GALUEGA MO LE MALOSIAGA FA’AFOUINA I LE MAUGA O LEPU’E
Tusia: Asenati Taugasolo Semu
O le galuega mo le ulua’i Malosiaga Faafouina i totonu o Samoa e maua mai le savili, o lo o faagasolo nei i le mauga o Lepu’e i Aleipata.
Na molimauina lea galuega e le asiasiga a le Komiti o Atina’e a le Kapeneta (CDC) lea na faagasolo talu ai nei.
Na saunoa ai le Pule Sili o le Faalapotopotoga o Malosiaga Faaeletise (EPC), Lupematasila Galumalemana Togia Tologata Tile, o lo o faagasolo i le taimi nei le Tauofoga o le Malosiaga Faafouina (Renewable Energy), ma o le a tapunia i le faaiuga o Iuni. O lea Tauofoga o loo galulue soosoo tauau ai le EPC ma le kamupani a le Grid Market o Amerika.
“O le tauofoga o loo aofia ai le malosiaga o le matagi i le mauga o Lepu’e faatasi ai ma le faaopoopoga o le malosiaga o le la.
“O le malosiaga o le matagi ma le malosiaga o le la e moomia le aumai faatasi ma ni tekonolosi e faaputu ai pe a le manaomia ma ia mafai ona maua i le taimi e manaomia ai.”
Na saunoa foi Lupematasila, o le isi tekonolosi o loo aofia ai i le tauofoga lenei o le gaosia lea o le malosiaga mai lapisi (converting o le municipal waste to energy) aemaise o le gaosiga o le kiso mai otaota (biodiesel from waste at the same time).
“O loo i ai le faamoemoe a lelei ma atoatoa le biodiesel lenei, ona mafai lea ona sui ai le suauu kiso o loo ola ai a tatou afi kiso.
“O loo i ai le talitonuga o le au suesue o Malosiaga Faafouina, e le mafai ona tatou o ese mai le faaaogaina o afi e alu i le suauu. Ma o le mafuaaga la lea o le taumafai e gaosi le biodiesel mai otaota (waste) e sui ai le kiso.”
O lenei galuega e faatupeina i lalo o tupe mo atina’e a le Abu Dhabi Fund.
