aofai o aumatua, lua (2) po’a feololo, 10 tama’i mamoe fafine vavae ese mai le aumatua, 10 tama’i mamoe fafine ma le 10 tama’i mamoe po’a.
E to’aono le aufaigaluega a le Matagaluega o Fa’atoaga ma Faigafaiva o lo o galulue ai.
Fa’atanoa i Afulilo
I le fa’atanoa a le Fa’alapotopotoga Malosiaga tau Eletise i Afulilo na asia e le Komiti ma o lo o sologa lelei pea lona fa’agaioiga.
O le fa’atanoa i Afulilo o lo o fa’aputu ai le suāvai mo le gaosiga o le eletise i le fale eletise i Taelefaga.
E pei ona fa’ailoa e le Pule Sili o le EPC, Tologatā Tile Tuimaleali’ifano e fa’apea, e na’o le lua fa’atanoa vai a le Fa’alapotopotoga o lo o i ai, o le fa’atanoa i Afulilo ma le fa’atanoa i Fuluasou.
O lo o i ai foi le fuafuaga a le EPC mo se fa’atanoa i Alaoa.
E 900 eka le vaega atoa o lo o fa’aputu ai le suāvai i Afulilo.
Malae Va’alele i Ti’avea
O le galuega mo le malae va’alele i Ti’avea o lo o fa’agasolo pea e pei ona amata mai i le masina o Novema 2018.
E 1,200 mita le telē o le fanua lea o lo o fa’aaogaina mo lea atina’e ma o le masina o Fepuari 2021 o lo o fuafua e fa’amae’a ai lea atina’e Fa’atanoa vai i Saleaumua.
O le faatanoa vai a le Pulega o Suavai i Saleaumua lea foi na asia e le Komiti.
O lea atina’e o lo o tapu’e ai le suāvai mo le afio’aga o Lalomanu, Vailoa Aleipata, Ulutogia, Satitoa, Lotopu’ē, Mutiatele, Saleaumua ma Utufa’alalafa.
O le vaega lona lua o lea atina’e e pei ona fa’ailoa e le Pule Sili o le Pulega, Seugamali’i Jammie Sa’ena, o le galuega mo le laina suāvai mo Samusu ma Amaile.
E pei ona tā’ua e Seugamali’i, talu ai ona o le to’atele o aiga o lea nofoaga ua si’itia i uta o latou nofoaga talu mai le Tsunami, lea ua taumafai ai le Pulega e fa’ao’o atu i ai le suavai i o latou nofoaga.
Uafu i Satitoa
O le tausaga e 2009 sa mae’a ai le fausiga o lea atina’e a le Malo. Peita’i i le masina o Setema o lea lava tausaga, sa fa’aleagaina ai lea uafu i le Tsumani.
O lea uafu o se atina’e a le Malo mo tulaga tau fefa’ataua’iga i le va o Samoa ma Amerika Samoa, aemaise o le tulaga o femalaga’iga i le va o le mamalu o le atunuu o lo o alala ma papāaao i lea vaega o le atunuu ma Tutuila, ina ia fa’atupulaia ai pea le tulaga o fefa’ataua’iga mo le tamaoaiga.
Malosiaga Fa’afouina e maua i le savili (Electric Wind Turbine)
O le taimi muamua lenei ua fausia ai e le Malo lea atina’e, ma o lo o fausia i Lalomanu, i lalo o le va’va’aiga a le Fa’alapotopotoga Malosiaga tau Eletise.
O lea atina’e o lo o fa’atupeina e le Abu Dhabi Fund.
I fa’amaumauga a le Fa’alapotopotoga a le EPC o lo o tā’ua ai e fa’apea, o le lona lua ai lea o atina’e ua fa’atupeina i lalo o le United Arab Emirates i ana seleni o lo o faipa’aga ai ma atunuu o le Pasefika.
Fa’atanoa vai i Saleapaga-uta
O le vaitafe ua tā’ua o le Lake Lano i Saleapaga – uta, o se tasi lea o atina’e sa galulue ai le Pulega o le Suāvai mo le fa’ataunu’uina.
O le tausaga e 2010 sa fa’amae’a ai lea atina’e, ina ia mafai ona auina atu ai le suāvai mo aiga lea ua suia o latou nofoaga talu mai le Tsunami 2009.
E 7.5 kilomita le laina paipa lea e auina atu ai le suavai mo Saleapaga ma Lepa.
O le Malo o Europa lea sa fa’atupeina galuega o lea atina’e.
