SUĀVAI MAMĀ MO SALEAPAGA – UTA MA LEPĀ
Tusia: Taunuuga Toatasi
O se fiafiaga tele i le mamalu o le atunuu o lo o alala ma papa’aao i Saleapaga – uta ma Lepā ona ua mafai ona o’o atu le suāvai mamā.
Na āsia e le Komiti mo Atina’e a le Kapeneta (CDC) le nofoaga o lo o auina mai ai le suāvai mo ia afioa’ga i le vaiaso ua mavae.
I le folasaga a le Ofisa Sili o Pulega o le Suāvai, Seugamaali’i Jammie Saena, sa folasia ai le tele o lu’itau sa feagai ma le Pulega ona o tulaga sa i ai le fa’agasologa o le galuega.
O le vaitafe ua ta’ua o Lake Lano i uta o Saleapaga, o le vaitafe lea o lo o maua atu ai le suāvai mo aiga, ma o le tausaga e 2010 sa fa’amae’a ai lea atina’e tele.
O le atina’e lea e pei ona gafa ma le Pulega, e le gata o aiga i Saleapaga – uta ma Lepā, a’o aiga sa si’itia i uta o latou fale, talu mai le Tsunami i le tausaga e 2009, lea foi ua o’o atu i ai le fa’asoa o le suāvai.
I le fa’agasolo ai o lea galuega e pamu mai le suāvai mai le vaitafe, ona fa’aputu lea ma faamamā ona fa’asolosolo atu lea e fa’aaogaina ai laina paipa pe tusa ma le 7.5 km e aga’i ai i Saleapaga -uta ma Lepā.
“O le afi tiso lea o lo o fa’aaogā e pamu mai ai le suāvai, e ta’ilua aso o le vaiaso ma utu ina ia mautinoa o lo o sologa lelei pea le aga’i o le suāvai i aiga.”
I le tausaga e 2019, lea sa maua ai le fesoasoani a le Pulega mai le Iuni a Europa mo le fa’atupeina o le toe fa’aleleia atili ma le fa’atinoina o nisi o galuega.
O nisi o galuega sa fa’atupeina e le Iuni a Europa e aofia ai le toe fa’apipi’i o pamu fou po’o masini fou i luga o le vaitafe e pamu mai ai le suāvai.
O le fausia o le pamu vai fou, o le fausia o le auala e faigofie ai ona o’o i le vaitafe, o le fa’apipi’iina o le Malosi’aga Fa’afouina e maua i le la, fa’apipi’iina o masini mo le fa’amamāina o le suāvai.
E silia ma le 30 le aofa’i o aiga ua mafai ona fa’asafua atu i ai le suāvai maua mai le Lake Lano, lea e 15,000 lita le telē o le suāvai maua i le itula.
Na fa’aālia e le Ofisa Sili o Pulega, o le taimi lenei, ua maua atoatoa e Saleapaga – uta ma Lepā le suāvai mamā.
