FUAFUA E TATALA LE MALAE VA’ALELE I TI’AVEA IA FEPUARI 2021
Tusia: Asenati Taugasolo Semu
O lo o gasolo lelei pea galuega mo le malae va’alele i Ti’avea, lea ua fuafua e mae’a ia Fepuari o le tausaga fou.
O lea malae va’alele o le a tautuaina le atunuu ma tagata femalaga’i e faaopoopo i le Malae Vaalele Faavaomalo i Faleolo.
I le asiasiga a le Komiti o Atina’e a le Kapeneta (CDC) i le malae va’alele i Ti’avea, na faailoa ai e le Ofisa Sili o Pulega o Malae Va’alele, Silimanai Ueta Jr Solomona o lo o faasolo pea le tanumia ma le faamae’aina o le auala vaalele (runway), lea e tusa o le afa o le umi o le auala va’alele i le Malae Vaalele Faavaomalo i Faleolo.
Na saunoa foi Silimanai, e gafatia lava e va’alele faavaomalo a lenei itulagi ona tulaueleele i Ti’avea pe a fua i galuega o lo o fa’atinoina nei, ma le tele o le malae va’alele.
O le a fausia foi le fale mo le vaega tinei mu lea o le a tautuaina le malae vaalele faapea lea vaega o le atunuu.
O Novema 2018 na amata faagasolo ai fuafuaga ma galuega mo le fausia o lenei malae va’alele.
I le Ta’iala mo le Atina’e o Samoa 2016/2017-2019/2020 i Taunu’uga Moomia 4, mo le Si’itia o Atina’e ma Auaunaga tau i Tagata Tafafao Maimoa, o lo o aofia ai le fa’amuamua o le fa’atauaina lea o le fa’alauteleina o auaunaga i femalagaiga i le ea.
