“O LE HRPP E PULE TO’ATELE,” PM TUILAEPA
Tusia: Tusiga Taofiga
Na toe fesiligia e le Palemia, Tuilaepa Sailele Malielegaoi, La’auli pe aisea na ia le fa’ailoa ai lona manatu, o le HRPP e pulea to’atasi a’o inu ai i le tele o fa’amanuiaga ma le fa’aeaea a le HRPP na ave i ai.
O le fa’amavae ai o La’aulialemalietoa Leuatea Polataivao Fosi, mai le Vaega Fa’aupufai e Puipuia Aiā Tatau a Tagata – HRPP, na mapuna a’e ai ma lona finagalo, o le Faiga Malo o lo o i ai nei, o lo o pulea to’atasi.
Peita’i na manino le fa’amalamalamaina e le Palemia, o le Ta’ita’i fo’i o le HRPP, fa’atatau i le manatu o La’auli fa’atasi ai ma lana fautuaga, ina ia taofiofi le so’ona saunoa i mataupu nei, e atili aliali ai lona fa’aletonu i le sila maimoa a le atunuu aemaise lona Itumalo o tapua’i mai.
Saunoa Tuilaepa e fa’apea;
“Ina ua tula’i mai le Vaega Fa’aupufai lenei a le HRPP i le finagalo o Samoa, pei se mea leaga fo’i lea le mea lea ua tula’i ia te ia, ae i le taimi sa i ai i totonu o le Vaega Fa’aupufai, sa le’i tā’ua lava lea mea, o le Patī to’atasi, pule to’atasi, e le pulea to’atasi se HRPP, e pule to’atele, a’o lea ua te’i lava leaga ia te ia, ina ua alu i tua.
“O le mea la lea, ou te le ma’imaua so’u taimi umi ou te tali atu ai i se tagata sa i ai i totonu ii, ae fa’alata vaega, e leai a sa’u upu e toe faiatu, na’o le pau a lea, o lena ua fa’ameo ma fa’aseā i le finagalo o Samoa.
“O le finagalo o Samoa lea na tofia mai ai Sui Faipule lea ua i ai nei, e le fa’apea na nofonofo a, tofia e matou matou, a’o le finagalo moni o Samoa na filifilia ai matou i luga o le latou silasila o lea e fa’atino galuega, galuega a le HRPP, e le fa’apea la ua filifilia e tagata ona o se isi itu, leai, e ala ona filifilia e tagata ona o galuega fai.
“A le manatua e le Faipule le mea lena, o iina e ta’u mai ai e le Faipule, e le’o galuega fai na ala ai ona sau i le Vaega lenei, a’o le su’ega o ana ia mea, o le tulaga sa’o a lena.
“O lea mea lea na tā’ua ai le Pule to’atasi, a lea na matuā maioio lelei lava, lo’u tula’i atu ma fa’aali i totonu o le Palemene, o le finagalo lenei o le Patī lenei, i le tulaga o le Peresetene o le Fa’amasinoga o Fanua ma Suafa, na talosaga ai le Peresetene o le a na ia tapā aiaiga o le Fa’avae, e mafai ai ona tagofia loa e le Palemene, lana mataupu.
“Manatua la, o le mea lea le sese ai le to’atele, e le’i tapāina e le Palemene se fa’ai’uga mo le Peresetene, o lea na tapā mai e le Peresetene, manatua la o le Peresetene o le isi fo’i Loia, o lea na te iloa ai, o la na faimai e tamā o le Fa’avae i le 1962, le aiaiga lea, afai loa e tapā e le Fa’amasino se fa’ai’uga e avatu e le Palemene mo lona i’uga, ona tatau loa lea ona tali le Palemene, ona o aiaiga ia lea e faimai ai le Fa’avae.
“Lea la sa ou avea ai i le matou Vaega, o le a lo outou finagalo, o tatou o le Patī e puipuia aiā tatau a tagata, pe tatou te o i le aiā a le faipule ia po’o aiā tatau fa’avaega, ia soālaupule loa lea, ia sau loa ma le i’uga, o le aiā tatau fa’afaipule, lea la naalu ai lava le Palota.
“Lea la sa fa’atu atu le lafo a le Malo, ae te’ena e i si, leaga o lea ua uma ona fai le matou tonu, e le pulea to’atasi e a’u, o le i’uga lena na fai to’atele e le Vaega Fa’aupufai a le HRPP, o le sese ma le pepelo lena o le mea lea e aumai e La’auli, ou te le’i faia to’atasi se i’uga.
“E o’o fo’i la i le mea lea na tula’i mai a’o Fofoga Fetalai La’auli, i le mataupu e tagofia ai tuaoi palota ta’ito’atasi, o lea ua faiatu le Malo e o’omi mai totonu, ae omai i si faipule o le Palemene e aofia ai lava ma a matou fo’i Faipule, fa’apea mai tumau pea i le laumiumi lea na i ai muamua.
“Ia ave loa i le Komiti Fa’apalemene mo la latou fautuaga, tu’uina mai le fa’ai’uga a le Komiti Fa’apalemene ma fa’apea mai, ia alu ai ia fa’apea, lona uiga ia tumau ai pea ia fa’alaumiumi ai lava ae ‘aua le usitaia le i’uga a le HRPP, o lona uiga o le i’uga lea na tu’uina atu e a’u ma Minisita o le Kapeneta, tusa o le Malo a le HRPP matou ia le Kapeneta, ona matou fono ai lea, se’i sa’ili se tofā, ona fai ai loa lea o le fa’ai’uga, palota lava le tagata ia, tusa ai ma lona faitalia, mea e fai to’atele, tonu e fai to’atele, lea na fai ai loa le i’uga ma le tala e te alu ‘ese loa ma le mea ua tasi ai le vaega, tu loa ma le pituli ia te oe.
“O le ala lena lea ou te faiatu ai, o la sa fai lelei lava e La’auli lana palota ma lona iloa, o lona lava la i’uga ua ona faia, e le’o se i’uga la na faia e le matou vaega, o le i’uga na fai lava e ia, tusa o lea ua na ta’uina maia, e le’o toe fia i ai i totonu o le HRPP.
“Na’o na uma lava o le palota e tete’e, ave loa ma la’u note i le Sui Palemia, ua fai lava e La’auli lona i’uga e tusa ma faiga fa’avae, i le po lava lea, o’o loa i le taeao ave i ai ma la’u tusi, fono fo’i lea ma le matou vaega, ona ou fa’apea atu fo’i lea, ua fa’atino aiaiga o le tatou feagaiga e pei ona tatou saini nei i ai.
“O le tulaga la lena, e le pulea e se ta’ita’i se vaega, pau a lana ia mea, o ia o le Ta’ita’i po’o se Ta’ita’ifono, o le fa’alogo i le finagalo lautele, e te le tu lava oe ma e alu, ae tia’i lau vaega, e te toe tilotilo mai i tua ua leai se isi e lagolagoa oe.
“O le mea lena lea ou te faiatu ai, e le’i tai tai malamalama La’auli, i mea ia ou te talanoa atu ai, e telē lava le fa’aletonu la e i ai, e le’i tai tai, o le ala lena e tatau ai ona fesili mulimai ia muamai.
“Na i ai fo’i le tausaga na nofo to’atasi ai ma fai lana fa’ai’uga i lona manatu o ia e pulea tai i le Maota o le Palemene, ma lona manatu o le a taofi le tu’uina i lalo o le Maota o le Palemene, ae o le Maota lea ua toeitiiti lava paū.
“Fai ai lava e ia le i’uga, o le a taofi le i’uga lea ua faiatu ai le Malo, ae ou fa’alogo atu ua sau lana fa’asilasilaga e le tuua i lalo, ma feiloa’i lea, o’u faiatu ai, ali’i ua e fa’ataute’e i le fa’ai’uga lea ua tu’uina atu e le Malo, o lea la, o le a tatou talanoa i le afiafi nei, ia valaau loa ma le fono a le HRPP, ia vaai la i le faiga e le Fa’afaletui.
“O le a e manatu, e pule to’atasi oe i le Maota le la, sa i ai uma o matou mātua i le Maota lena, a’o lea ua avatu le i’uga e tu’u i lalo le fale ua leaga, afai nei e tu’u ai pea, ae oso se mafui’e malepe i lalo le fale, oti tagata ai mamalu o le atunuu, ona avatu lea ma fa’apea atu, leaga o le pule a le Fofoga Fetalai, ona fa’apea lea o tagata, oi la tu’ua’i la i le Fofoga Fetalai, a’o lena ei ia te oe ma le Kapeneta le i’uga e tatau ona fai.
“Ona tatalo mai lava lea, se’i fai pea lona finagalo i totonu o le Palemene, ona ou taliaina lea se’i tu’u pea i ai le avanoa e fai ai lana saunoaga i totonu o le Palemene pe a fono le Palemene, ia fai loa le fono, ua nofonofo mai i luga o lona nofoali’i ma sausau mai ai – o lea ua maua ula futifuti, tusa o lea ua otegia mai matou, e ala ona ou tā’ua mea nei, leaga na fa’alogologo uma i ai le atunuu aemaise o le fai ma pine fa’amau o mea ia ou te faiatu ai.
“Ona ou tula’i atu fo’i lea, ma fa’apea atu, o lea ua fa’afogafoga le atunuu i lau saunoaga lau Afioga i le Fofoga Fetalai, o le tonu a le Vaega lenei a le HRPP, ma o lea ua ou fa’aleoina atu e fa’apea, o le ta o le fa i le afiafi a taeao, e omai ai masini e tu’u i lalo le fale lenei, ua le toe saogalemu mo le tatou atunuu, a’o lea e lumana’i le samiga o le tatou 50 tausaga o le Tuto’atasi o lo tatou Malo o Samoa.
“E telē a le fa’aletonu o si alii lea, e le’i taitai, o la’u tali atu lena i le mataupu lea, ma o lea ua manino atu ii, o le matou Vaega e pule to’atele, a’o a’u ia ua tofia o le Ta’ita’i, o le ta ta mai totonu, ae aumai finagalo o le Vaega Fa’aupufai o i latou na e faia tonu.
“E i ai le fono na ou alu ai, alu le itula atoa o tautala lava le ta’ita’ifono, ia faiatu loa le i si usufono i le taimi lena na’o Komisi o le Pasefika i Saute e tumu i papalagi, te’i lava i le si’i o le lima a le isi palagi na, ma fa’apea mai, lau susuga i le ta’ita’ifono, fa’alogo mai, o le tiute o le ta’ita’ifono, e na’o lou nofo lelei lava iina ma tofi mai tagata e lauga, e avatu ai manatu e fau ai le tatou tali, ae e te le faia se tonu, o le mea o le a tupu, ua tauau ina ua e pule to’atasia mai taualumaga o le tatou fono, o le mea e na’o le pau a lau mea e fai, o lou nofo ma fa’apea mai, tu mai Simi, tu mai Sione, o le mea lea ua fulisia uma i ai manatu, o le tonu lena, o le mea lena e fai.
“O le tonu e fai to’atele, o le Ta’ita’i e tatau ona fa’alogo i lana vaega, ma o fa’atasi ma lau vaega, ae afai e te tu lava oe ma e muamua ae tia’i lau vaega i tua, e te tu ma e toe tilotilo mai, ua leai se i si e toe fia mulimuli atu ia te oe, o fea la e i’u i ai, ona e alu lea ua leai sou aogā, ua le toe amanaia oe, ua leai fo’i se tasi o toe fiafia ia te oe, mea lena e igoa o le ta’ita’i, fa’alogo i le mea lea e faimai ai lau vaega, ma ia tau tu tu i i’uga na fai, ma afai e oso sese ese se isi, a’o lea e tilotilo ai le vaega, o le a la lau mea e fai, e ala ona e ta’ita’i, tautala ma le malosi i le mamoe lea ua se, ae le’o se ta’ita’i e tu i, o, autafa, luga ma lalo, tu i luma ma tua, o le a le mea e tupu, na’o se ta’ita’i e ula i ai se Vaega Fa’aupufai.
“E na’o na sese lava o le mea e te faia, ua e le toe mulimulitu’i i aiaiga a le Vaega Fa’aupufai, ona aveese loa lea o oe, o lona uiga e le’o se i’uga a le Vaega o le i’uga ua e nofo lava oe ma fai ona fa’amuta ai loa lea o oe, e i ai isi taimi ua omai lava i si fa’aulumalō, ia fai ai loa ma le i’uga.
“Pei o le isi na matou fono a’o ta’ita’i Tofilau Eti Alesana, ae vaai mai Tofilau o la e saofafa’i atu ai le to’atolu, ia fa’atonu loa e Tofilau vaai outou ia e to’atolu o saofafa’i mai, e sili ona tou o ese atu ma le fono, ae se’i fai le i’uga a le Vaega Fa’aupufai lenei, ona fai a lea o le i’uga ma fa’amuta ai lava ma le toe avea o i latou nei ma sui o le HRPP.
“O mea nei o tusi, na i ai le fa’amasinoga na fai, na ave ai e le matou Peresetene le tusi e su ai le matou Sosaiete, ona ave loa lea fai le fa’amasinoga, na’o na amata lava o le fa’amasinoga faimai le Fa’amasino Sili, o mataupu fa’asosaiete e lē aumaia ii, o le mea lena e pule ai outou, o le mea lea, ua fa’aleaogaina lenei fa’amasinoga.
“Aveese atu le mea lea ma le fa’amasinoga e le talafeagai, e tutusa lelei lava ma le mataupu lea e talanoa mai ai La’auli, ia o le a oso i o, o mea a le Malo Tuto’atasi o Samoa, o le mea lena e iloa ai le vaivai, e leai lava ma se pisinisi a Fa’alapotopotoga nei ei fafo, e alalai mai ai i mataupu fa’alotoifale a le Malo Tuto’atasi o Samoa.
“Se’i vaai o lea ua tuto’atasi, a’o lea lava e le’i iloa ua tatou tuto’atasi, a’o lea lava e oso i o, pe ana fa’apea na te le faia nei mea, semanu e leiloa ai e le to’atele o tagata lona vaivai tele.
“O le mea lena ua tatau loa ona fa’amavae, a le fa’amavae ia take action loa le Matagaluega o feagai ma mea ia, o le tulaga lena mo le tagata lava ia e fa’amaoni, e le tau fesili, fa’amavae mai loa i le Palemene ae alu e toe fai mai le faiga palota, afai ua e le toe talitonu i se Vaega, ma o le a e alu e fa’atu sau Vaega Fa’aupufai e pei ona fa’atu mai e lou Itumalo, o le tagata la e fa’amaoni i upu ma ana ta’utinoga, ia alu loa e fa’atu mai sana Vaega ma toe fesili i le Itumalo, o le tali la e aumai e le Itumalo o le tali lena, o le tulaga tau amiotonu lena.
“O le tele o le oso i luga ma aumai ana mataupu na, e atili ai ona iloa lona vaivai tele.
