VILI LE SUAVAI MAI LE ‘ELE’ELE MO AFIO’AGA O ALEIPATA
Tusia: Asenati Taugasolo Semu
O le asiasiga a le Komiti o Atina’e a le Kapeneta lea na faia talu ai nei, na asia ai se tasi o galuega tele o le viliina o le suavai mai le eleele i Saleaumua.
O lea galuega ua fa’asolo ai le ta’iiina o laina paipa i afio’aga o Lalomanu,
Vailoa- Aleipata, Ulutogia, Satitoa, Lotopue, Mutiatele, Saleaumua ma Utufaalalafa a’o Samusu ma Amaile ua fuafua o le a o’o i ai lenei fesoasoani pe a amata le Vaega Lua o lenei poloketi tele a le Malo e pei ona saunoa manino ai le Ofisa Sili o Pulega o le Suavai, Seugamaalii Jammie Saena.
Na ia taua foi,e laitiiti se vaega fia faaauau ai le tosoina atu o laina paipa i le afioaga o Amaile, ma e fuafua lea i seleni e faatino ai lea galuega.
“E tele vaega o Aleipata Itupa i Luga ma le Itupa i Lalo ua faasopolia atu i le galuega fou lea.”
Na saunoa Seugamaalii, o nei galuega uma o le faao’o atu o laina paipa i vaega ia o Aleipata, na afua ina ua agai tagata e alala i uta ona o le galulolo na aafia ai Samoa i le tausaga 2009.
“O le tulaga lena lea na vili ai le suavai aua le suavai taumafa mo afioaga uma nei o lo o manaomia.”
O le faatanoa lea i Saleaumua na vili mai le vai i le manava o le eleele tusa ma le 120 mita le maualalo.
O le konekarete a le Bluebird Construction o lo o feagai ma lenei galuega tele.
