O SOU MANATU!
Ua i ai oloa ua mafai ona gaosia e le Fa’alapotopotoga o Su’esu’ega Fa’asaienisi a Samoa (SROS) e fa’aaogaina ai fua o fa’atoaga e i ai le falaoamata e gaosia mai le ‘ulu, uisikī e gaosia mai le talo, ga’o mo le gaosia o taumafa e gaosia mai le avoka ma isi. A’o se avanoa fo’i mo le aufai fa’ato’aga e maua ai seleni i le tu’uina atu lea o fua o fa’a’ele’eleaga e gaosi ai oloa ae maua ai fa’amanuiaga tau seleni e atia’e ai aiga.
O le a sou finagalo i lea atina’e a le Malo ma lona tāua mo outou le aufai fa’atoaga i totonu o le atunuu?
Cinta Fonoti
Sa’anapu
I so’u manatu o a’u o le tinā fai fa’atoaga, o se fesoasoani lelei tele lea mo matou le aufai fa’atoaga. O le fuafuaga a le Malo mo le faia o se pisinisi e fa’atau ai oloa gaosi mai oa fa’alenatura o lo’o maua i o tatou laufanua, aemaise o le fa’aaogaina o fua o fa’a’ele’eleaga o se fuafuaga ou te iloa ua matuā alagātatau ona fai. O se isi seleni fa’aopoopo lea mo le aufai fa’atoaga pe afai e ave fua o fa’a’ele’eleaga i le SROS ae maua ai se seleni e fesoasoani ai i le fa’atupeina o aoga a fanau, tausiga o aiga, aemaise o mea fai a ekalesia ma nu’u. O lea foi e matau atu, e i ai nisi o oloa fou ua mafai ona gaosia e le SROS, atonu o le amataga lea o se i si la’asaga fou mo nisi oloa gaosia atu i Samoa nei e fa’aaoga ai fua o fa’a’ele’eleaga auā fefa’ataua’iga fa’avaomalo aemaise le fofoga taumafa o si o tatou atunuu i Samoa nei.
Talitonu le manatu, o le a avea lenei pisinisi ma fesoasoani tele i fanau a le atunuu o lo o saili galuega aemaise o le si’itia atili o le tamaoaiga o le atunuu e ala i a tatou seleni maua.
Iulio Tuivaiti
Samatau, Falelatai
E i ai lo’u talitonuga so’o se atina’e lava, e mo’omia le galulue fa’atasi o tagata uma. Ua amata mea le Malo i le fa’atuina o le SROS atonu o le finagalo lea o le Malo ina ia fa’atu lea Fa’alapotopotoga, mo le fausia ma le gaosia o ni oloa tu’uapa ma pepa i o tatou ‘ele’ele. Afai e tu’u atu i ai ma le tau’au o le aufai fa’atoaga, ou te talitonu, e o’o atu i le isi 30 tausaga ua mafai lava e Samoa ona gaosi oloa mai oa o lo o maua i ona laufanua, auā le fofoga taumafa o le atunu’u ma maua ai oloa taugofie mo le fa’atauina atu.
Ua tatou molimauina le taugatā o le soifuaga ona o oloa auina mai fafo. Ae afai o le amataga lea o le i ai o se kamupani i Samoa e mafai ona gaosia taumafa ma maua ai fa’amanuiaga tau seleni mo le aufai fa’atoaga, ou te iloa e leai ma se fai fa’atoaga o le a nofonofo i lona fale ae le alu e galue i se aso, ina ia fa’atupulaia ai pea fua o fa’a’ele’eleaga e maua, ona tatou fai loa laia o le tala a le i si toeaina, “tupe ma matou, talo ma fa’i mo outou.”
Karameli Iosefa
Si’usega
Ou te talitonu o se fesoasoani tele lea mo matou le aufai fa’atoaga. O lea ua e tagataga’i mai, o lea ua fola a matou meamata i le maketi lenei i Fugalei, auā se seleni mo le tausiga o matou aiga, o fanau i aoga, aemaise o mea fa’alelotu ma le nu’u.
Ou te fa’afetai i le Malo ma le fuafuaga ua fa’ata’oto mo lea atina’e. Ua le tasi ae ua atu lasi fuafuaga a le Malo e fa’ata’atia, e le gata mo le atina’e o le tamaoaiga o le atunu’u, ae o ni fuafuaga fo’i e manuia ai matou le aufai fa’atoaga. O lea ua a’apa le Malo i le fa’atuina o lea pisinisi, auā o lea e silafia e le Malo, afai e fa’atuina le kamupani lea e gaosia ai oloa e fa’aaogaina ai fua o fa’a’ele’eleaga a le aufai fa’atoaga, o le a manuia le aufai fa’atoaga ae silisili ai ona fiafia le atunu’u lautele o le a latou fa’atauina nei oloa.
O lea fo’i e mātau atu, o le SROS foi o lo’o latou gaosia oloa tu’u ‘aisa lea e tele ina auina atu i atunu’u i fafo, lea foi o lo’o maua ai fa’amanuiaga mo le aufai fa’atoaga. O se tupe vave foi lea mo matou pe a mo’omia se seleni, auā na o le ave lava o fua o fa’a’ele’eleaga i le SROS ae maua ai seleni mo matou. E le gata i lea, ae atonu o le a maua ai foi ni galuega mo i si fanau a le atunu’u i le lumanai, pe a manuia le fa’agaioioiga o lea kamupani.
Muaau Mulo
Faleatiu
O se fiafiaga tele lea mo a’u nei o le fai fa’atoaga, auā o lea o le a maua se isi alagā tupe e tausi ai lo’u aiga aemaise lava o fanau aoga. O le taimi lenei, o lea e aumai meamata i le maketi i Fugalei e fa’atau ai, ma e le fa’apea e maua ai pea seleni mai meamata o fa’atau, ona o lo’o to’atele le aufai fa’atoaga o lo’o autova’a mai i le maketi e fa’atau a latou meamata. E lē tutusa ai pea aso uma, auā e fuafua lava i tagata fa’atau. O le tele o taimi, e fa’atau tia’i a matou meamata ina ia maua se seleni peafai e po lelei e le’i taulia fa’atasi se meamata se tasi.
Peita’i o le fuafuaga a le Malo e pei ona fa’ata’atia, o se fuafuaga ua leva na tatau ona fa’atino, ina ia i ai lava se fale gaosi oloa a Samoa lava ia, e ave aga’i i ai fua o fa’a’ele’eleaga a le aufai fa’atoaga ma le mamalu o le atunu’u, ae maua ai fa’amanuiaga tau seleni mo le tausiga o aiga. Atonu o ā lava fua o fa’a’ele’eleaga e mafai ona sapalai atu e le aufai fa’atoaga e mafai ona gaosia ai ni oloa, o le manuia foi lea mo tatou uma, e le gata mo le atina’e o le tamaoaiga o le atunuu, ae fa’apea fo’i le manuia o le aufai fa’atoaga ma tagata ta’ito’atasi.
Siaosi Pita
Fasito’o-uta
So’o se atina’e lava, tasi lava lona fa’amoemoe autu, mo le manuia o le atunuu atoa. E le gata o matou le aufai fa’atoaga, ae fa’apea fo’i i le atunu’u lautele.
Atonu o se fesoasoani fo’i lea mo matou, talu ona vevesi le lalolagi i le fa’ama’i o le Koviti 19, ua tele ina a’afia ai fale talimalo aemaise o pisinisi i totonu o Samoa, ua atili a’afia atu ai fo’i ma matou, ona o matou sa tele na sapalaia fale talimalo ma pisinisi i le gaseseina o taumafa a latou malo asiasi mai i Samoa. Peita’i i le taimi nei, matuā slow lava o le alu o a matou meamata ona ua tau leai nisi mai fale talimalo ma pisinisi o lo’o latou fa’aaogaina fua o fa’a’ele’eleaga, ona o le fa’ama’i. Ae atonu o le fuafuaga a le Malo mo le fa’atuina o le kamupani gaosi oloa a le SROS o se fuafuaga manaia tele.
O le uiga o lo’u manatu, o lea ua fuafua le fa’atuina o le kamupani e fa’afoea le gaosia o oloa mai i fua o fa’a’ele’eleaga o lo’o maua i laufanua o le atunuu. Afai e sapalai e le aufai fa’atoaga nisi fua o fa’aeleeleaga mo le gaosia o oloa ia, o le manuia lena o le aufai fa’atoaga. Afai e gaosia oloa ma fa’atau i totonu o Samoa ma auina atu i atunu’u i fafo, o le manuia fo’i lena o le atunu’u lautele, auā e fa’atau atu oloa, auina atu foi oloa mo atunu’u i fafo, maua e tatou le tupe e atina’e ai le tamaoaiga o le atunuu. E le gata i lea, a’o le itu tau i galuega mo fanau a Samoa, atonu o le kamupani lea o le a maua ai galuega mo i si fanau o le atunuu.
Tavita Senitofo
Faleatiu
Matuā manaia lava le fuafuaga a le Malo aemaise o le SROS. Atonu o le i si vaega lea, o lo’o naunau ai lava le Malo i tagata o le atunu’u e toa’aga e fai fa’atoaga. O lea ua tatou va’ava’ai atu i le sosolo fa’aafi o le fa’ama’i o le Koviti 19 i na atunuu, ae fa’afetai i le Atua o lo’o malutia pea Samoa i ona aao alofa.
Afai o lea ua fuafua e le SROS le fa’atuina o le kamupani mo le gaosia o oloa mai fua o fa’a’ele’eleaga, o se fesoasoani lelei lea mo matou le aufai fa’atoaga. A silasila i le galuega o lo’o matou fa’atinoa i aso uma, e le’o se galuega faigofie, e timuia, laina ona o le manatu i le tausiga o matou aiga. Ae fa’afetai i le tofā ua a’e i le Malo e fa’atuina ai lea kamupani, atonu o le a maua mai ai sina seleni e fesoasoani ia matou i le tausiga o aiga, auā o le fa’atoaga lava lea e ola mai ai. Ae afai o le kamupani lea ua fuafua e maua ai se fesoasoani mo le aufai fa’atoaga e ala ia latou oloa gaosi, se malo le pule, faafetai le fa’aeaea!
