“NA MANA’O E FA’AMAVAE MA LE TOFI FAIPULE O A’U NA FAUTUAINA E ‘AUA,” PM TUILAEPA
Tusia: Tusiga Taofiga
O tu ma aga fa’ata’ita’i o Vaega Fa’aupufai, na tu malosi ai le Palemia o le Ta’ita’i o le Vaega Fa’aupufai e Puipuia Aiā Tatau a Tagata – HRPP, e taumafai e foia le fa’afitauli tau i le lotoifale, o Sui Faipule o le HRPP ia La’aulialemalietoa ma Peseta Vaifou.
Na fa’ailoa e le Palemia, Tuilaepa Sailele Malielegaoi lona naunau ia fofō alamea lenei mataupu ina ia ‘aua ne’i puaina i le ala peita’i ua lē mafai lava.
Ina ua fa’amavae La’aulimalietoa mai lona tofi Minisita, na i ai fo’i ma lona manatu e fa’amavae ai fo’i mai le tofiga o le Faipule o lona Itumalo peita’i o le Palemia na ia fautuaina malosi La’auli ina ia ‘aua ne’i fa’amavae, seia mautu atu se tali o le la fa’amasinoga ma Peseta.
“Ona o ana fa’amasinoga la ia na fa’amavae ai mai le tofi Minisita, na faimai fo’i o le a alu e fa’amavae mai le tofi o le Itumalo, o’u taofia lea, o le uiga fa’ata’ita’i lena, auā ua lava lou fa’amavae mai le Kapeneta ae nofonofo pea e talitali le tou fa’amasinoga leiloa po’o fea o i ai le laki.
“Ana ou le ‘apa’apa la i ai semanu e fa’apea ua leva ona le toe faipule, a’o le tulaga lena sa ou ‘apa’apa lava i ai, e le fa’apea ua ou fa’atauagavale i ai, ae sa ou taumafai e fofō i tua le la mataupu ma Peseta Vaifou lea e Minisita Lagolago ia te a’u, e telē fo’i la’u galuega sa fai ia Peseta, o aga na fa’a HRPP, e fofō malie i tua mataupu fa’apea.
Saunoa le Palemia e fa’apea;
“Manatua fo’i, ou te aiga fo’i i ai, aemaise o le Fatialofa ma Auelua e fa’apāia, na ou lauga ai totonu o le Palemene, o i latou nei e tausi va’atele e le Fatialofa ma Auelua, ae le fa’apea la o sau mai tuā, o la e sau mai Savaii, o le a la le mea o le a fa’atalofa ai fua i tuā.
“Pau o le mea e tatau ona tofusio ma fa’ato’ese i mea ia na sau i le TV i le fa’amasinoga, o le mea fo’i lena sa ou taumafai ai e fofō i tua le mataupu ae mana’o lava e ave e tolaulau mai luma.
“Ia soso’o loa ma le palota, o le taimi a na lē palota ai, ua na solia a matou aga fa’a HRPP, e mafua ai ona maopoopo le HRPP, e na’o na uma lava o le palota lena, o’u sau loa ave i ai le tusi, o la na te iloa, ua fa’amalōlo oe mai le tatou Vaega Fa’aupufai, ua e faia a e oe lou i’uga, e le’o se mea e fou ia te oe, o lena lava na te silafia.
“O le tulaga lena, ae sa ou avea i ai le gagana e lē matagā tele ae pei la e le’i o’o i ai lana fa’atofāla’iga i le mamao o le mea lea na ou tuua nei i ai, o le fa’amavae, e mamao, mamao, mamao masalo e 1,000 maila le mea lea na ou tuua i ai, e fa’asao i ai lona alu ‘ese filemu ma le vaega lenei.
“Ae nofo a ma aumai, lea la ua ou tā’ua atu i ai le sa’o, fa’amalūlu atu ai fo’i i le matai o le matou nu’u auā e matai fo’i i tuā, o le ala lena lea ua ou fa’amalūlu ai, ua o’o loa i le taimi ua tatau ona ta’u sa’o le solo a le tamaloa talu ai lenei fa’asesē e fai so’o.
“A’o le tagata e lelei tele, o ia fo’i sa avea ma Fofoga Fetalai a le matou vaega, sa ou fiafia tele fo’i i ai i lona fa’atautaiga o le Maota ma le taimi fo’i sa i ai i totonu o le Kapeneta.
“Toeitiiti a maua le tali o le la mataupu, auā na malilie uma i le seleni e kava ai expenses a Peseta na aumai, ma fa’amuta ai loa iina, ae i ai sina tama’i mea lava, kuata inisi na faiatu ai Peseta ae toe malepe ai le mea atoa.
“O iina la lea ua taugatā ai le la mataupu, a’o le matuā taugofie la’itiiti o le seleni na tāpa atu e Peseta e totogi ai ana Loia ua maoaluma i le la aiaiga kuava lea na fai.
“Ae toeitiiti a manuia lo’u taumafai atu e fa’aleleia le la va ma Peseta, ia ua vaai la i le ‘ese’ese mamao o mea ia e pisa ai nei, ia alu loa i o tafaga mai ai a’u i le tu’itu’i.
“Ae measili o la ua malamalama fo’i lona finagalo, e le’o ni a’u aga ia na tupu ai le mea lea, auā o le matou vaega, o aga ia fa’avaega latou, a i ai a se mea e tula’i mai, ona ou taumafai lea e fofō mālie, auā o aga na a Vaega Fa’aupufai, e fofō fa’alotoifale ae le masa’a atu i fafo, o la e malamalama lelei ai i si, ae matuā le malamalama ai i si.
Ua fa’alauiloa aloaia le fa’amavae ai o La’aulialemalietoa mai le avea o ia ma Sui o le HRPP, ma o le a tuto’atasi ai o ia mo le taimi nei, ae na ia fa’ailoa fo’i ua tapena ia ma lona Itumalo mo le fa’atuina o se i si Vaega Fa’aupufai auā le faiga palota i le tausaga fou.
