O SOU MANATU!
Mo Tulafono Taufa’aofi o fa’agasolo nei, na fa’aalia ai fo’i ma se manatu mai le Sosaiete a Loia Niu Sila aemaise nisi o Fa’alapotopotoga mai fafo e uiga i le taumafaiga a Ta’ita’i o le Malo, o le Fono Aoao Faitulafono a le Malo Tuto’atasi o Samoa, ina ia fa’atuto’atasi lana Fa’amasinoga o Fanua ma Suafa aemaise o teuteuga o le Fa’avae ina ia fa’atino ai lea suiga.
O le a sou finagalo i ai, e tusa ai ma le aiāina mai fua e Sosaiete ma Fa’alapotopotoga nei mai isi atunuu o le lalolagi o mataupu ma fuafuaga fai a le Malo o Samoa i le unaia o le fa’atāua i lana tu ma lana aganu’u Fa’aSamoa moni?
*******************************
Auimatagi Afa Auimatagi Epa
Afio’aga o Malie
64 tausaga o le soifua
– Afai lava o le Fa’amasinoga tau Samoa, o lona uiga e na’o Samoa lava e aiā i ai, e mo’i fo’i o tausaga ua mavae sa pulea ai tatou e papalagi, a’o lea ua Tuto’atasi lo tatou Malo o Samoa, o lona uiga e tatau lava ona pulea e Samoa ana ia tu ma ana agaifanua tau Samoa moni. E o’o fo’i i tulaga tau Fa’amasinoga, e tatau fo’i ona fa’afoe mataupu uma tau fa’amasinoga i le tu ma le agaifanua tau Samoa moni, e mautinoa ai le tumatila o le amanaia e Samoa o lana fa’amatai, o lana aganu’u ma lana agaifanua aemaise o lana Faiga Malo.
– E le fa’apea e fai i Samoa fa’amasinoga ae pulea mai e papalagi. E leai, e le talafeagai le tulaga lena, pau lava le tulaga tatou te taliaina ai le sao o papalagi i se itu tāua o le fesoasoani mai ia tatou atina’e ma ni galuega o mo’omia ai le fesoasoani mai, a’o a tatou tonu fai ma a tatou fa’ai’uga fa’alemalo, e le sao i lo’u mafaufau le aiā mai fua o le Sosaiete a Loia mai fafo ma nisi Fa’alapotopotoga mai fafo. O a tatou measina e patino i o tatou fa’amasinomaga fa’aletagata soifua.
– Auā e le’o nofonofo lava Samoa aiā atu fua ia latou fa’ai’uga fai. Fa’ata’ita’iga o le Koviti 19, lea e fiu papalagi i Amerika e tauanau le Peresetene mo se togafiti e puipuia ai le atunuu mai lenei mala mata’utia, e leai lava, e fai lava le finagalo o Ta’ita’i e fa’amuamua ai pisinisi ma le tamaoaiga o na atunuu, a’o Samoa ia, na’o le saunoa mai lava o le Ta’ita’i o le atunuu, le Palemia, i auala e puipuia ai Samoa mai lenei fa’ama’i, o lena lava, le tu ma aganu’u lena a Samoa e sufi i le fa’amatai ma ona pulega mamalu, lea tatou te molimauina nei le agalelei o le Atua, e aunoa ma se siama e tasi ua ofi mai i o tatou ‘ele’ele e ono fano ai o tatou tagata, lea lava e Pulea e Samoa ia Samoa lava ia.
– E manumanu le tava’e i ona fulu, e fa’apena lo’u taofi i le naunauta’i mai o le Malo, ia aputiputi malu a tatou measina e ala i lenei Tulafono fou o lo o tau fa’aofi nei, o lona uiga mo fa’alapotopotoga i fafo ma i latou o tau aga’i mai, e fesiligia Tulafono nei, malilie, soia tou te so’ona asosi mai o lea lava e fai e o matou Ta’ita’i le mea e lelei mo i matou o tagata Samoa moni lava.
**********************************
Eteuati Seualuga
Afio’aga o Aleisa
60 tausaga o le soifua
– O a’u ia ma lo’u manatu, ou te lē auai atu i le tulaga lea, o le pule mai o palalagi i tatou Tulafono, e leai ma se feau a papalagi e aiā mai fua i fanua ma measina tau Samoa, patino ia Samoa, e pule a Samoa ia Samoa.
– O le matai, o lona tofi lena, na te pulea measina ma vaaia lelei a tatou measina, o lo tatou matūpalapala lea na toina mai e lo tatou Matai Sili mo i tatou, o lona uiga e leai leai lava ma se mafua’aga o le a isuisu mai ai fua nei Fa’alapotopotoga ma nei Sosaiete tau Loia mai isi atunuu ia tatou tu ma agaifanua.
– O la’u fautuaga i le Sosaiete a Loia nei mai isi atunuu, fa’amolemole e leai ma se tou feau i fuafuaga o feagai ma lo matou Malo, o Ta’ita’i o lo o Pulea Samoa, o matai, o i latou nei, o lo o saofafa’i fo’i i totonu o aiga, ekalesia ma faiganu’u e malamalama lelei i mafatiaga o feagai ma tagata Samoa, ona o le fāoa fa’amalosi o ana measina e ala i le fa’ai’uga a le Fa’amasinoga e fua i ta’iala fa’apapalagi.
***************************************
Atiifale Mamapo
Afio’aga o Faleapuna
58 tausaga o le soifua
– O le ta’iala lea na amata fausia ai le Fa’amasinoga, o le fa’apapalagi, a’o le malu lea e malu puipuia ai Samoa, o le Fa’amatai, ae le malu Samoa i se fa’amasinoga e pei ona tatou lau vivilu ai nei, aisea, tele measina ua tafefea i le vasa loaloa ona o tu ma aga mai fafo, le tomai fa’apapalagi.
– O measina la a Samoa, e tatau lava ona malu puipuia i le fa’amalu o la tatou tu ma le agaifanua i le Pulega mamalu a ali’i ma faipule, o lona uiga e leai ma se vaipanoa e ono aiāina ai fua e Sosaiete ma Fa’alapotopotoga nei mai fafo a tatou tu ma agaifanua aemaise la tatou filifiliga sa’oloto mo lo tatou lelei.
– E lelei fo’i le tatou fa’alogo ma le toto’a i mau a nei Sosaiete ma Fa’alapotopotoga pe o i ai se mea aogā o molimoli mai ai, a’o lona aotelega lava ia, e lē talafeagai ona tatou talia manatu nei mai fafo, leaga o lea tatou te soālaupule le lumana’i o Samoa mo a taeao, e ala i le unaia o se vai fofō mo fa’afitauli ogaoga o feagai pea ma aiga ta’itasi, i le fāoa fa’amalosi o ana measina e ala i gafa o aiga, suafa matai ma fanua tau Samoa.
*******************************
Sapena Falelua Asiata
Afio’aga o Faleasi’u
43 tausaga o le soifua
– E tatau lava ona te’ena lena mau e omai ma na Sosaiete ma na fo’i Fa’alapotopotoga, manatua lelei tatou, o papalagi e ona manatu nei, o latou fo’i ta’iala lea e sosolo ai nei le tatou fa’amasinoga.
– O le a la se isi mea e toe apaapa mai ai fua latou, o lea ua tuto’atasi Samoa, ua o’o i lo tatou taimi e silasila toto’a ai ta’ita’i o Samoa lava ia, i ana tu ma ana agaifanua i suiga lelei mo lo tatou lumana’i manuia.
– Ae manaia le tatou fa’asipasipa ai pea fa’apea, leai ma se pisinisi se tasi a Sosaiete nei ia Samoa ma lona Malo.
*************************************
Faiilagi Asiasi
Afio’aga o Sapapali’i Savaii ma Vaitele Fou
49 tausaga o le soifua
– O la’u fautuaga i le Sosaiete lea, e leai se mea o le a aiā mai ai fua latou i tu ma aganu’u a Samoa latou, o la ua lagomau mai ti’asa tuaā ua mavae sa o latou asaina mai le gasū o le tai taeao, auā le fa’amamaluina ma le faapelepeleina o tatou tu ma agaifanua ina ia maopoopo ma malu lelei i lalo o le Pulega fa’amatai, o lea fo’i ua uma ona fai pine fa’amau a aiga ta’itasi ma nafa tala i suafa o aiga i Samoa, e leai leai leai lava se feau a papalagi latou e talanoa mai ai fua i a tatou measina ma lona fa’atulagaina.
– O fanua tau papalagi latou e aiā i ai na’o le palagi e le aiā i ai le Samoa latou ia, ma o fanua a tatou Samoa lava ia, e i ai aiaiga o fanua tau Samoa lava ia, e pulea e Samoa lava ia, e le’o Samoa o ni papalagi, tatou va’ava’ai i le fa’aletonu tele sa tula’i mai i fanua Maori, aisea, leaga o ‘ele’ele na sosofa e papalagi, e aunoa ma se silafia e nai tagata Maori o le uiga tonu o nei feagaiga, na fāoa ai o latou ‘ele’ele.
– E eseese mamao lava ma tatou, o Samoa e Pulea e Ta’ita’i Samoa moni, e fa’atulafonoina fo’i e tagata Samoa moni ma fa’amamalu fo’i tatou lava ia o Samoa mao’io’i.
– O la e tau aumai e Sosaiete nei, le fa’atusatusaga ma tatou Samoa, ae o Samoa la e le’o ni Maori, o Samoa o Samoa lava ia.
– Mo le Sosaiete nei ma Fa’alapotopotoga nei, fa’amolemole aumai le matou Malo e pulea e matou, ma talanoaina e matou, soia ia tou te aiā mai fua, manatua o fanua tau Samoa e mafai lava ona e su’e masima i isi aiga tuaoi, o le tu ma le aga lena lea tatou te mitamita ai, ‘ese mai ma papalagi, e te nofonofo lava oe isi ou pa’usisi e aunoa ma sou interfere fua i tuaoi.
– O lona uiga ou te le lagolagoina le a’apa fua o le Sosaiete a Loia i Samoa nei, i se finagalo o Loia mai fafo, e le malamalama latou i le a’afiaga ua mamulu ai le tele o measina a aiga sa fai ma fa’asinomaga tupito i le toto, ivi ma le aano e fa’avavau.
********************************
Vavao Mafi
Afio’aga o Saleaula Savaii ma Pesega
51 tausaga o le soifua
– E tatau ona tatou usitaia le Pule, o le mea lava la e faimai ai le Pule mai luga le lagi o le Atua Silisili Ese, o le mea lena e tatau ona fa’alogo i ai Samoa.
– Pau le mea tatou te faia, ia tatou tu tu fa’atasi ma opogi se fa’amoemoe lelei, ma tu’u atu le fa’amoemoe lelei i nai o tatou Ta’ita’i, auā tatou te le’o iloa le lumana’i o nei ‘ele’ele ma le lalolagi lea tatou te aumau ma nonofo ai e le fai mo tatou.
– Pau lava la’u fautuaga i si o tatou atunuu, tatou o i le Atua e maua ai mea uma, o le pule fo’i e mai le Atua, po’o a fo’i nei fevesia’iga i nei Tulafono, e lē tatau, lē tatau lava, ona aiā mai fua papalagi ia tatou ma tatou tu ma agaifanua, a’o papalagi fo’i o tagata na faia e le Atua, a’o le ‘ese’esega, ua mae’a ona tu mavaevae e le Atua tagata ta’ito’atasi ma lona fa’asinomaga ma ona ‘ele’ele, fanua, ma ana measina.
– A malamalama lelei la Sosaiete nei ma Fa’alapotopotoga nei mai fafo ma nisi o Sosaiete i Samoa nei o pogisa pea, i le itu mavaevae o mea uma, o lona uiga o le a sologa lelei ma fealofani Samoa, ona ua malamalama uma i le uiga moni o le teu malu ma le malu puipuia o a tatou measina ma agaifanua.
