“MALU PUIPUIA FANUA FA’ALEAGANU’U, I LE FUAIUPU 102 O LE FA’AVAE” PM TUILAEPA
Tusia: Tusiga Taofiga
“E leai ma se fa’aupuga o tagofia ai le fa’atauina o fanua fa’aleaganu’u oi totonu o Tulafono tau fa’aofi o lo o fa’agasolo nei, o lea lava e tumau pea ma malu puipuia i le 102,” Palemia o Samoa.
Ua toe saga fa’amanino ma fa’amalamalama atili pea e le Ta’ita’i o le Malo, Tuilaepa Sailele Malielegaoi, ma ia tu’uina mai ai fa’amaoniga o le mau a le Malo e fa’amautu ai e le’o i ai se a’afiaga o le fuaiupu 102 o le Fa’avae o le Malo Tuto’atasi o Samoa aga’i Tulafono tau fa’aofi o fa’agasolo nei e aiaia ai le ono fa’atau motu o so’o se fanua fa’aleaganu’u.
Saunoa Tuilaepa e fa’apea;
“O le tāua o le Fa’avae lea ou te umiaina nei, i le vaega 102 o le Tusi Fa’avae, lea e tumau lava e le’o a’afia po’o lotea fo’i, o lea e ta’u mai ai, e matuā tapu lava le fa’atauina o se fanua fa’aleaganu’u, e auala i le fa’atau po’o le mokesi po’o le fa’aaoga e totogi ai se aitalafu, ae se’i vagana mea ia, lea e matuā manino lelei mai i le Fa’avae Vaega 102, o se lisi, manatua e tele lisi na fai i le taimi lena lea e o’o mai lava i le taimi lenei, lea e aofia ai le lisi umi lea o fanua fa’aleaganu’u lea ei Lotofaga i le Fonoti, o le lisi lena na i ai ae le’i tuto’atasi le tatou Malo Samoa, ma fanua nei o lo o mana’omia e le Malo mo se fausia ai o se auala tele mo femalaga’iga, e le so’ona avea e le Malo ni fanua e le mo’omia, se’iloga o ni atina’e tetele a le Malo, ona fa’atoa fai lea o fa’asalalauga.
“A’o le 102 la lea tou te vaai mai ai i le Tusi Fa’avae lea
ou te umiaina, e leai ma se fa’aupuga o tagofia ai le fa’atauina o fanua fa’aleaganu’u oi totonu o le tatou Tulafono tau fa’aofi lea e fa’agasolo nei, o la lava e tumau pea le 102.
“Lea fo’i na faimai la’u toeaina (Tupuola Efi) ua le malu, a’o lea ua matuā malu lava, ma o le i’uga lena na fai i le Aso 04, Aso 05, Aso 06 o Oketopa i le 1960 lea e fa’amaumau i tusi Tulafono a le Malo lea fo’i e i ai a’u tusi.
“Tu’u mai loa i le teuteuga o le Fa’avae, lea ua faimai so’o se fuaiupu o le Fa’avae e mafai ona teuteuina, pe a fa’apea, o se Tulafono fa’aofi ua faia, e lei lalo ifo o le 2/3 o Sui o le Palemene e lagolagoina, ae lei lalo ifo o le 90 Aso, e tatau ai ona taofi, o lona uiga o le avanoa lea e tatau ona fai ai soālaupulega, a’o le’i faia le faitauga fa’atolu, o lona uiga o le va o le faitauga fa’alua ma le faitauga fa’atolu e tatau ai ona taofi so’o se Tulafono mo le avanoa e fa’atalanoa ai lea Tulafono ma le mamalu o le atunuu.
“Ae i ai la ma le vaega tāua lea ua tu’uina mai, se’i vagana ua a’afia le 102 o le Fa’avae, mo le fa’atauina o Fanua e ono suia ai le Fuaiupu 102 o le Fa’avae, o lona uiga e lē mafai la ona ave i le Ao o le Malo mo lana ioega se’i mua’i ave i le atunuu e fai le Pelepesite e tāpa ai le latou maliega, e leai la se mea fa’apena o faia, auā e le’o a’afia le 102, o lea lava e malu le 102 i le teuteuga fou o le Tulafono lea e fa’agasoloina nei.
“O lea la ua outou vaai mai o lea ua ou matuā ‘apa’apa lava i le Fa’avae, ma nei Tulafono mafiafia nei ei lo’u Ofisa, o lea ou te faitau ai, ou te le pei o Tui Atua, e avatu le Tulafono saini muamua ae toe faimai ua sese.”
Na fa’ailoa fo’i e le Komiti Fa’apalemene o feagai ma fa’atalatalanoaga fa’alaua’itele i nu’u ma afio’aga, le tele o le pulega mamalu a ali’i ma faipule fa’atoa malamalama manino i le uiga moni o nei Tulafono ina ua aga’i atu le Malo e fa’amanino le vala e pei ona taofi ‘ese’ese ai le atunuu i le tele o mau tala’iga sese o fa’asalalauina nei.
Peita’i o lo o i ai lava ma nisi fo’i e to’aitiiti o matai o nei Afio’aga ma Itumalo, o pogisa pea i le uiga moni o taumafai ai le Malo, ina ia fa’atino Tulafono o tau fa’aofi nei.
Ae na toe fa’atepa e le Palemia, nei matai i le fa’alauiloaina o suafa o toa o nei Itumalo ua tu’umālo, na o latou fitāituga i le taumafaiga o le tu’ufa’atasiga o le Fa’avae o le Malo Tuto’atasi o Samoa.
“O la’u tilotilo atu i nai toeaiina pei na’o le to’atolu ea nai toeaiina, a’o lea ua uma ona talanoa mai toeaiina ia e faia le Itumalo, ua latou lagolagoina le Tulafono, atonu fo’i e i ai le taimi e malamalama uma ai tagata.
“O lo o o’u umia le tatou Tusi Fa’avae, lea ou te tilotilo atu i Palauli lava ia, o lea e saini ai i le Fa’avae toeaiina na auai i le talanoaina o le Fa’avae o le Malo Tuto’atasi o Samoa, o Sui fo’i nei o Palauli, o Fiso Fusi, o Lagaaia Fa’amaga ma Toluono Lama.
“O i si ia ta’ita’i iloga o le Fa’avae, a tu’u mai fo’i la ia Palauli i Sisifo, pei o i si ia Afio’aga e le’o malamalama lelei, o Sui nei sa saofafa’i i le tu’ufa’atasia o le tatou Fa’avae, o Tuāto Poto, Seiuli Tolova’a Iakopo, Matalē Tu’ugafala ma Faiumu A. pei o tamā nei o nei Afio’aga na auai i le Fa’avae.
Na toe fautua ma le malosi fo’i e le Ta’ita’i o le Malo, Sosaiete ma Fa’alapotopotoga uma i le atunuu, ina mautinoa e lava sa’ili’ili so’o se itutino i uiga moni o tulafono o tau fa’aofi nei, ina ia ‘aua ne’i taina sese manatu o se Sosaiete i ni finagalo to’aitiiti o e o fa’auluulu i ai nei Sosaiete, ma ta’uvalea ai ia fo’i tomai ona o le fa’aali pogisa o finagalo ma lagona e aunoa ma se fautuaina.
Ou te matuā faitau mae’ae’a ma le manino i mea ia, o le ala lena e aogā ai fo’i la’u tu’ualalo, o so’o se fa’alapotopotoga po’o loia, foma’i, su’etusi inisinia, a o’o loa i mataupu e vevela fa’apenei, tatau loa ona valaau le Sosaiete atoa e fa’aali o latou finagalo, ae le’o le nonofo o tama’i Komiti nei na’o le to’aono pe to’afitu, fa’aali ni o latou manatu, ae ta’u ai le Sosaiete atoa, o le matuā mataga o lena mea, o le mea lena sa tatau ona fai.
“E tāua ai tele mea nei o fono fa’aletausaga, ona tofi lea o tagata ua matutua, e lava le tofā mamao, ua lava le fa’autaga loloto ma le malamalama i le fa’afoeina o mataupu tetele fa’apenei, o le lesona la e maua mai ii, i le fa’atāuaina o mea nei o Fa’alapotopotoga, o lea ou te talanoa atu i mea ia, leaga o lea fo’i e i ai le matou Fa’alapotopotoga Fa’apolofesa Tau Suetusi, ma e tatau ona tofia lelei tagata, e lava le tomai latou te fa’atautaia mataupu a le Sosaiete, auā e sasi loa ona ulagia fo’i lea e i si Sosaiete.
“O le ala fo’i lena e ave ai pea a’u tusi i le tele o taimi i le Sosaiete a Loia, Foma’i ma Inisia ma i si, fa’amolemole se’i va’ava’ai ane mea ia, vaai toto’a i mataupu ia, ‘aua le tu’ulafoaia e mataga ai tagata a’oa’oina na fa’au’uina mai fafo ae omai fai mea fa’aletonu fa’apea e ta’uvalea ai le Sosaiete.
