NAFANUA PURE PRODUCTS- ITUTINO A LE MALO E GAOSIA AI OLOA MO TAUMAFA
Tusia: Asenati Taugasolo Semu
O le vaai mamao a le Malo ina ia gaosia oloa ma faatau atu i atunuu i fafo, ua amata faagasolo ai nei le fausia o lana kamupani o le ‘Nafanua Pure Products’.
O lea fale gaosi oloa, o le a fausia i le lotoa a le Faalapotopotoga o Suesuega Faasaienisi a Samoa (SROS) i Nafanua, ma o le gaosia ai oloa mo le faatauina atu i totonu o Samoa ma atunuu i fafo.
O le vaai mamao lea a le Malo na saunoa ai le Afioga i le Palemia, Tuilaepa Sailele Malielegaoi, e le o mafai ona malamalama lelei i ai le aufaipisinisi.
“Lea ua fua mai taumafaiga a le SROS, lea ua mafai ona gaosia le wiskey, lea foi ua agai atu i isi oloa e pei o falaoamata e gaosia mai le ulu, o ga’o e kuka ai taumafa
e gaosi mai le avoka ma le tele o isi oloa,” na saunoa ai Tuilaepa i le asiasiga a le Komiti o Atina’e a le Kapeneta (CDC), lea faia i le faaiuga o le masina ua mavae.
“O le agaga, ia mafai ona gaosi atu e latou (SROS) nei oloa, ona lafo loa lea i le aufaipinisi tuma’oti (private sector) latou te faagaioia le gaosia ma le faatauina atu. A o le mea lea e tupu, e le o fia faia e le private sector.”
Na saunoa le Palemia, e le o maua e le aufaipisinisi tuma’oti le vaai mamao a le Malo, i le gaosia ma le faatauina atu o nei oloa.
“Lea ua tupu a’e ai loa se manatu, ua tatau ona fai se tatou kamupani e faafoe i tulaga faapisinisi, e avea o se lima taumatau lea o le SROS e gaosia ai oloa mai ia latou suesuega, ona pasi atu loa lea e faagaioi e latou, tusa lava pe le tele ni oloa gaosi (productions) e maua mai ai, a ia mafai ona gaosi e latou, faatau atu ma maua mai ai ni tupe e faatupe ai galuega o lo o faatino e le SROS.”
Na saunoa foi le Palemia, o le a faafaigofie ona auina atu a tatou oloa gaosi (secondary product) i atunuu i fafo, aua o le a lē toe saisaitia ai i tulafono o le feaveaiga o oloa a ia atunuu (guarantine laws).
Na saunoa le Ofisa Sili o Pulega o le SROS, Seuseu Dr. Joseph Tauati, e o’o atu i le tausaga fou, ua faagasolo le gaosiga o nei oloa, ma ua leva ona mafai ona gaosia nei oloa mai suesuega a le SROS, ae le o mafai ona gaosia i tulaga faapisinisi ma faatauina i totonu o tatou faleoloa.
O Mati o le tausaga nei, lea na faamatu’u mai ai le vaegatupe e $2.5 miliona mai le Malo i lalo o le faamama avega mo le KOVITI 19, lea e faatupe ai lenei fale gaosi oloa.
Na saunoa foi Tuilaepa i isi galuega a le SROS, e pei o le gaosia o vailaau mo gasegase, lea ua faagasolo ai suesuega a le SROS mai laau e maua lava i totonu o le atunuu.
“Lea ua agai foi i suesuega o a tatou lava vai eseese. E leiloa pe maua ai i totonu o Samoa le tele o nisi vailaau mo gasegase aemaise le kanesa.
“E pei ona silafia o le tele o vai o lo o maua nei e fofo ai gasegase o le lalolagi, e fafau mai i laau.
“O lea la e fai lava tatou suesuega mai laau o lo o maua lava i Samoa nei.”
O isi vaega na faailoa e le SROS e aofia ai a latou suesuega i tulaga i vailaau, ina ia mautinoa e saogalemu nisi o vailaau o faaaoga e le aufaifaatoaga mo o tatou eleele, e pei o le vailaau fagavao.
Na faailoa foi suesuega i le siosiomaga ma le vaega o malosiaga faafouina.
