TA’IMUA SROS MO LE AUFAI FA’ATOAGA
Tusia: Taunuuga Toatasi
Ua taliga e fia fa’alogo i nisi o le aufai fa’atoaga le fuafuaga a le Malo ua fa’ataoto, mo le fausiaina o se kamupani e gaosia ai oloa i totonu o Samoa mo le fofoga taumafa o le atunuu aemaise fefa’ataua’iga fa’avaomalo.
Ua amata fa’agasolo nei le fuafuaga a le Malo i le fausia lea o lana Kamupani ua fa’aigoaina “Nafanua Pure Product” i le lotoā a le Fa’alapotopotoga o Su’esu’ega Fa’asaienisi a Samoa (SROS).
O lea vaa’iga mamao a le Malo, na saunoa i ai le Palemia, Tuilaepa Sailele Malielegaoi, i le asiasiga a le Komiti o Atina’e a le Kapeneta, o le a gaosia ai oloa e fa’atau i totonu o le atunuu ma auina atu i atunuu i fafo ina ia lauiloa ai Samoa i le lalolagi atoa o oloa na gaosia atu i o tatou laufanua.
O le fuafuaga lea a le Malo na saunoa Tuilaepa e le’o mafai ona malamalama lelei i ai le aufai pisinisi.
O nisi o oloa ua mafai ona gaosi mai fua o fa’a’ele’eleaga e aofia ai le falaoamata gaosia mai le ulu, o le uisikī e gaosia mai le talo, ga’o e kuka ai taumafa e gaosia mai le avoka ma i si.
Peita’i, mo nisi o le aufai fa’atoaga na fa’aali lo latou lagona fa’afetai i le Malo ma ana fuafuaga, auā o lea ua tatala e le Malo se isi faitoto’a mo le manuia o le aufai fa’atoaga i totonu o le atunuu.
Na fa’aālia le manatu o le fai fa’atoaga mai Fasito’o – Uta ia Siaosi Pita e fa’apea, o so’o se atina’e lava, tasi lava lona auga e mo le manuia o le atunuu atoa.
“E manuia ai matou le aufai fa’atoaga ae fa’apea fo’i i le atunu’u lautele.
“Atonu o se fesoasoani foi lea mo matou, talu ona vevesi le lalolagi i le fa’ama’i o le Koviti 19, ua i ai faletalimalo ma pisinisi i totonu o le atunuu ua a’afia atu ai, ona ua leai ni tagata asiasi mai.
“Lea ua a’afia atu ai ma matou, ona o matou sa tele na sapalaia talo ma fualaau ‘aina mo fale talimalo ma pisinisi i le gaseseina o taumafa mo malo asiasi mai i le atunu’u.
“O le taimi lenei, matua’i slow lava le alu o matou meamata, ua le’o toe tutusa ma le mea sa i ai, ae le’i tula’i mai le Koviti 19.
“Ae afai o le fuafuaga lea a le Malo e fa’atu lea kamupani gaosi oloa mo le gaosia o oloa mai fua o fa’a’ele’eleaga, o se fuafuaga manaia tele.”
“Afai e sapalai e le aufai fa’atoaga fua o fa’a’ele’eleaga mo le gaosia o oloa ia, o le manuia lena o le aufai fa’atoaga. Afai e gaosia oloa ma fa’atau i totonu o Samoa ma auina atu i atunu’u i fafo, maua seleni, o le manuia lena o le atunu’u lautele ma maua ai tatou tupe mo le atina’eina o le tamaoaiga o le atunuu.
“Ou te talitonu o le kamupani lea o le a maua ai nisi galuega mo i si fanau o le atunuu.”
E fa’apea foi se manatu mai le tinā fai fa’atoaga ia Karameli Iosefa o Si’usega, na fa’alia ai lona agaga fa’afetai i le Malo ona o lea fuafuaga lelei o le a maua ai se i si vaega seleni e fesoasoani i le tausiga o aiga, fanau aoga aemaise o mea fai a nu’u ma ekalesia.
E i ai le talitonuga o se tasi o fai fa’atoaga, Iulio Tuivaiti e fa’apea, o so’o se atina’e lava, e mo’omia le galulue fa’atasi o tagata uma.
“Lea ua amata mea le Malo e ala i le fa’atuina o lea kamupani, ma a tu’u atu i ai ma le tauau o le aufai fa’atoaga, e o’o atu i le isi 30 tausaga o luamana’i ua mfai lava e Samoa ona gaosi oloa mai oa o lo o maua i ona laufanua, auā le fofoga taumafa o le atunuu.”
E le gata i lea, ae o le a maua ai foi ma oloa taugofie mo tatou lava, o le fa’aopoopo lea a Iulio.
