FO’IA FA’AFITAULI O LE FA’ATANOA I AFULILO
Tusia: Taunuuga Toatasi
Ua fa’afetaia e le afio’aga o Taelefaga le Malo, i le vave tali atu, e ala i le foia o le manogi sa a’afia ai lea nu’u, e mafua mai i le fa’atanoa tele o lo o i le Afulilo, o lo o gaosi mai ai le eletise mo le atunuu.
Fa’ailoa e le Ofisa Sili o le Fa’alapotopotoga o Malosi’aga tau Eletise (EPC) ia Lupematasila Tologatā Tile Tuimaleali’ifano e fa’apea, i le su’esu’ega a le Fa’alapotopotoga Fa’asaienisi a Samoa (SROS) aga’i i le manogi o le vai lea o lo o gaosi ai le eletise, ua mautinoa ai e mafua mai ona o lā’au pala ma ua leai se okesene.
Na pine fa’amau le leai o se manogi o toe a’afia ai Taelefaga, ina ua molimauina i le asiasiga a le Komiti o Atina’e a le Kapeneta (CDC), lea na āsia ai le itu i Sasa’e o Upolu i le fa’ai’uga o le vaiaso ua mavae.
O le naunauta’iga o le Malo, ia vave foia lea fa’afitauli, auā le tausia lelei pea o le soifua maloloina o tagata Samoa o lo o alala i lea itu o Upolu aemaise i fanauiti.
Saunoa Lupematasila e fa’apea;
“O le taimi lenei e le’o toe i ai se manogi talu ona fa’apipi’i compressors ma diffusers e pamu ai le okesene i le taele o le fa’atanoa.”
“O le tulaga lena sa i ai muamua, a’o le taimi lenei, ua tulaga lelei lava, ma ua leai fo’i se faaseā a le afio’aga.”
O le i si vaega o le atina’e lea i Afulilo, na saunoa ai Galumalemana, o le fa’apipi’iina lea o le i si afi fou mo le fale – eletise i Taelefaga.
“Ua mae’a ona fa’apipi’i le afi lona tolu i le Faleafi i Taelefaga.
“E na’o le lua afi sa i ai i le amataga, a o lea ua tolu.”
O lo o i ai foi le fuafuaga e pamu mai le vai i Vaipu mo le fa’atanoa i Afulilo, ma o lea fuafuaga o lo o fa’agasolo tapenaga mo tauofoga.
“O lo o fa’agasolo fo’i le tapenaina o le tauofoga mo le toe fa’aleleia o nisi o vaega o le fa’atanoa e aofia ai le rake e faamamā ai le screen o le fa’atanoa, o pa o le fa’atanoa fa’atasi ai ma le toe valiina o le paipa.
Sa tu’uina foi e le EPC le i’a o le tilāpia i totonu o le fa’atanoa e fesoasoani i tuna sa i le vai mo le faamamāina o le vai ma le fa’atumauina o le ola o le vai e ala i le tapiliina o mata o vai o lo o fafaga ai Afulilo.
O le telē o le vai o lo o mafai ona fa’aputu i Afulilo pe tusa ma le 10 miliona mita kupita.
